ଅହମଦାବାଦ,୭।୩: ଟୁର୍ନାମେଣ୍ଟ ଜିତିବା ପାଇଁ ଆମେ ଫେଭରାଇଟ୍ ଦଳ ନୁହେଁ। କିନ୍ତୁ ଥରେ ଟ୍ରଫି ଉଠାଇବା ପାଇଁ ଯଦି ଆମକୁ କିଛି ହୃଦୟ ଭାଙ୍ଗିବାକୁ ପଡ଼େ, ତେବେ ଆମେ ମନା କରିବୁ ନାହିଁ। ଫାଇନାଲ ମ୍ୟାଚ୍ ପୂର୍ବରୁ ଆୟୋଜିତ ଖବରଦାତା ସମ୍ମିଳନୀରେ ନ୍ୟୁଜିଲାଣ୍ଡ ଦଳର ଅଧିନାୟକ ମିଚେଲ ସାଣ୍ଟନର କହିଛନ୍ତି।
ଇଭେଣ୍ଟକୁ ଆୟୋଜନ କରିବା ସହ ଟାଇଟଲକୁ ଡିଫେଣ୍ଡ ଓ ଦେଶବାସୀଙ୍କ ଆଶା ଏବଂ ଆକାଂକ୍ଷାର ବୋଝ ଭାରତୀୟ ଦଳ ଉପରେ ପ୍ରବଳ ଚାପ ପକାଇବ। ଏହା ଆୟୋଜକ ଦଳକୁ ଫାଇଦା ପ୍ରଦାନ କରୁଥିବା ବେଳେ ଏହା ନ୍ୟୁଜିଲାଣ୍ଡ ପାଇଁ ଏକ ସୁଯୋଗ।
ଲକ୍ଷ୍ୟ ହେଉଛି, ନରେନ୍ଦ୍ର ମୋଦି ଷ୍ଟାଡିୟମରେ ଉପସ୍ଥିତ ଦର୍ଶକଙ୍କୁ ଚୁପ କରିବା। ଟି୨୦ କ୍ରିକେଟରେ ସମୟ କ୍ରମେ ଅନେକ ପରିବର୍ତ୍ତନ ଆସୁଛି। ପୂରା ଟୁର୍ନାମେଣ୍ଟରେ ଅନେକ ଦଳ ସମାନ ପରିସ୍ଥିତିରେ ଥିଲେ ଏବଂ ମ୍ୟାଚ୍ର କିଛି ଛୋଟ ଛୋଟ ମୁହୂର୍ତ୍ତରେ ଘଟୁଥିବା ଘଟଣା ଫଳାଫଳ ପରିବର୍ତ୍ତନ କରିଥିଲା। ଭାରତ ବିପକ୍ଷ ସେମିଫାଇନାଲରେ ଇଂଲଣ୍ଡ ବିଜୟ ଲକ୍ଷ୍ୟର ଖୁବ ନିକଟରେ ପହଞ୍ଚି ଯାଇଥିଲା। ଦକ୍ଷିଣ ଆଫ୍ରିକା ମଧ୍ୟ ପୂରା ଟୁର୍ନାମେଣ୍ଟରେ ଭଲ କ୍ରିକେଟ ଖେଳିଥିଲା। ଏଣୁ ଛୋଟ ଛୋଟ ତ୍ରୁଟି ତୁମକୁ ମ୍ୟାଚ୍ରୁ ବିଦା କରିପାରେ। ଯଦି ଆମେ ଆମର ଶ୍ରେଷ୍ଠ ପ୍ରଦର୍ଶନ କରିବା, ତେବେ ଆମେ ଆଉ ଏକ ବଡ଼ ଦଳକୁ ଅପସେଟ୍ କରିପାରିବୁ।
ମୋ ମତରେ ଭାରତୀୟ ଦଳ ଉପରେ ଘରୋଇ ପରିବେଶରେ ବିଶ୍ୱକପ୍ ଜିତିବାର ଖୁବ ଚାପ ରହିଛି। ଯଦି ଆମେ ଏହି ମ୍ୟାଚ୍ ଜିତିବାରେ ବିଫଳ ହେଉ, ତେବେ ଘରୋଇ ଦଳ ଲାଗି ବିଶ୍ୱକପ୍ ଜିତିବା ଖୁବ ସୁଖଦ ହେବ। ଏଣୁ ଆମେ ସେମାନଙ୍କ ଉପରେ ଆହୁରି ଅଧିକ ଚାପ ପକାଇବାକୁ ଉଦ୍ୟମ କରିବୁ ବୋଲି ସାଣ୍ଟନର କହିଛନ୍ତି।