ମୁମ୍ବାଇ,୧୬।୪ : ଏନସିପିରେ ବିବାଦ ଦେଖାଦେଇଥିବା ବେଳେ ଶିବସେନା (ୟୁବିଟି) ନେତା ସଞ୍ଜୟ ରାଉତଙ୍କ ଏକ ବଡ ବିବୃତ୍ତି ସାମ୍ନାକୁ ଆସିଛି। ସେ କହିଛନ୍ତି। ଶରଦ ପାୱାର ଉଦ୍ଧବ ଠାକରେଙ୍କୁ ଆଶ୍ୱାସନା ଦେଇଛନ୍ତିୁ ହୁଏତ କିଛି କିଛି ନେତା ଦଳ ଛାଡିଲେ ମଧ୍ୟ ଏନସିପି ଭାଜପା ସହ ହାତ ମିଳାଇବ ନାହିଁ। ଶିବସେନା ମୁଖପତ୍ର ସାମାନାରେ ପ୍ରକାଶିତ ତାଙ୍କର ସାପ୍ତାହିକ ସ୍ତମ୍ଭ ରୋକଠୋକରେ ରାଉତ ଲେଖିଛନ୍ତି, ଉଦ୍ଧବ ଏବଂ ପାୱାର ମଙ୍ଗଳବାର ଦିନ ପରସ୍ପରକୁ ସାକ୍ଷାତ କରିଥିଲେ।
ପାୱାର କହିଛନ୍ତି, ଦଳ ଛାଡିବାକୁ କେହି ଚାହୁଁ ନାହାଁନ୍ତି କିନ୍ତୁ ସେମାନଙ୍କ ପରିବାରକୁ ଟାର୍ଗେଟ କରାଯାଉଛି। ରାଉତ କହିଛନ୍ତି, ମହାରାଷ୍ଟ୍ରର ଲୋକମାନେ ବର୍ତ୍ତମାନର ସରକାରଙ୍କ ଉପରେ ଅସନ୍ତୁଷ୍ଟ ଅଛନ୍ତି। ଭଜପା ସହିତ ଯାଉଥିବା ରାଜନେତାମାନଙ୍କର ରାଜନୈତିକ ମୃତ୍ୟୁ ଘଟିବ ବୋଲି ଉଭୟ ଉଦ୍ଧବ ଏବଂ ପାଓ୍ବାର କହିଛନ୍ତି। ପାୱାର ଉଠାଇଥିବା ଏକ ପ୍ରସଙ୍ଗକୁ ନେଇ ରାଉତ କହିଛନ୍ତି। ଏନସିପି ମୁଖ୍ୟ କହିଛନ୍ତି, ଯେଉଁମାନେ ଭାଜପାକୁ ଭୟ କରି ଦଳକୁ ବିଦାୟ ଦେଇଛନ୍ତି ମୁଁ ସେମାନଙ୍କୁ କହିବାକୁ ଚାହେଁ, ଯଦି ଆପଣ ଭାଜପାରେ ଯୋଗ ଦିଅନ୍ତି ତେବେ ଆପଣଙ୍କ ଫାଇଲ ଆଲମୀରାକୁ ଚାଲିଯିବ। କିନ୍ତୁ ଏହି ଇଡି-ସିବିଆଇ ଫାଇଲଗୁଡିକ କେବେ ବନ୍ଦ ହେବ ନାହିଁ।
ଏକ ନ୍ୟୁଜ ଏଜେନ୍ସି ଖବର ଅନୁଯାୟୀ ସଞ୍ଜୟ ରାଉତ କହିଛନ୍ତି, ଭାଜପା ସିଜିନ ୨ରେ କାମ କରୁଛି। ସିଜିନ-୧ରେ ଶିବସେନାରେ ଫାଟ ସୃଷ୍ଟି କରାଯାଇ ଏହାର ବିଭାଜନ ହୋଇଥିଲା। ବର୍ତ୍ତମାନ ସିଜିନ-୨ରେ ଏନସିପିକୁ ଭାଙ୍ଗିବାକୁ ପ୍ରସ୍ତୁତି ଚାଲିଛି। କିଛି ଦଳ ବିଶ୍ୱାସ କରନ୍ତି, କୌଣସି ଦଳ ଭାଙ୍ଗିବା ହେଉଛି ଗଣତନ୍ତ୍ର। ଭାରତର ଗଣତନ୍ତ୍ର କିପରି ଚୂର୍ଣ୍ଣ ହେଉଛି ତାହା ଆମେ ପ୍ରତିଦିନ ଦେଖୁଛୁ। ପୂର୍ବରୁ ଭୋଟରଙ୍କୁ କିଣାଯାଉଥିଲା କିନ୍ତୁ ବର୍ତ୍ତମାନ ବିଧାୟକ ଏବଂ ଏମପିଙ୍କୁ କିଣାଯାଉଛି।