ଅହମ୍ମଦାବାଦ,୭।୩: ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ରବିବାର ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଟି-୨୦ ବିଶ୍ୱକପ୍ ୨୦୨୬ର ମହାଲଢ଼େଇ ଅନୁଷ୍ଠିତ ହେବ। ପ୍ରଥମ ଥର ପାଇଁ ଏହି ଟୁର୍ନାମେଣ୍ଟର ଫାଇନାଲରେ ଦୁଇ ଦଳ ମୁହାଁମୁହିଁ ହେଉଥିବା ବେଳେ, ବିଶ୍ୱ ଟେଷ୍ଟ ଚାମ୍ପିୟନଶିପ (୨୦୨୧) ପରେ ଏହା ସେମାନଙ୍କର ଦ୍ୱିତୀୟ ଫାଇନାଲ ଭେଟ। ତେବେ ମ୍ୟାଚ୍ ପୂର୍ବରୁ କିୱି ଅଧିନାୟକ ମିଚେଲ ସାଣ୍ଟର୍ନରଙ୍କ ଗୋଟିଏ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଭାରତୀୟ ପ୍ରଶଂସକଙ୍କ ମନରେ ଛନକା ପଶିଛି।
ଶନିବାର ଅଭ୍ୟାସ ସମୟରେ ସାଣ୍ଟନର୍ ପିଚ୍ର ପରିଦର୍ଶନ କରିଥିଲେ। ସେଠାରେ ସେ ନିଜ ଫୋନ୍ରେ ପିଚ୍ର ଫଟୋ ଉଠାଉଥିବା ଦେଖିବାକୁ ମିଳିଥିଲା। ଏହି ଦୃଶ୍ୟ ୨୦୨୩ ଦିନିକିଆ ବିଶ୍ୱକପ୍ ଫାଇନାଲ କଥା ମନେ ପକାଇ ଦେଇଛି। ସେତେବେଳେ ଅଷ୍ଟ୍ରେଲୀୟ ଅଧିନାୟକ ପ୍ୟାଟ କମିନ୍ସ ଠିକ ଏହିଭଳି ଭାବେ ପିଚ୍ର ଫଟୋ ଉଠାଇଥିଲେ ଏବଂ ଶେଷରେ ଭାରତକୁ ପରାସ୍ତ କରି ଅଷ୍ଟ୍ରେଲିଆ ବିଶ୍ୱବିଜୟୀ ହୋଇଥିଲା। ଏବେ ସାଣ୍ଟର୍ନର ସମାନ ଅନ୍ଦାଜ ପ୍ରଶଂସକଙ୍କୁ ପୁଣି ଥରେ ସେହି ଅଶୁଭ ସଂକେତର ଭୟ ଦେଖାଉଛି। କେବଳ ଫଟୋ ନୁହେଁ, ସାଣ୍ଟର୍ନର ପ୍ୟାଟ କମିନ୍ସଙ୍କ ଭଳି ମଧ୍ୟ ବୟାନ ଦେଇଥିବା ଦେଖିବାକୁ ମିଳିଛି।
ଖବରଦାତା ସମ୍ମିଳନୀରେ ଯେତେବେଳେ ତାଙ୍କୁ ପଚରାଗଲା କି ନ୍ୟୁଜିଲାଣ୍ଡ ସବୁବେଳେ ଦର୍ଶକଙ୍କ ହୃଦୟ ଜିତିଥାଏ, ତେବେ ଏଥର କଣ ଆପଣ ଟ୍ରଫି ପାଇଁ କୋଟି କୋଟି ଭାରତୀୟଙ୍କ ହୃଦୟ ଭାଙ୍ଗିବେ? ଏହାର ଉତ୍ତରରେ ସାଣ୍ଟର୍ନର୍ କହିଛନ୍ତି ଯେ “ଆମେ ଟ୍ରଫି ଜିତିବାକୁ ଚାହୁଁ। ଯଦି ଛୋଟ ଛୋଟ କଥା ପ୍ରତି ଆମେ ଧ୍ୟାନ ଦେବୁ, ତେବେ ନିଶ୍ଚିତ ଜିତିବୁ। ଟ୍ରଫି ପାଇଁ ଯଦି ଆମକୁ କାହାର ହୃଦୟ ଭାଙ୍ଗିବାକୁ ପଡ଼େ, ତେବେ ସେଥିରେ ଆମର କୌଣସି ଆପତ୍ତି ନାହିଁ।” ଏହି ବୟାନ ଠିକ ୨୦୨୩ରେ କମିନ୍ସ ଦେଇଥିବା ବୟାନ ଭଳି, ଯେଉଁଥିରେ ସେ କହିଥିଲେ ଯେ “ଲକ୍ଷେ ଲୋକଙ୍କୁ ଶାନ୍ତ କରିଦେବାଠାରୁ ବଡ଼ ଖୁସି ଆଉ କିଛି ନାହିଁ।”
ବର୍ତ୍ତମାନର ଚାମ୍ପିୟନ ଭାବେ ଟିମ ଇଣ୍ଡିଆକୁ ଶକ୍ତିଶାଳୀ ମନେ କରାଯାଉଛି, କିନ୍ତୁ କ୍ରିକେଟରେ କିଛି ବି ହୋଇପାରେ। ଫାଇନାଲର ସେହି ୪୦ ଓଭରର ଲଢ଼େଇ ହିଁ ସ୍ପଷ୍ଟ କରିବ ଯେ ଭାରତ ପୁଣି ଥରେ ଇତିହାସ ରଚିବ ନା କିୱି ଦଳ ବାଜି ମାରିବ।