ଭଞ୍ଜନଗର,୩।୨(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ସହର ଇଣ୍ଡିଆନ ଗ୍ୟାସ କାର୍ଯ୍ୟାଳୟ ନିକଟରେ ମଙ୍ଗଳବାର ରାତି ପ୍ରାୟ ୯ ଟା ସମୟରେ ଜଣେ ବ୍ୟବସାୟୀଙ୍କ ସହ ଅନ୍ୟ ଜଣେ ଯୁବକଙ୍କ ମଧ୍ୟରେ କୌଣସି କାରଣରୁ ବଚସା ହୋଇଥିଲା। ଏହାକୁ ନେଇ ଉଭୟଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏହାପରେ ଯୁବକ ହରେକୃଷ୍ଣ ସାଇଁ (୩୮) ବାନ୍ତି କରିବା ସହ ଗୁରୁତର ହୋଇପଡ଼ିଥିଲେ। ଏନେଇ ସେଠାରେ ରହୁଥିବା ଅନ୍ୟ ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ଭଞ୍ଜନଗର ହସ୍ପିଟାଲ ଆଣିଥିଲେ। ମେଡ଼ିକାଲରେ ହରେକୃଷ୍ଣଙ୍କୁ ଡାକ୍ତର ମୃତ୍ୟୁ ଘୋଷଣା କରିଥିଲେ। ବୁଧବାର ତାଙ୍କର ବ୍ୟବଚ୍ଛେଦ ହେବ। ବ୍ୟବଚ୍ଛେଦ ରିପୋର୍ଟ ଆସିବା ପରେ ସେ କେଉଁଭଳି ପରିସ୍ଥିତିରେ ମୃତ୍ୟୁବରଣ କଲେ ସେନେଇ ସଠିକ ଭାବେ ଜଣାପଡ଼ିବ। ହରେକୃଷ୍ଣଙ୍କ ଶରୀରରେ କୌଣସି କ୍ଷତ ନାହିଁ। ଏଥିସହ ଯେଉଁଭଳି ଧସ୍ତାଧସ୍ତି ହୋଇଛି ତାହା ସେତେ ବଡ଼ଧରଣର ନାହିଁ। ତଥାପି ଜଣେ ସୁସ୍ଥ ସବଳ ଯୁବକ ହଠାତ କିଭଳି ମୃତ୍ୟୁବରଣ କଲେ ତାହାକୁ ନେଇ ପୋଲିସ ତଦନ୍ତ ଚଳାଇଛି। ଶବ ବ୍ୟବଚ୍ଛେଦ ରିପୋର୍ଟ ହିଁ କହିବ ହରେକଷ୍ଣ ସାଇଁ କିଭଳି ମୃତ୍ୟୁବରଣ କରିଛନ୍ତି। ହରେକୃଷ୍ଣଙ୍କ ଘର ବଡ଼କୋଦଣ୍ଡା ହୋଇଥିବା ବେଳେ ସେ ଭଞ୍ଜନଗରରେ ବ୍ୟବସାୟ କରନ୍ତି।