ନୂଆଦିଲ୍ଲୀ,୨୪।୪: ପହଲଗାମ ଆତଙ୍କବାଦୀ ଆକ୍ରମଣ ସମ୍ପର୍କରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ଦିଲ୍ଲୀରେ ଏକ ସର୍ବଦଳୀୟ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ସମସ୍ତ ଦଳ ଏହି Terror Attackକୁ ନିନ୍ଦା କରିଥିଲେ। ବୈଠକ ଶେଷ ହେବା ପରେ, କେନ୍ଦ୍ର ମନ୍ତ୍ରୀ କିରେନ ରିଜିଜୁ ସ୍ବୀକାର କରିଥିଲେ ଯେ ସରକାର ଭୁଲ କରିଛନ୍ତି। ସେ କହିଛନ୍ତି, ‘ଏହି ଘଟଣା କିପରି ଘଟିଲା ଏବଂ କେଉଁଠାରେ ଭୁଲ ହେଲା ସେ ବିଷୟରେ ବୈଠକରେ ଆଲୋଚନା କରାଯାଇଥିଲା। ଆମର ଅଧିକାରୀମାନେ ଘଟଣା କିପରି ଘଟିଲା ତାହା କହିଥିଲେ।’
କେନ୍ଦ୍ରମନ୍ତ୍ରୀ କିରେନ ରିଜିଜୁ କହିଛନ୍ତି, ‘ଯେଉଁଠାରେ ଏହି ଘଟଣା ଘଟିଛି ତାହା ମୁଖ୍ୟ ରାସ୍ତାରେ ନୁହେଁ। ସମସ୍ତ ଦଳକୁ କୁହାଗଲା ଯେ ସବୁକିଛି ଠିକ ଥିବା ସତ୍ତ୍ୱେ, ଏକ ଭୁଲ ହୋଇଛି ଏବଂ ସମସ୍ତେ ଏଥିରେ ଦୁଃଖିତ। ଆମେ କେଉଁଠାରେ ଭୁଲ ହୋଇଛି ତାହା ଖୋଜିବୁ। ଭବିଷ୍ୟତରେ ଏପରି ଘଟଣା ରୋକିବା ପାଇଁ ବ୍ୟବସ୍ଥା କରାଯାଇଛି। ସମସ୍ତ ଦଳର ନେତା ଏକ ସ୍ବରରେ କହିଛନ୍ତି ଯେ ସରକାର ଯାହା ପଦକ୍ଷେପ ନେବେ, ଆମେ ତାହାକୁ ସମର୍ଥନ କରିବୁ। କିଛି ପ୍ରସଙ୍ଗ ମଧ୍ୟ ଉଠିଥିଲା, ଯାହା ଉପରେ ସ୍ପଷ୍ଟୀକରଣ ଦିଆଯାଇଥିଲା।’
କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ କହିଛନ୍ତି, ‘ଏହା ଏକ ଅତ୍ୟନ୍ତ ଦୁଃଖଦ ଘଟଣା। ଗତ କିଛି ବର୍ଷ ଧରି କଶ୍ମୀରରେ ଲୋକମାନେ ଶାନ୍ତିପୂର୍ଣ୍ଣ ଭାବରେ ସେମାନଙ୍କର ବ୍ୟବସାୟ କରୁଥିଲେ, ପର୍ଯ୍ୟଟକ ଆସୁଥିଲେ, କାର୍ଯ୍ୟକଳାପ ଚାଲିଥିଲା ଏବଂ ସବୁକିଛି ବହୁତ ଭଲ ଭାବରେ ଚାଲିଥିଲା। ସମସ୍ତ ରାଜନୈତିକ ଦଳ ସେମାନଙ୍କର ମତାମତ ରଖିଥିଲେ ଏବଂ ଗୋଟିଏ କଥା ବାହାରି ଆସିଲା ଯେ ଦେଶ ଏକତ୍ରିତ ହୋଇ ଏକ ସ୍ବରରେ କହିବା ଉଚିତ। ସମସ୍ତ ଦଳ କହିଛନ୍ତି ଯେ ସେମାନେ ସରକାରଙ୍କ ସହିତ ଅଛନ୍ତି।’