ଲକ୍ଷ୍ନୌ,୩୦।୧: ଉତ୍ତରପ୍ରଦେଶର ବୁଲନ୍ଦସହର ଜିଲାରୁ ସାମ୍ନାକୁ ଆସିଛି ଛାତିଥରା ଘଟଣା । ପ୍ରସବ ସମୟରେ ଛୁଆର ମୁଣ୍ଡ କଟିଯାଇଛି । ଜଣେ ଆଶାକର୍ମୀ ବଳପୂର୍ବକ ପ୍ରସବ କରାଯାଇଥିବା ନେଇ ଅଭିଯୋଗ ହୋଇଛି । ଅଭିଯୁକ୍ତମାନେ ଫେରାର ରହିଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି ।
ରୁଥା ଗ୍ରାମର ଜଣେ ବାସିନ୍ଦା ଝାମ୍ମାନ ପୋଲିସକୁ ଦେଇଥିବା ଅଭିଯୋଗରେ କହିଛନ୍ତି ଯେ, ଜାନୁଆରୀ ୨୫ ସକାଳ ପ୍ରାୟ ୯ଟାରେ ତାଙ୍କ ଗର୍ଭବତୀ ପତ୍ନୀ ରାଜକୁମାରୀ ପ୍ରସବ ଯନ୍ତ୍ରଣା ଅନୁଭବ କରିଥିଲେ ଏବଂ ସେ ଗ୍ରାମର ଜଣେ ଆଶାକର୍ମୀ ରୂପାବତୀଙ୍କୁ ଜଣାଇଥିଲେ । ସରକାରୀ ହସ୍ପିଟାଲ ଆମ୍ବୁଲାନ୍ସକୁ ଡାକିବା ପରିବର୍ତ୍ତେ ଆଶାକର୍ମୀ ଜାହାଙ୍ଗୀରାବାଦର ନାଇ ବସ୍ତିର ଜଣେ ଧାତ୍ରୀ (‘ଦାଇ’) ଜମିଲାଙ୍କୁ ଡାକିଥିଲେ। ଜଟିଳତା ସତ୍ତ୍ୱେ ରୂପାବତୀ ଏବଂ ଜମିଲା ମିଶି ବଳପୂର୍ବକ ଶିଶୁକୁ ପ୍ରସବ କରିବାକୁ ଚେଷ୍ଟା କରିଥିଲେ।
ଯେତେବେଳେ ସେମାନେ ବିଫଳ ହେଲେ, ସେମାନେ ଦାବି କଲେ ଯେ ଶିଶୁଟି ବ୍ରିଚ୍ ପୋଜିସନରେ ଥିଲା ଏବଂ ସେମାନଙ୍କ ପ୍ରୟାସ ସମୟରେ ଜୀବିତ ନବଜାତ ଶିଶୁର ବେକ କାଟି ଦେଇଥିଲେ । ଶିଶୁର ଅଧିକାଂଶ ଶରୀର ବାହାରକୁ ବାହାରିଯାଇଥିବା ବେଳେ ଗୁପ୍ତାଙ୍ଗରେ ମୁଣ୍ଡ ରହିଯାଇଥିଲା ।
ଆଶାକର୍ମୀ ଏବଂ ଜମିଲା ମହିଳାଙ୍କୁ ଗୁରୁତର ଅବସ୍ଥାରେ ଛାଡି ଘଟଣାସ୍ଥଳରୁ ପଳାଇ ଯାଇଥିବା ଅଭିଯୋଗ ହୋଇଛି । ପରେ ପୀଡିତାଙ୍କୁ ବୁଲନ୍ଦସହରର ଏକ ହସ୍ପିଟାଲକୁ ନିଆଯାଇଥିଲା, ସେଠାରୁ ତାଙ୍କୁ ମିରଟକୁ ରେଫର କରାଯାଇଥିଲା । ସେଠାରେ ତାଙ୍କର ଚିକିତ୍ସା ଚାଲିଥିବା ନେଇ ପୋଲିସ ପକ୍ଷରୁ କୁହାଯାଇଛି ।