ନୂଆଦିଲ୍ଲୀ,୨୩।୯: କେନ୍ଦ୍ର ସରକାର କର୍ମଚାରୀ ଭବିଷ୍ୟ ନିଧି ସଂଗଠନ (ଇପିଏଫଓ) ନିୟମରେ ପରିବର୍ତ୍ତନ ଆଣି ସଦସ୍ୟମାନଙ୍କୁ ସେମାନଙ୍କର ସଞ୍ଚୟକୁ ଅଧିକ ସ୍ବାଧୀନତାର ସହ ବ୍ୟବହାର କରିବାର ସୁଯୋଗ ଦେବାକୁ ଚିନ୍ତା କରୁଛନ୍ତି। ରିପୋର୍ଟ ଅନୁଯାୟୀ, ଗୃହ ନିର୍ମାଣ, ବିବାହ ଏବଂ ଶିକ୍ଷା ଭଳି ଉଦ୍ଦେଶ୍ୟ ପାଇଁ ଟଙ୍କା ଉଠାଣ ସୀମା କୋହଳ କରିବା ଉପରେ ଅଧିକାରୀମାନେ କାମ କରୁଛନ୍ତି।
ଦୁଇ ଜଣ ବରିଷ୍ଠ ସରକାରୀ ଅଧିକାରୀ ଗଣମାଧ୍ୟମକୁ କହିଛନ୍ତି ଯେ, ଏକ ବର୍ଷ ମଧ୍ୟରେ ଏହି ପରିବର୍ତ୍ତନ ଆଣିବାକୁ ଯୋଜନା ରହିଛି। ଜଣେ ଅଧିକାରୀ ନାମ ନ ପ୍ରକାଶ କରିବା ସର୍ତ୍ତରେ କହିଛନ୍ତି, “ଏହା ସଦସ୍ୟମାନଙ୍କ ନିଜର ଅର୍ଥ, ତେଣୁ ସେମାନଙ୍କୁ ନିଜ ଆବଶ୍ୟକତା ଅନୁଯାୟୀ ଏହା ବ୍ୟବହାର କରିବାର ସ୍ବାଧୀନତା ମିଳିବା ଉଚିତ।”
ବର୍ତ୍ତମାନର ନିୟମ:
ବର୍ତ୍ତମାନ ଇପିଏଫଓ ସଦସ୍ୟମାନେ ୫୮ ବର୍ଷ ବୟସରେ ସେବା ନିବୃତ୍ତି ପରେ କିମ୍ବା ଦୁଇ ମାସରୁ ଅଧିକ ସମୟ ବେକାର ରହିଲେ ମାତ୍ର ସମ୍ପୂର୍ଣ୍ଣ ଅର୍ଥ ଉଠାଣ କରିପାରିବେ। ଆଂଶିକ ଉଠାଣ ନିର୍ଦ୍ଦିଷ୍ଟ ସର୍ତ୍ତରେ ଅନୁମୋଦିତ। ବିବାହ ପାଇଁ ୭ ବର୍ଷ ସେବା ପରେ ୫୦% ଅବଦାନ ଓ ସୁଧ ଉଠାଣ କରାଯାଇପାରିବ। ଗୃହ ନିର୍ମାଣ ପାଇଁ ୩ ବର୍ଷ ସେବା ପରେ ୯୦% ପର୍ଯ୍ୟନ୍ତ ଅର୍ଥ ଉଠାଣ ସମ୍ଭବ। ଶିକ୍ଷା ପାଇଁ ୭ ବର୍ଷ ସେବା ପରେ ୫୦% ଅବଦାନ ଓ ସୁଧ ଉଠାଣ କରାଯାଇପାରିବ।
ପ୍ରସ୍ତାବିତ ପରିବର୍ତ୍ତନ:
ଜୁଲାଇରେ ମନିକଣ୍ଟ୍ରୋଲ ରିପୋର୍ଟ କରିଥିଲା ଯେ, ପ୍ରତି ୧୦ ବର୍ଷରେ ସଦସ୍ୟମାନେ ସମ୍ପୂର୍ଣ୍ଣ କିମ୍ବା ଆଂଶିକ ଅର୍ଥ ଉଠାଣ କରିପାରିବେ। ଏହି ପରିବର୍ତ୍ତନ ସଦସ୍ୟମାନଙ୍କୁ ଜୀବନର ବିଭିନ୍ନ ପର୍ଯ୍ୟାୟରେ ଆର୍ଥିକ ଆବଶ୍ୟକତା ପୂରଣ କରିବାରେ ସାହାଯ୍ୟ କରିବ।
ବିଶେଷଜ୍ଞମାନଙ୍କ ମତରେ, ଏହି କୋହଳ ନିୟମ ନିମ୍ନ ଓ ମଧ୍ୟମ ଆୟ ବର୍ଗର ସଦସ୍ୟମାନଙ୍କ ପାଇଁ ଉପକାରୀ ହେବ। ତେବେ, ନିବୃତ୍ତି ସୁରକ୍ଷା ସୁନିଶ୍ଚିତ କରିବା ସହ ସ୍ବାଧୀନତାର ସନ୍ତୁଳନ ରକ୍ଷା କରିବା ଏକ ଚ୍ୟାଲେଞ୍ଜ ହେବ ବୋଲି ମନମୀତ କୌର ଓ ଅରେଲିଆ ମେନେଜେସ ଭଳି ବିଶେଷଜ୍ଞମାନେ ମତ ଦେଇଛନ୍ତି।