ନୂଆଦିଲ୍ଲୀ,୧୧ା୩: ଲୋକସଭା ବାଚସ୍ପତି ଓମ୍ ବିର୍ଲାଙ୍କ ବିରୋଧରେ ବିରୋଧୀ ଦଳ ପକ୍ଷରୁ ଆଗତ ଅନାସ୍ଥା ପ୍ରସ୍ତାବ ଖାରଜ ହୋଇଯାଇଛି। ପ୍ରବଳ ହଟ୍ଟଗୋଳ ଓ ନାରାବାଜି ମଧ୍ୟରେ ବାଚନିକ ଭୋଟ୍ ଜରିଆରେ ଏହି ପ୍ରସ୍ତାବକୁ ଖାରଜ କରାଯାଇଛି। ସଂଖ୍ୟା ଦୃଷ୍ଟିରୁ ଏନଡିଏ ପକ୍ଷ ଶକ୍ତିଶାଳୀ ଥିବାରୁ ଏହି ପ୍ରସ୍ତାବ କାଟ୍ ହେବା ପୂର୍ବରୁ ଅନୁମାନ କରାଯାଉଥିଲା।
ଅନାସ୍ଥା ପ୍ରସ୍ତାବ ଉପରେ ଆଲୋଚନା ବେଳେ ଗୃହମନ୍ତ୍ରୀ ଅମିତ ଶାହ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ତୀବ୍ର ସମାଲୋଚନା କରିଥିଲେ। ରାହୁଲଙ୍କ ପୂର୍ବର ଆଚରଣ (ଆଖି ମାରିବା ଓ ପ୍ରଧାନମନ୍ତ୍ରୀଙ୍କୁ ଆଲିଙ୍ଗନ କରିବା) କୁ ନେଇ ଶାହ ଦେଇଥିବା ବକ୍ତବ୍ୟକୁ ବିରୋଧୀ ଦଳ “ଅସଂସଦୀୟ” ବୋଲି ଦର୍ଶାଇଛନ୍ତି।
ଗୃହମନ୍ତ୍ରୀଙ୍କ ମନ୍ତବ୍ୟକୁ ନେଇ କଂଗ୍ରେସ ଓ ଅନ୍ୟ ବିରୋଧୀ ଦଳର ସଦସ୍ୟମାନେ “କ୍ଷମା ମାଗ” ସ୍ଲୋଗାନ ଦେଇ ଗୃହ ମଧ୍ୟଭାଗକୁ ଚାଲିଆସିଥିଲେ। ହଟ୍ଟଗୋଳ ମଧ୍ୟରେ ଶାହ କହିଥିଲେ ଯେ, ଯଦି ତାଙ୍କର କୌଣସି ଶବ୍ଦ ସଂସଦୀୟ ମର୍ଯ୍ୟାଦା ବିରୋଧୀ, ତେବେ ବାଚସ୍ପତି ତାହାକୁ ଗୃହ କାର୍ଯ୍ୟବିବରଣୀରୁ ହଟାଇ ପାରିବେ।
ସୂଚନାଯୋଗ୍ୟ ଯେ, ବାଚସ୍ପତିଙ୍କୁ ହଟାଇବା ପାଇଁ ଅତିକମରେ ୨୭୨ ସାଂସଦଙ୍କ ସମର୍ଥନ ଆବଶ୍ୟକ ଥିବାବେଳେ ବିରୋଧୀଙ୍କ ପାଖରେ ମାତ୍ର ୨୩୮ ସାଂସଦ ରହିଛନ୍ତି। ଅନ୍ୟପଟେ ଭାଜପା ନେତୃତ୍ୱାଧୀନ ଏନଡିଏ ପାଖରେ ୨୯୩ ସାଂସଦଙ୍କ ସମର୍ଥନ ରହିଥିବାରୁ ଓମ ବିର୍ଲା ବାଚସ୍ପତି ପଦରେ ବଜାୟ ରହିଛନ୍ତି।