ଭବାନୀପାଟଣା,୧୦।୧(ଉତ୍ତମ କୁମାର ଦାଶ): ଗୁଜୁରାଟର ଅହମଦାବାଦ କୋବାସ୍ଥିତ ପ୍ରେକ୍ଷାଧ୍ୟାନ ଏକାଡେମୀରେ ଡିସେମ୍ବର ଶେଷରେ ୪୦ତମ ଜାତୀୟ ଆଇଟିଏଫ ତାଏକୋଣ୍ଡୋ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଗୁଜରାଟ ତାଏକୋଣ୍ଡୋ ଆସୋସିଏଶନ ଅଫ ଇଣ୍ଡିଆ ଏବଂ ତାଏକୋଣ୍ଡୋ ଫାଇଟର୍ସ ଆସୋସିଏଶନ ଅଫ ଆନୁକୂଲ୍ୟରେ ଅନୁଷ୍ଠିତ ଜାତୀୟ ପ୍ରତିଯୋଗିତାରେ ଦେଶବ୍ୟାପି ୬୭୧ ପ୍ରତିଯୋଗୀ ଭାଗ ନେଇଥିବା ବେଳେ ଓଡିଶାରୁ ମୋଟ ୨୮ଜଣ ପ୍ରତିଯୋଗୀ ଅଂଶ ଗ୍ରହଣ କରିଥିଲେ। ସେଥିମଧ୍ୟରୁ କଳାହାଣ୍ଡି ତାଏକୋଣ୍ଡୋ ଏସୋସିଏଶନର ମୁଖ୍ୟ ଶେଖ ମୁନାୱାରଙ୍କ ନେତୃତ୍ୱରେ କଳାହାଣ୍ଡିରୁ ୧୦ଜଣ ପ୍ରତିଯୋଗୀ ଏଥିରେ ସାମିଲ ହୋଇଥିଲେ। ପ୍ରତିଯୋଗିତାରେ ଓଡ଼ିଶାକୁ ୧୮ଟି ପଦକ ମିଳିଥିବା ବେଳେ କଳାହାଣ୍ଡିର ୫ଜଣ ପ୍ରତିଯୋଗୀ ଏଥିରେ ସଫଳତା ହାସଲ କରି ପଦକ ଲାଭ କରିଛନ୍ତି।
ପଦକ ତାଲିକାରେ ବ୍ୟକ୍ତିଗତ ତୁଲ ବା ପାର୍ଟନ କଲର ବେଲ୍ଟରେ ଦୟା ରାଉତ ରୌପ୍ୟ ପଦକ ହାସଲ କରିଥିବା ବେଳେ ବ୍ୟକ୍ତିଗତ ବ୍ଲାକ୍ବେଲ୍ଟ ତୁଲରେ ୧ମ ଡାନୁର ୩ୟ ଡାନୁରରେ ଶେଖ ମୁନୱର୍ ବ୍ରୋଞ୍ଜ ପଦକ, ବ୍ୟକ୍ତିଗତ ସ୍କାରିଙ୍ଗ ବାଳିକା ବିଭାଗ ୧୧-୧୩ ବର୍ଷ ବୟସ ବର୍ଗରେ ରିଧୂ ସାହୁ ବ୍ରୋଞ୍ଜ ପଦକ, ବାଳକ ବର୍ଗରେ ୮-୧୦ ବର୍ଗ ଏବଂ ୪୦-୪୫ କେଜି ବର୍ଗରେ ସୋମନାଥ ମହାପାତ୍ର ବ୍ରୋଞ୍ଜ ପଦକ ଏବଂ ବ୍ଲାକ୍ବେଲ୍ଟ ୧ମ ଡାନୁର୍ ୩ୟ ଡାନ ଏବଂ ୩୫ ବର୍ଷ ଊର୍ଦ୍ଧ୍ୱ ବର୍ଗରେ ଶେଖ ମୁନାୱର ବ୍ରୋଞ୍ଜ ପଦକ ଲାଭ କରି ଏହି ସଫଳତା ହାସଲ କରିଛନ୍ତି।
କେବଳ ସେତିକି ନୁହେଁ ଏହି ପ୍ରତିଯୋଗିତାରେ ଭାଗ ନେଇ କଳାହାଣ୍ଡିର ପ୍ରଥମ ମହିଳା ତାଏକୋଣ୍ଡୋ ବ୍ଲାକବେଲ୍ଟ ପ୍ରଥମ ଡାନ୍ ହାସଲ କରିଛନ୍ତି ରେଶମା ବେଗମ। ଜଣେ ଗୃହିଣୀ ଭାବେ ସୂଚାରୁ ରୂପେ ଦାୟିତ୍ୱ ତୁଲାଇବା ସହିତ ନିଜର କଠିନ ପରିଶ୍ରମ ଓ ଅଧ୍ୟବସାୟ ବଳରେ ସେ ଏହି ସଫଳତା ହାସଲ କରିଛନ୍ତି।
ତାଏକୋଣ୍ଡୋ ଆସୋସିଏଶନ ଅଫ ଇଣ୍ଡିଆର ସଭାପତି ତଥା ଗ୍ରାଣ୍ଡମାଷ୍ଟର ବି. ରାଜେନ୍ଦ୍ରନଙ୍କଠାରୁ ସେ ପ୍ରଥମ ଡାନ ବ୍ଲାକବେଲ୍ଟ ସାର୍ଟିଫିକେଟ ଗ୍ରହଣ କରିଥିଲେ। କୋଚ ଶେଖ ମୁନାୱାରଙ୍କ ସହିତ ମାଷ୍ଟର ରଚନା ଚୌରାସିଆ, ମାଷ୍ଟର ନରେନ୍ଦ୍ର କୌଶଳ କୁମାର, ନିରଜ କୁମାରଙ୍କଠାରୁ ସେ ପ୍ରଶିକ୍ଷଣ ପ୍ରାପ୍ତ । ଏହାକୁ ନେଇ ଜିଲାରେ ଖୁସିର ଲହରୀ ଖେଳିଯାଇଛି।
ଏହି ପରିପ୍ରେକ୍ଷୀରେ ଶନିବାର ଭବାନୀପାଟଣା ସ୍ଥିତ ଭାଗିରଥୀ ଇନ୍ ସମ୍ମିଳନୀ କକ୍ଷରେ କୃତୀ ପ୍ରତିଯୋଗୀମାନଙ୍କୁ ସମ୍ମାନିତ କରାଯାଇଛି। ଆୟୋଜିତ ସମ୍ବର୍ଦ୍ଧନା ପର୍ବ ଓ ଖବରଦାତା ସମ୍ମିଳନୀରେ ମୁଖ୍ୟ ଅତିଥି ଭାବେ ଶିକ୍ଷାବିତ୍ ଡ. ଅଜୟ କୁମାର ମିଶ୍ର, ସମ୍ମାନିତ ଅତିଥି ଭାବେ ବରିଷ୍ଠ ଖବରଦାତା ଉମାଶଙ୍କର କର, ସାମାଜିକ କର୍ମୀ ଧର୍ମେନ୍ଦ୍ର ନାଏକ, ସରୋଜ ବାଗ, ରେଶମା ବେଗମ୍ ପ୍ରମୁଖ ମଞ୍ଚାସୀନ ଥିଲେ। ଶେଖ ମୁନାୱାର ସ୍ବାଗତ ଭାଷଣ ସହିତ ସଭା ପରିଚାଳନା ଓ ଧନ୍ୟବାଦ ଅର୍ପଣ କରିଥିଲେ।