ଭଞ୍ଜନଗର,୧୯ା୬(ବାବୁଲା ପ୍ରଧାନ): ଘୁମୁସର ବୀର ଚକରା ବିଷୋୟୀଙ୍କ ଜନ୍ମପୀଠ ଗଞ୍ଜାମ ଜିଲା ଭଞ୍ଜନଗର ବ୍ଲକ ଅନ୍ତର୍ଗତ ବିଞ୍ଜିଗିରିକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଆଭାସି ମାଧ୍ୟମରେ ସ୍ମାରକୀ ଘୋଷଣା କରିବେ। ଏହି ଖବର ଭଞ୍ଜନଗରରେ ପହଞ୍ଚିବା ପରେ ଚାରିଆଡ଼େ ଖୁସିର ଲହରୀ ଖେଳିଯାଇଛି। ସ୍ମାରକୀ ଘୋଷଣା ପରେ ସଂପୃକ୍ତ ଅଞ୍ଚଳର ବିକାଶ ପାଇଁ କୋଟି କୋଟି ଟଙ୍କା ଅନୁଦାନ ଆସିବ। ପ୍ରଧାନମନ୍ତ୍ରୀଙ୍କ ଆଭାସି କାର୍ଯ୍ୟକ୍ରମ କିଭଳି ସଫଳ ହେବ ସେଥିପାଇଁ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ଗୁରୁବାର ସମୀକ୍ଷା କରିଛନ୍ତି। ତେଣୁ ସେ ବିଭିନ୍ନ ବିଭାଗର ଅଧିକାରୀ, ଲେଖକ, ଐତିହାସିକ, କବିଙ୍କୁ ଡାକି ଆଲୋଚନା କରିଥିଲେ।
ଆସନ୍ତା କାଲି ଅପରାହ୍ନ ସାଢେ଼ ୩ ଟା ରେ ଏହି କାର୍ଯ୍ୟକ୍ରମ ହେବ। ସୂଚନା ଯୋଗ୍ୟ ଯେ ଓଡ଼ିଶାର ଭାଜପା
ସରକାରଙ୍କ ଏକ ବର୍ଷ ଶାସନ ପୂର୍ତ୍ତି ଅବସରରେ ଆସନ୍ତା କାଲି ଭୁବନେଶ୍ୱର ଜନତା ମଇଦାନରେ ଏକ ବିରାଟ ସଭା ଆୟୋଜନ ହୋଇଛି। ଏହି ଅବସରରେ ଓଡ଼ିଶାର ବରପୁତ୍ର ଏବଂ ସ୍ଵାଧୀନତା ସଂଗ୍ରାମୀ ମାନଙ୍କୁ ଉପଯୁକ୍ତ ସମ୍ମାନ ଦେବାପାଇଁ ସେମାନଙ୍କ ଜନ୍ମସ୍ଥଳୀକୁ ସମ୍ମାନ ଦିଆଯିବା ସହ ସ୍ମାରକୀ ଘୋଷଣା କରାଯିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉକ୍ତ ସଭାରୁ ତାହା ଘୋଷଣା କରିବେ।
ଏଥିସହ ଉକ୍ତ ଅଞ୍ଚଳ ଗୁଡ଼ିକର ବିକାଶ ପାଇଁ ଶହ ଶହ କୋଟି ଟଙ୍କା ଅନୁଦାନ ଘୋଷଣା କରିବାର କାର୍ଯ୍ୟକ୍ରମ ରହିଛି। ସେହିଭଳି ଗଞ୍ଜାମ ଜିଲାର ଖଲ୍ଲିକୋଟ ଠାରେ ଓଡ଼ିଆ ଜାତୀୟ ଆନ୍ଦୋଳନର କୀର୍ତ୍ତିମାନ୍ ବରପୁତ୍ର ରାଜା ବାହାଦୁର ରାମଚନ୍ଦ୍ର ମର୍ଦ୍ଦରାଜ ଦେଓଙ୍କ ଜନ୍ମସ୍ଥାନ ଏବଂ ଭଞ୍ଜନଗର ବିଞ୍ଜିଗିରି ଠାରେ ସୁଖ୍ୟାତ ସ୍ୱାଧୀନତା ସଂଗ୍ରାମୀ ଚକରା ବିଷୋୟୀଙ୍କ ଜନ୍ମସ୍ଥାନକୁ ଆଭାସୀ ମାଧ୍ୟମରେ ସ୍ମାରକୀ ଘୋଷଣା ସହ ରୂପାନ୍ତରଣ କରାଯିବାର କାର୍ଯ୍ୟକ୍ରମ ରହିଅଛି l ତେଣୁ ଆସନ୍ତା କାଲି ସେଠାରେ ଏକ ସଭା ଆୟୋଜନ ହୋଇଛି।
ଚକରା ବିଷୋୟୀ ବ୍ରିଟିଶ ଶାସକଙ୍କ ବିରୁଦ୍ଧରେ ଲଢେଇ କରି ନିଜର ସାହସିକତା ପରିଚୟ ଦେଇଥିଲେ। ଏହିଭଳି ଜଣେ ବୀର ଯୋଦ୍ଧାଙ୍କୁ ବିଗତ ସରକାର ଉପଯୁକ୍ତ ସମ୍ମାନ ଦେଇନଥିଲେ। ଭାଜପା ସରକାର ଆସିବା ପରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ଙ୍କ ଉଦ୍ୟମ କ୍ରମେ ବର୍ତ୍ତମାନ ଘୁମୁସର ଇତିହାସ ଦେଶ ବିଦେଶରେ ପ୍ରଚାର ପୁଣି ଆରମ୍ଭ ହୋଇଛି। ଯାହାକି ଘୁମୁସରବାସୀଙ୍କ ପାଇଁ ଗର୍ବର ବିଷୟ।