ଛତ୍ରପୁର,୯।୧( ଦିଲ୍ଲୀପ ସାମଲ ): ଗଞ୍ଜାମ ଜିଲା ଛତ୍ରପୁର ଥାନା ଅଧିନରେ କିଛି ଦିନ ହେଲା ବେଆଇନ ମଦ କାରବାର ହେଉଥିବା ନେଇ ଅଭିଯୋଗ ହେଉଥିଲା । ଏ ନେଇ ଶୁକ୍ରବାର ୨ ଟି ସ୍ଥାନରେ ଅଚାନକ ଚଢ଼ାଉ କରି ବିପୁଳ ପରିମାଣର ମଦ ଜବତ କରିଛି ଛତ୍ରପୁର ଥାନା ପୋଲିସ। ସହରର ଅପର ବସ ଷ୍ଟାଣ୍ଡ ଓ କୋର୍ଟ ଷ୍ଟେସନ ଦୁଇଟି ସ୍ଥାନରେ ଚଢ଼ାଉ କରି ପ୍ରାୟ ୬୮ ଲିଟର ବିଦେଶୀ ମଦ ସମେତ ୧୦୦ ଟି ଦେଶୀ ମଦ ପ୍ୟାକେଟ ଓ ଗୋଟିଏ ଫ୍ରିଜ ଜବତ କରାଯାଇଥିବା ସୂଚନା ମିଳିଛି।
ନିଜ ଘରେ ରଖି ବେଆଇନ ଭାବେ ମଦ ବିକ୍ରି କରୁଥିଲେ । ପ୍ରୋବିଶନାଲ ଆଇପିଏସ ଅଧିକାରୀ ନୀତିଶ କୁମାର ମିଶ୍ରଙ୍କ ନେତୃତ୍ୱରେ ଛତ୍ରପୁର ଅତିରିକ୍ତ ତହସିଲଦାର ମନୋଜ କୁମାର ପ୍ରଧାନଙ୍କ ଉପସ୍ଥିତିରେ ଏହି ଚଢ଼ାଉ କରାଯାଇଥିବା ବେଳେ ଜଣଙ୍କୁ ଗିରଫ କରାଯାଇଛି।ଗିରଫ ଜଣକ ହେଲେ ଛତ୍ରପୁର ସହରର ରମେଶ ଚନ୍ଦ୍ର ସାହୁ। ସହରରେ ବେଆଇନ ମଦ ବିକ୍ରି ବୃଦ୍ଧି ପାଉଥିବା ବେଳେ ଆଗକୁ ଏପରି ଚଢ଼ାଉ ଜାରି ରହିବ ବୋଲି ଥାନାଧିକାରୀ ସବ୍ୟସାଚୀ ମଲ୍ଲ ସୂଚନା ଦେଇଛନ୍ତି ।