ମୁମ୍ବାଇ,୨୯ା୩: ରୋହିତ ଶର୍ମା ଓ ରିୟାନ ରିକଲଟନଙ୍କ ବିସ୍ଫୋରକ ବ୍ୟାଟିଂ ବଳରେ ମୁମ୍ବାଇ ଇଣ୍ଡିଆନ୍ସ (ଏମ୍ଆଇ) ରବିବାର ଖେଳାଯାଇଥିବା ଆଇପିଏଲ୍ ମ୍ୟାଚ୍ରେ କୋଲକାତା ନାଇଟ୍ ରାଇଡର୍ସ(କେକେଆର୍)କୁ ୬ ଉଇକେଟରେ ପରାସ୍ତ କରିଛି। ଫଳରେ ମୁମ୍ବାଇ ବିଜୟ ସହିତ ଅଭିଯାନ ଆରମ୍ଭ କରିଛି। ଦୀର୍ଘ ୧୩ ବର୍ଷର ବ୍ୟବଧାନ ପରେ ମୁମ୍ବାଇ ଆଇପିଏଲ୍ରେ ତା’ର ପ୍ରଥମ ମ୍ୟାଚ୍ ଜିତିବାକୁ ସକ୍ଷମ ହୋଇଛି। ଅନ୍ତିମ ଥର ୨୦୧୩ରେ ମୁମ୍ବାଇ ତା’ର ପ୍ରଥମ ମ୍ୟାଚ୍ ଜିତିଥିଲା।
ବ୍ୟାଟିଂ କରିଥିବା କେକେଆର୍କୁ ରାହାନେ ଓ ଫିନ ଆଲେନ ୬୯ ରନର ଭଲ ଆରମ୍ଭ ପ୍ରଦାନ କରିଥିଲେ। ଆଲେନ ୧୭ ବଲରେ ୩୭ (୬ ଚୌକା ଓ ୨ ଛକା) ରନ କରି ଆଉଟ୍ ହୋଇଥିବା ବେଳେ ନଂ-୩ରେ ଆସିଥିବା କାମେରନ ଗ୍ରୀନ (୧୮) ବିଫଳ ହୋଇଥିଲେ। ରାହାନେ ୪୦ ବଲରେ ୬୭ (୩ ଚୌକା ଓ ୫ ଛକା) ଓ ଅଙ୍ଗକ୍ରିଶ ରଘୁବଂଶୀ ୨୯ ବଲରେ ୫୧ (୬ ଚୌକା ଓ ୨ ଛକା) ରନ କରି ଆଉଟ୍ ହୋଇଥିବା ବେଳେ ରିଙ୍କୁ ସିଂ ୨୧ ବଲରେ ୩୩ (୪ ଚୌକା) ରନ କରି ଅପରାଜିତ ରହିଥିଲେ। କେକେଆର ୨୦ ଓଭରରେ ୪ ଉଇକେଟ ହରାଇ ୨୨୦ ରନ କରିଥିଲା।
ଜବାବରେ ମୁମ୍ବାଇ ପାଇଁ ଆରମ୍ଭରୁ ରୋହିତ ଶର୍ମା ଓ ରିୟାନ ରିକଲଟନ ଛକା ଓ ଚୌକା ବର୍ଷା କରିଥିଲେ। ଦୁହେଁ ୧୧.୫ ଓଭରରେ ୧୪୮ ରନର ଭାଗୀଦାରି କରି ଦଳର ବିଜୟ ନିଶ୍ଚିତ କରିଥିଲେ। ରୋହିତ ୩୮ ବଲରେ ୭୮ (୬ ଲେଖାଏ ଚୌକା ଓ ଛକା) ରନ କରି ଆଉଟ୍ ହୋଇଥିବା ବେଳେ ସୂର୍ଯ୍ୟକୁମାର ଯାଦବ(୧୬) ବିଫଳ ହୋଇଥିଲେ।
ଶତକ ଆଡ଼େ ମୁହାଁଇଥିବା ରିକଲଟନ ୪୩ ବଲରେ ୮୧ (୪ ଚୌକା ଓ ୮ ଛକା) ରନ କରି ଦୁର୍ଭାଗ୍ୟବଶତଃ ରନ ଆଉଟ୍ ହୋଇଥିଲେ। ଏହାପରେ ତିଲକ ବର୍ମା (୨୦) ଓ ହାର୍ଦ୍ଦିକ (୧୮*) ଦଳର ବିଜୟ ଲାଗି ଆବଶ୍ୟକୀୟ ରନ ସଂଗ୍ରହ କରିନେଇଥିଲେ। ଫଳରେ ମୁମ୍ବାଇ ୧୯.୧ ଓଭରରେ ୪ ଉଇକେଟ ହରାଇ ୨୨୪ ରନ କରି ନେଇଥିଲା।