ନୂଆଦିଲ୍ଲୀ,୧।୧: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଆସନ୍ତା ଜାନୁଆରୀ ୧୧ ତାରିଖରୁ ଆରମ୍ଭ ହେବ। ଏହି ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ପାଇଁ ଭାରତୀୟ ଦଳ ଚୟନକୁ ନେଇ ଚର୍ଚ୍ଚା ଜୋର ଧରିଛି। ଅଜିତ ଅଗରକରଙ୍କ ନେତୃତ୍ୱାଧୀନ ଚୟନ କମିଟି ଏହି ସିରିଜ୍ ପାଇଁ ଶୀଘ୍ର ଦଳ ଘୋଷଣା କରିପାରନ୍ତି। ତେବେ ଏହି ସିରିଜ ପାଇଁ ଷ୍ଟାର୍ ୱିକେଟ୍ କିପର ବ୍ୟାଟର ଋଷଭ ପନ୍ତଙ୍କୁ ନେଇ ସସପେନ୍ସ ଜାରି ରହିଥିବା ବେଳେ ଅଭିଜ୍ଞ ପେସର ମହମ୍ମଦ ସାମୀଙ୍କ ପ୍ରତ୍ୟାବର୍ତ୍ତନ ହୋଇପାରେ।
ଚାଲିଥିବା ବିଜୟ ହଜାରେ ଟ୍ରଫିରେ ଋଷଭ ପନ୍ତଙ୍କ ପ୍ରଦର୍ଶନ ସେତେଟା ଆଖିଦୃଶିଆ ହୋଇନାହିଁ। ୪ଟି ମ୍ୟାଚ୍ରୁ ସେ ମାତ୍ର ଗୋଟିଏ ଅର୍ଦ୍ଧଶତକ ହାସଲ କରିଛନ୍ତି। ଗତ ୧୮ ମାସ ମଧ୍ୟରେ ସେ ଗୋଟିଏ ବି ଦିନିକିଆ ମ୍ୟାଚ୍ ଖେଳିନାହାନ୍ତି। ଏଭଳି ପରିସ୍ଥିତିରେ ଟିମ୍ ମ୍ୟାନେଜମେଣ୍ଟ ତାଙ୍କର ‘ହାଇ-ରିସ୍କ’ ବ୍ୟାଟିଂ ଶୈଳୀକୁ ନେଇ ସନ୍ତୁଷ୍ଟ ନଥିବା ଚର୍ଚ୍ଚା ହେଉଛି। ଯଦି ପନ୍ତଙ୍କୁ ଦଳରୁ ବାଦ୍ ଦିଆଯାଏ, ତେବେ ଏହା ତାଙ୍କ ପାଇଁ ଏକ ବଡ଼ ଝଟ୍କା ହୋଇପାରେ।
ପନ୍ତଙ୍କ ଫର୍ମ ଖରାପ ଥିବା ବେଳେ ଇଶାନ କିଷାନ ଏବଂ ଧ୍ରୁବ ଜୁରେଲ ଚମତ୍କାର ଫର୍ମରେ ଅଛନ୍ତି। ବିଜୟ ହଜାରେ ଟ୍ରଫିରେ ଇଶାନ କିଷାନ ମାତ୍ର ୩୩ ବଲ୍ରେ ଶତକ ହାସଲ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ସେହିପରି ଧ୍ରୁବ ଜୁରେଲ ମଧ୍ୟ ଉତ୍ତର ପ୍ରଦେଶ ପାଇଁ ଏକ ଦମଦାର ଶତକ ହାସଲ କରି ଦଳରେ ନିଜର ସ୍ଥାନ ପାଇଁ ଦୃଢ଼ ଦାବିଦାର ହୋଇଛନ୍ତି। କେ.ଏଲ୍. ରାହୁଲ ପ୍ରଥମ ପସନ୍ଦର ୱିକେଟ୍ କିପର ଥିବା ବେଳେ ଦ୍ୱିତୀୟ କିପର ଭାବେ କିଷାନଙ୍କୁ ସୁଯୋଗ ମିଳିପାରେ।
ଅଭିଜ୍ଞ ଦ୍ରୁତ ବୋଲର ମହମ୍ମଦ ସାମୀ ଦୀର୍ଘ ଦିନ ପରେ ଜାତୀୟ ଦଳକୁ ଫେରିବା ସମ୍ଭାବନା ଅଛି। ଚାମ୍ପିଅନ୍ସ ଟ୍ରଫି ପରଠାରୁ ସେ ଦଳ ବାହାରେ ଥିଲେ, କିନ୍ତୁ ବିଜୟ ହଜାରେ ଟ୍ରଫିରେ ୮ଟି ୱିକେଟ୍ ନେଇ ସେ ନିଜର ଫିଟନେସ୍ ଓ ଲୟ ପ୍ରମାଣିତ କରିଛନ୍ତି। ଅନ୍ୟପଟେ, ଜସପ୍ରୀତ ବୁମରା ଏବଂ ହାର୍ଦ୍ଦିକ ପାଣ୍ଡ୍ୟାଙ୍କୁ ଏହି ସିରିଜ୍ରୁ ବିଶ୍ରାମ ଦିଆଯାଇପାରେ। ଅର୍ଶଦୀପ ସିଂ ଏବଂ ହର୍ଷିତ ରାଣାଙ୍କୁ ପୁଣି ସୁଯୋଗ ମିଳିବା ସମ୍ଭାବନା ରହିଛି।
ଶୁଭମନ ଗିଲ୍ ଦଳକୁ ଫେରୁଥିବା ବେଳେ ରୋହିତ ଶର୍ମା ଏବଂ ଯଶସ୍ୱୀ ଜୈସୱାଲଙ୍କ ଉପସ୍ଥିତିରେ ଟପ୍ ଅର୍ଡର ବେଶ୍ ମଜବୁତ ଜଣାପଡ଼ୁଛି। ଦେବଦତ୍ତ ପାଡିକଲ ଘରୋଇ କ୍ରିକେଟରେ ଲଗାତାର ୩ଟି ଶତକ ହାସଲ କରିଥିଲେ ମଧ୍ୟ ଦଳରେ ତାଙ୍କ ପାଇଁ ସ୍ଥାନ ପାଇବା କଷ୍ଟକର ହୋଇପାରେ। ଶ୍ରେୟସ ଆୟର ଆହତ ଥିବାରୁ ଋତୁରାଜ ଗାଇକୱାଡ୍ ଚତୁର୍ଥ ସ୍ଥାନରେ ଖେଳିବା ଏକପ୍ରକାର ନିଶ୍ଚିତ।