ଦିଗପହଣ୍ଡି,୨୬।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ନିକଟ ରୋହି ଗାଁ ବାସିନ୍ଦା ଜାନକୀ ବଲ୍ଲଭ ବିଷୋୟୀଙ୍କ ୫୭ ବର୍ଷ ବୟସରେ ହୃଦଘାତରେ ପରଲୋକ ଘଟିଛି। ଦିଗପହଣ୍ଡି ସରସ୍ବତୀ ଶିଶୁ ବିଦ୍ୟା ମନ୍ଦିରରେ ସେ ୨୦୧୩ ରୁ ୨୦୧୭ ଯାଏ ପ୍ରଧାନାଚାର୍ଯ୍ୟ ଭାବେ କାର୍ଯ୍ୟ କରିବା ପରେ କନ୍ଧମାଳ ଜିଲା ଫୁଲବାଣୀ ଓ ପରେ ସାନଖେମୁଣ୍ଡି ବ୍ଲକ ଡେଙ୍ଗାଓସ୍ତା ଗ୍ରାମ ସରସ୍ବତୀ ଶିଶୁ ବିଦ୍ୟାମନ୍ଦିରକୁ ତାଙ୍କର ବଦଳି ହୋଇଥିଲା। ସେଠାରେ ସେ ସୂଚାରୁ ରୂପେ କାର୍ଯ୍ୟ ସମ୍ପାଦନ କରିବା ପରେ କିଛିବର୍ଷ ହେଲା ସେ ଲଙ୍ଗଳେଶ୍ବର ଗ୍ରାମ ସରସ୍ବତୀ ଶିଶୁ ବିଦ୍ୟା ମନ୍ଦିରର ପ୍ରଧାନାଚାର୍ଯ୍ୟ ଭାବେ କାର୍ଯ୍ୟ କରୁଥିଲେ।
ବୁଧବାର ସନ୍ଧ୍ୟାରେ ସେ ଛାତିରେ କଷ୍ଟ ଅନୁଭବ କରିବାରୁ ତାଙ୍କୁ ଭୁବନେଶ୍ବର ସ୍ଥିତ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସା ହେବା ପରେ ସୁସ୍ଥ ହେବାରୁ ଡାକ୍ତରଙ୍କ ପରାମର୍ଶ କ୍ରମେ ସେ ଭୁବନେଶର ସ୍ଥିତ ସମ୍ପର୍କୀୟଙ୍କ ଘରକୁ ଫେରିଥିଲେ। ଗୁରୁବାର ତାଙ୍କୁ ପୁଣି ହସ୍ପିଟାଲ ଆସିବାକୁ ଡାକ୍ତର କହିଥିଲେ। ସକାଳ ପ୍ରାୟ ୭ ଟାରେ ସେ ନିତ୍ୟକର୍ମ ସାରି ହସ୍ପିଟାଲ ଯିବା ପାଇଁ ପ୍ରସ୍ତୁତ ହେଉଥିବା ବେଳେ ସେ ଆକସ୍ମିକ ଭାବେ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ହସ୍ପିଟାଲ ନେବା ବେଳେ ହୃଦଘାତରେ ତାଙ୍କର ମୃତ୍ୟୁ ଘଟିଥିଲା। ସେଠାରୁ ମୃତଦେହ ଅଣାଯାଇ ସନ୍ଧ୍ୟାରେ ତାଙ୍କ ପୈତୃକ ଗାଁ ଶ୍ମଶାନରେ ଅନ୍ତିମ ସଂସ୍କାର କରାଯାଇଛି।
ସେ ଜଣେ ମେଳାପି, ଛାତ୍ର ବତ୍ସଳ ପ୍ରଧାନାଚାର୍ଯ୍ୟ ଭାବେ ଦିଗପହଣ୍ଡି, ସାନଖେମୁଣ୍ଡି, ଖଲିକୋଟ ଏବଂ କୁକୁଡ଼ାଖଣ୍ଡି ବ୍ଲକ ଅଞ୍ଚଳରେ ପରିଚିତ ଥିଲେ। ତାଙ୍କ ପରଲୋକ ଖବର ପାଇ ଜିଲାର ବିଭିନ୍ନ ଅଞ୍ଚଳର ଶିଶୁ ମନ୍ଦିରରେ କାର୍ଯ୍ୟରତ ଆଚାର୍ଯ୍ୟା, ଆଚାର୍ଯ୍ୟଙ୍କ ସମେତ ପୁରାତନ ଛାତ୍ରଙ୍କ ସହ ଗଣ୍ୟମାନ୍ୟ ବ୍ୟକ୍ତି ତାଙ୍କ ବାସଭବନରେ ପହଞ୍ଚି ଶେଷ ଦର୍ଶନ କରିବା ସହ ଶୋକ ସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି।