ଭଞ୍ଜନଗର,୧୪ା୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ସିଭିଲ କୋର୍ଟ ପ୍ରାଙ୍ଗଣରେ ତାଲୁକ ଆଇନ ସେବା କମିଟି ଭଞ୍ଜନଗରଙ୍କ ପକ୍ଷରୁ ୨୦୨୬ ବର୍ଷର ପ୍ରଥମ ଜାତୀୟ ଲୋକ ଅଦାଲତ ଶନିବାର ଅନୁଷ୍ଠିତ ହୋଇଥିଲା। ଏଥିରେ ଭଞ୍ଜନଗର ଅତିରିକ୍ତ ଜିଲା ଓ ଦୌରାଜଜ ତଥା ତାଲୁକ ଆଇନ ସେବା କମିଟିର ଅଧ୍ୟକ୍ଷ ଶେଖ୍ ମହମ୍ମଦ କଏସ ଅଧ୍ୟକ୍ଷତା କରିଥିଲେ। ସିନିୟର ସିଭିଲ ଜଜ୍ ଦେବାଶିଷ ବିଷୋୟୀ, ଏସ୍ଡିଜେଏମ୍ ସୌମ୍ୟରଞ୍ଜନ ପୃଷ୍ଟି ଓ ଜେଏମ୍ଏଫ୍ସି ଭିୟେନା ନାୟକ ଉପସ୍ଥିତ ରହି ବିଭିନ୍ନ ବେଞ୍ଚ ମାଧ୍ୟମରେ ମାମଲାଗୁଡ଼ିକର ସମାଧାନ କରିଥିଲେ।
ଲୋକ ଅଦାଲତରେ ମୋଟ୍ ୩୬୭ଟି ମାମଲା ଗ୍ରହଣ କରାଯାଇଥିଲା। ସେଥିରୁ ୨୪୬ଟି ମାମଲାର ସମାଧାନ ହୋଇଥିଲା। ଏହି ସମସ୍ତ ମାମଲାରେ ମୋଟ୍ ୩୪,୭୫,୯୬୫ ଟଙ୍କାର ସମ୍ମତି ରାଶି ନିର୍ଦ୍ଧାରିତ ହୋଇଥିଲା।
ମାମଲା ଭିତ୍ତିକ ତଥ୍ୟ ଅନୁସାରେ ଏନ୍ଆଇ ଆକ୍ଟ (ଧାରା ୧୩୮) ସମ୍ବନ୍ଧୀୟ ୨ଟି ମାମଲାର ସମାଧାନ ହୋଇ ୧୨,୦୭,୬୯୮ ଟଙ୍କା ଆଦାୟ ହୋଇଥିଲା। ମନି ରିକଭରି ମାମଲାରେ ୪ଟି ମାମଲା ସମାଧାନ ହୋଇ ୫,୬୮,୨୬୭ ଟଙ୍କା ଆଦାୟ ହୋଇଥିଲା। ମୋଟର ଦୁର୍ଘଟଣା କ୍ଲେମ ମାମଲାରେ ୨ଟି ମାମଲାର ସମାଧାନ ହୋଇ ୧୨,୦୦,୦୦୦ ଟଙ୍କା କ୍ଷତିପୂରଣ ହିତାଧିକାରୀଙ୍କୁ ଦିଆଯାଇଥିଲା।
ପାରିବାରିକ ବିବାଦ ସମ୍ବନ୍ଧୀୟ ୧ଟି ମାମଲା ସମାଧାନ ହୋଇଥିଲା। ଅନ୍ୟାନ୍ୟ ସିଭିଲ ମାମଲା ୭ଟି ର ସମାଧାନ ହୋଇ ୫,୦୦,୦୦୦ ଟଙ୍କା ସମ୍ମତି ହୋଇଥିଲା। ଅନ୍ୟାନ୍ୟ ଆପରାଧିକ ମାମଲା ୨୩୦ଟି ମଧ୍ୟ ସମାଧାନ ହୋଇଥିଲା। କାର୍ଯ୍ୟକ୍ରମକୁ ସଫଳ କରିବାରେ ଭଞ୍ଜନଗର ବାର୍ ଆସୋସିଏଶନ ସଭାପତି ଲକ୍ଷ୍ମୀକାନ୍ତ ମହାପାତ୍ର, ସମ୍ପାଦକ ଜ୍ୟୋତିରାଜ ପତି, ଉପଖଣ୍ଡ ସୂଚନା ଲୋକ ସମ୍ପର୍କ ସୂଚନା ଅଧିକାରୀ ସନ୍ତୋଷ ନାୟକ ସହିତ ଅନେକ ଆଇନଜୀବୀ ଓ କର୍ମଚାରୀମାନେ ସହଯୋଗ କରିଥିଲେ।
ଲୋକ ଅଦାଲତ ବେଞ୍ଚ ସଦସ୍ୟ ଭାବେ ଆଇନଜୀବୀ ରମେଶଚନ୍ଦ୍ର ପଣ୍ଡା ଓ ଡ଼. ପୂର୍ଣ୍ଣଚନ୍ଦ୍ର ତ୍ରିପାଠୀ ଯୋଗଦେଇ ମଧ୍ୟସ୍ଥତା ମାଧ୍ୟମରେ ମାମଲାଗୁଡ଼ିକର ସମାଧାନ କରିଥିଲେ। ଏଥିରେ ଆଇନ ସେବା କମିଟି ସଦସ୍ୟ ଅଳକା ମଞ୍ଜରୀ ପଟ୍ଟନାୟକ ମଧ୍ୟ ସହଯୋଗ କରିଥିଲେ।
ଏହି କାର୍ଯ୍ୟକ୍ରମରେ ଆଇନଜୀବୀ ସନ୍ତୋଷ ତିଆଡି, ରାଜେନ୍ଦ୍ର ପ୍ରସାଦ ପ୍ରଧାନ, ବଂଶୀଧର ପ୍ରଧାନ, ରବୀନ୍ଦ୍ରନାଥ ଦାସ, ରଜନୀ ପଟ୍ଟନାୟକ ଓ ସମୀର ନାୟକ ପ୍ରମୁଖ ସକ୍ରିୟ ଭାବରେ ଯୋଗଦେଇ ଲୋକ ଅଦାଲତକୁ ସଫଳ କରିଥିଲେ। କୋର୍ଟ କର୍ମଚାରୀ ଅଙ୍କନ ପ୍ରଧାନ, ସୁନୀଲ ମୁଦୁଲି, ପବିତ୍ର ପ୍ରଧାନ ପରିଚାଳନା କରିଥିଲେ। ଲୋକ ଅଦାଲତ ମାଧ୍ୟମରେ ଶୀଘ୍ର ଓ ସହଜ ଭାବରେ ମାମଲାଗୁଡ଼ିକର ସମାଧାନ ହେଉଥିବାରୁ ଲୋକମାନେ ନ୍ୟାୟ ପ୍ରାପ୍ତିରେ ବହୁତ ଉପକୃତ ହେଉଥିବା ଆୟୋଜକମାନେ କହିଛନ୍ତି।