ସମ୍ବଲପୁର,୧।୧୨(ପ୍ରମୋଦ ବହିଦାର): ସମ୍ବଲପୁରରେ ଧାନ ସଂଗ୍ରହ ପକ୍ରିୟାରେ ଅଚଳାବସ୍ଥା ଜାରି ରହିଛି। ଯାହାକୁ ନେଇ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି। ଉତ୍ତ୍ୟକ୍ତ ଚାଷୀ ସମ୍ବଲପୁର ସଦରଥାନା ଅନ୍ତର୍ଗତ ସିନ୍ଦୁରପଙ୍କ ବାଇପାସ ଛକରେ ଜାତୀୟ ରାଜପଥ(୫୩)ରେ ଅର୍ଥନୈତିକ ଅବରୋଧ କରିଛନ୍ତି। ଫଳରେ ରାସ୍ତାର ଉଭୟ ପାର୍ଶ୍ୱରେ ହଜ଼ାର ହଜ଼ାର ମାଲବାହୀ ଟ୍ରକ ଅଟକି ରହିଛି। ତେବେ ଚାଷୀମାନେ କେବଳ ମାଲବାହୀ ଗାଡ଼ିଗୁଡିକୁ ଅଟକାଉଥିବାବେଳେ ଯାତ୍ରୀବାହୀ ଗାଡ଼ି ଗୁଡିକର ଚଳାଚଳ ସ୍ବାଭାବିକ ରହିଛି l ଆନ୍ଦୋଳନସ୍ଥଳରେ ପହଞ୍ଚି ଅତିରିକ୍ତ ଏସପିଙ୍କ ସହ ପୋଲିସ ପ୍ରଶାସନର ବରିଷ୍ଠ ଅଧିକାରୀ ଆନ୍ଦୋଳନରତ ଚାଷୀମାନଙ୍କୁ ବୁଝାଶୁଝା କରିଥିଲେ। ମାତ୍ର କୌଣସି ସୁଫଳ ମିଳି ନ ଥିବାବେଳେ ନଛୋଡ଼ବନ୍ଧା ଚାଷୀ ରାସ୍ତା ଉପରେ ବସି ବିଭିନ୍ନ ସରକାର ବିରୋଧି ନାରା ଦେଇ ଆନ୍ଦୋଳନକୁ ଜାରି ରଖିଛନ୍ତି।
ଜିଲା କୃଷକ ସୁରକ୍ଷା ସଙ୍ଗଠନ ସଭାପତି ବ୍ୟାମୋକେଶ ଠାକୁର କହିଛନ୍ତି, ଗତ ୨୮ ତାରିଖ ଠାରୁ ଧାନମଣ୍ଡି ଖୋଲିଥିଲେ ମଧ୍ୟ ଚାଷୀଙ୍କ ଧାନକୁ ଆଜି ପର୍ଯ୍ୟନ୍ତ ବିଧିବଦ୍ଧ ଭାବେ କ୍ର୍ରିୟ କରାଯାଇ ନାହିଁ। ସମ୍ବଲପୁରରେ ଧାନ ନେବାକୁ ରାଜି ଥିବାବେଳେ ଏପର୍ଯ୍ୟନ୍ତ ସେମାନେ କଷ୍ଟମ ମିଲିଂ ପାଇଁ ଧାନ ନେବାକୁ ଚୁକ୍ତିପତ୍ର ସ୍ବାକ୍ଷର କରି ନାହାନ୍ତି କି ଏବାବଦ ସିକ୍ୟୁରିଟି ଅର୍ଥ ମଧ୍ୟ ଦାଖଲ କରିନାହାନ୍ତି। ଅପରପକ୍ଷରେ ଟୋକନ ପାଇଥିଲେ ହେଁ ପଞ୍ଜିକୃତ ଚାଷୀମାନଙ୍କ ନାମ ସମ୍ପୃକ୍ତ ସମବାୟ ସମିତିରେ ପ୍ରଦର୍ଶନ କରୁନାହିଁ। ଫଳରେ ବିକ୍ରି ପାଇଁ ଧାନ ନେଇ ମଣ୍ଡିରେ ପହଞ୍ଚୁଥିବା ଚାଷୀଙ୍କ ନାମରେ ପି-ପାସ ଜାରି ହୋଇ ପାରୁନାହିଁ। ଯାହା ଚାଷୀଙ୍କ ଧାନ ବିକ୍ରିରେ ମୁଖ୍ୟ ପ୍ରତିବନ୍ଧକ ଭାବେ ଉଭା ହୋଇଛି ବୋଲି ଅଭିଯୋଗ କରିଛନ୍ତି ଠାକୁର। ତେବେ ଏଭଳି ପରିସ୍ଥିତିରେ ବିଳମ୍ବିତ ଧାନ ବିକ୍ରିକୁ ନେଇ ଚାଷୀଙ୍କ ମଧ୍ୟରେ ପୁଞ୍ଜିଭୂତ ଅସନ୍ତୋଷ ସୋମବାର ଉଗ୍ର ରୂପ ଧାରଣ କରିଛି ଓ ଚାଷୀମାନେ ଆନ୍ଦୋଳନକୁ ଓହ୍ଲାଇବାକୁ ବାଧ୍ୟ ହୋଇଛନ୍ତି ବୋଲି ସେ କହିଛନ୍ତି।
ଉପଜିଲାପାଳ ଡା. ପୁଷ୍ପାଞ୍ଜଳି ପଣ୍ଡା ମଧ୍ୟ ଆନ୍ଦୋଳନସ୍ଥଳରେ ପହଞ୍ଚି ଚାଷୀଙ୍କୁ ବୁଝାସୁଝା କରି ଆନ୍ଦୋଳନରୁ ଅନୁରୋଧ କରି ବିଫଳ ହୋଇଛନ୍ତି।
ଉପ ଜିଲାପାଳ ଡା.ପଣ୍ଡା କହିଛନ୍ତି ଯେ, ବୈଷୟିକ ତୃଟି ଯୋଗୁ ଚାଷୀଙ୍କ ନାମରେ ପି-ପାସ ଜାରି ହୋଇପାରି ନ ଥିବାରୁ ଧାନ ସଂଗ୍ରହ ପ୍ରକ୍ରିୟାରେ ସାମାନ୍ୟ ଅସୁବିଧା ହୋଇଛି। ସନ୍ଧ୍ୟାସୁଦ୍ଧା ସମସ୍ତ ଅସୁବିଧା ଦୂର ହୋଇଯିବ। ମିଲର୍ସଙ୍କ ଚୁକ୍ତିପତ୍ର ସ୍ବାକ୍ଷର ହୋଇ ନ ଥିବାରୁ ମଣ୍ଡିରେ ମିଲର୍ସଙ୍କୁ ଟେଗ ହୋଇ ପାରିନାହିଁ। ସନ୍ଧ୍ୟାସୁଦ୍ଧା ମିଲର୍ସ ଚୁକ୍ତିପତ୍ର ସ୍ବାକ୍ଷର ସମ୍ପନ୍ନ ହୋଇଯିବ। ଧାନ ବିକ୍ରି ପାଇଁ ଚାଷୀମାନଙ୍କ ନାମରେ ପି-ପାସ ଜାରି ହୋଇଯିବ। ଆଗକୁ ଧାନ ଉଠିବାରେ ଆଉ କୌଣସି ଅସୁବିଧା ରହିବ ନାହିଁ ବୋଲି ସେ କହିଛନ୍ତି।