ହାଇଦ୍ରାବାଦ,୨୦।୩: ପଶ୍ଚିମ ଏସିଆରେ ଜାରି ରହିଥିବା ଯୁଦ୍ଧ ଏବଂ ଏହାର ପ୍ରଭାବକୁ ନେଇ AIMIM ମୁଖ୍ୟ ଅସଦୁଦ୍ଦିନ ଓୱାଇସି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ତୀବ୍ର ସମାଲୋଚନା କରିଛନ୍ତି। ଶୁକ୍ରବାର ହାଇଦ୍ରାବାଦରେ ଏକ ଜନସଭାକୁ ସମ୍ବୋଧିତ କରି ସେ କହିଛନ୍ତି ଯେ, ଭାରତ ସରକାରଙ୍କୁ ଆମେରିକା ଏବଂ ଇସ୍ରାଏଲ ପକ୍ଷ ନେବା ପରିବର୍ତ୍ତେ ‘ନ୍ୟୁଟ୍ରାଲ’ ବା ନିରପେକ୍ଷ ରହିବା ଉଚିତ।
ଓୱାଇସି ଦେଶରେ ରୋଷେଇ ଗ୍ୟାସ (LPG)ର କଥିତ ଅଭାବକୁ ନେଇ କେନ୍ଦ୍ର ସରକାରଙ୍କ ‘ଆତ୍ମନିର୍ଭର ଭାରତ’ ନାରା ଉପରେ ପ୍ରଶ୍ନ ଉଠାଇଛନ୍ତି। ତାଙ୍କ କହିବା ଅନୁଯାୟୀ, ଭାରତ ନିଜର ୬୦ ପ୍ରତିଶତ ଗ୍ୟାସ ଆମଦାନୀ ଉପରେ ନିର୍ଭର କରେ। ଏହି ସମସ୍ତ ତେଲ ଓ ଗ୍ୟାସ ହର୍ମୁଜ ପ୍ରଣାଳୀ (Strait of Hormuz) ଦେଇ ଆସିଥାଏ, ଯାହା ବର୍ତ୍ତମାନ ଯୁଦ୍ଧ ଯୋଗୁ ଅଶାନ୍ତ ରହିଛି। ଯଦି ସରକାର ନିରପେକ୍ଷ ରହିଥାନ୍ତେ, ତେବେ ବୋଧହୁଏ ଆମ କଥାର ଗୁରୁତ୍ୱ ରହିଥାନ୍ତା ଏବଂ ଯୋଗାଣ ବାଧାପ୍ରାପ୍ତ ହୋଇନଥାନ୍ତା।
ପ୍ରଧାନମନ୍ତ୍ରୀଙ୍କ ସମ୍ପ୍ରତି ଇସ୍ରାଏଲ ଗସ୍ତକୁ ନେଇ ଓୱାଇସି କହିଛନ୍ତି ଯେ, ଟ୍ରମ୍ପ ଏବଂ ନେତାନ୍ୟାହୁ ମିଶି ଇରାନକୁ ଗାଜା ଭଳି ଧ୍ୱଂସ କରିବାକୁ ଚାହୁଁଛନ୍ତି। ସେ ଚେତାବନୀ ଦେଇଛନ୍ତି ଯେ, “ଯଦି କିଏ ଭାବୁଛି ଏହି ବିନାଶ ଏତିକିରେ ଅଟକିଯିବ, ତେବେ ସେମାନେ ଜାଣିବା ଦରକାର ଯେ ଆଗାମୀ ନମ୍ବର ତୁର୍କୀର ଏବଂ ତା’ପରେ ସମସ୍ତ ଆରବ ଦେଶର ହେବ।
ଭାରତର ଇନ୍ଧନ ସୁରକ୍ଷା ଉପରେ ତଥ୍ୟ ରଖି ଓୱାଇସି କହିଛନ୍ତି,ଆମ ପାଖରେ ମାତ୍ର ୯.୫ ଦିନର ଷ୍ଟ୍ରାଟେଜିକ୍ ପେଟ୍ରୋଲିୟମ ରିଜର୍ଭ ଅଛି। ଯଦି ଅଏଲ ମାର୍କେଟିଂ କମ୍ପାନୀଗୁଡ଼ିକୁ ମିଶାଇ ଦିଆଯାଏ, ତେବେ ଏହା ୭୪ ଦିନ ହେବ। ଏଭଳି ସ୍ଥିତିରେ ଆମେ ବିଦେଶୀ ଶକ୍ତିଙ୍କ ଶିବିରରେ ଛିଡ଼ା ହେବା ଦେଶ ପାଇଁ ବିପଦଜନକ।”
ଦୁବାଇ, ଆବୁଧାବି, କୁଏତ ଏବଂ ସାଉଦି ଆରବ ଭଳି ଦେଶରେ କାମ କରୁଥିବା ଲକ୍ଷ ଲକ୍ଷ ଭାରତୀୟଙ୍କ ଭବିଷ୍ୟତକୁ ନେଇ ସେ ସରକାରଙ୍କୁ ସତର୍କ କରାଇଛନ୍ତି। ସେ କହିଛନ୍ତି ଯେ ଦେଶର ପ୍ରାୟ ୫୦ ପ୍ରତିଶତ ବିଦେଶୀ ମୁଦ୍ରା ସେହିମାନେ ହିଁ ପଠାନ୍ତି। ଯଦି ସେହି ଦେଶଗୁଡ଼ିକର ଅର୍ଥବ୍ୟବସ୍ଥା ଯୁଦ୍ଧ ଯୋଗୁ ଦୁର୍ବଳ ହୁଏ, ତେବେ ଭାରତୀୟମାନେ ବେକାର ହୋଇ ଫେରିବେ।
Dharitri – Odisha’s No.1 Odia Daily