ନୂଆଦିଲ୍ଲୀ,୧୮ା୭: କଭାରତୀୟ ମାନକ ବ୍ୟୁରୋ (BIS) ଶୁକ୍ରବାର ଦିନ ୯ କ୍ୟାରେଟ୍ ସୁନାକୁ ବାଧ୍ୟତାମୂଳକ ହଲମାର୍କିଂ ଶ୍ରେଣୀରେ ଅନ୍ତର୍ଭୁକ୍ତ କରିଛି। ଏହି ନୂଆ ନିୟମ ଚଳିତ ଜୁଲାଇ ମାସରୁ ଲାଗୁ ହୋଇଛି। ହଲମାର୍କିଂ ସୁନାର ଶୁଦ୍ଧତାର ଗ୍ୟାରେଣ୍ଟି ଦେଇଥାଏ। ନୂଆ ଘୋଷଣା ଅନୁଯାୟୀ, ୯ କ୍ୟାରେଟ୍ ଅଳଙ୍କାର ଉପରେ ମଧ୍ୟ ହଲମାର୍କ କରିବା ବାଧ୍ୟତାମୂଳକ ହେବ। ଏହା ପୂର୍ବରୁ ୨୪ କ୍ୟାରେଟ୍, ୨୩ କ୍ୟାରେଟ୍, ୨୨ କ୍ୟାରେଟ୍, ୨୦ କ୍ୟାରେଟ୍, ୧୮ କ୍ୟାରେଟ୍ ଏବଂ ୧୪ କ୍ୟାରେଟ୍ ଅଳଙ୍କାର ଉପରେ ହିଁ ହଲମାର୍କ କରାଯାଉଥିଲା।
ଅଲ୍ ଇଣ୍ଡିଆ ଜେମ୍ ଆଣ୍ଡ ଜୁଏଲରୀ ଡୋମେଷ୍ଟିକ୍ କାଉନସିଲ୍ ଏକ୍ସରେ ପ୍ରକାଶ କରିଛି ଯେ, ଏବେ ସମସ୍ତ ଜୁଏଲର୍ସ ଏବଂ ହଲମାର୍କିଂ ସେଣ୍ଟରମାନେ BISର ନୂଆ ନିୟମ ପାଳନ କରିବାକୁ ପଡ଼ିବ। ନୂଆ ନିୟମ ଅନୁଯାୟୀ, ୯ କ୍ୟାରେଟ୍ ସୁନା (୩୭୫ ପିପିଟି) ଏବେ ବାଧ୍ୟତାମୂଳକ ହଲମାର୍କିଂ ଅଧୀନରେ ଆସିଛି। ପୂର୍ବରୁ ୯ କ୍ୟାରେଟ୍ ସୁନା ପାଇଁ ଏହା ବାଧ୍ୟତାମୂଳକ ନଥିଲା, କିନ୍ତୁ ଏବେ ଗ୍ରାହକମାନଙ୍କୁ ସୁନାର ଶୁଦ୍ଧତା ବିଷୟରେ ସଠିକ୍ ସୂଚନା ଦେବା ପାଇଁ ଏହାକୁ ହଲମାର୍କ କରିବା ଜରୁରୀ।
ସୁନା ଅଳଙ୍କାର କିଣିବା ହେବ ସହଜ
ସେନକୋ ଗୋଲ୍ଡ ଲିମିଟେଡ୍ର ଏମଡି ତଥା ସିଇଓ ସୁବଙ୍କର ସେନ କହିଛନ୍ତି ଯେ, ୯ କ୍ୟାରେଟ୍ ସୁନାର ହଲମାର୍କିଂ ସରକାରଙ୍କ ଏକ ଉତ୍ତମ ପଦକ୍ଷେପ। ଏହା ଦ୍ୱାରା ସୁନା ଅଳଙ୍କାର ଶସ୍ତା ଏବଂ କିଣିବାରେ ସହଜ ହେବ, ଖାସକରି ଯେତେବେଳେ ସୁନାର ମୂଲ୍ୟ ବହୁତ ଅଧିକ ରହୁଛି। ୯ କ୍ୟାରେଟ୍ ସୁନାରେ ଆଧୁନିକ ଏବଂ ସ୍ମାର୍ଟ ଡିଜାଇନ୍ ସହଜରେ ତିଆରି କରାଯାଇପାରିବ ଏବଂ କମ୍ପାନୀମାନେ ନୂଆ ଡିଜାଇନ୍ ଓ ଷ୍ଟାଇଲରେ ନୂତନତ୍ୱ ଆଣିପାରିବେ। ଏହା ଭବିଷ୍ୟତରେ ରପ୍ତାନି ବୃଦ୍ଧିରେ ମଧ୍ୟ ସହାୟକ ହେବ। BIS ମାନକରେ କିଛି ସଂଜ୍ଞା ଏବଂ ନିୟମ ମଧ୍ୟ ପରିବର୍ତ୍ତନ କରାଯାଇଛି।
ସୁନା ଘଣ୍ଟା ଓ ପେନ୍ ପାଇଁ ଏହି ନିୟମ ଲାଗୁ ନୁହେଁ
ସୁନାର ଘଣ୍ଟା ଏବଂ ପେନ୍ ପାଇଁ ଏହି ନିୟମ ବାଧ୍ୟତାମୂଳକ ନୁହେଁ। ନିୟମ ଅନୁଯାୟୀ, ସୁନାର ମୁଦ୍ରା କେବଳ ୨୪ କ୍ୟାରେଟ୍ ଶୁଦ୍ଧ ସୁନାରୁ ତିଆରି ହେବ, ଯାହା କେବଳ ସରକାରୀ ଟଙ୍କାଶାଳା କିମ୍ବା ରିଫାଇନାରୀ ଦ୍ୱାରା ନିର୍ମିତ ହେବ ଏବଂ ଯାହାର ମୁଦ୍ରା ଭାବେ କୌଣସି ମୂଲ୍ୟ ନ ଥିବ। BIS ଆକ୍ଟ ୨୦୧୬ ଅନୁଯାୟୀ, ହଲମାର୍କିଂ ଅଳଙ୍କାର ଏବଂ ବାସନରେ ମୂଲ୍ୟବାନ ଧାତୁର ପରିମାଣକୁ ନିଶ୍ଚିତ କରେ।