ଓ୍ବାଶିଂଟନ,୧।୨: ଯୌନ କେଳେଙ୍କାରୀ ମାମଲାରେ ଦୋଷୀସାବ୍ୟସ୍ତ ନିୟୁତପତି ଫାଇନାନ୍ସର ଜେଫ୍ରି ଏପ୍ଷ୍ଟିନ୍ଙ୍କ ସମ୍ପର୍କିତ ଅଧିକ ଅନୁସନ୍ଧାନଯୋଗ୍ୟ ଫାଇଲ୍ ତଥ୍ୟକୁ ଆମେରିକା ନ୍ୟାୟ ବିଭାଗ ଶୁକ୍ରବାର ପ୍ରକାଶ କରିଛି। ଏପ୍ଷ୍ଟିନ୍ଙ୍କ ସଦ୍ୟ ପ୍ରକାଶିତ ୩ ନିୟୁତରୁ ଊର୍ଦ୍ଧ୍ୱ ପୃଷ୍ଠାର ଫାଇଲ୍ରେ ଭାରତୀୟ ବଂଶୋଦ୍ଭବ ଚଳଚ୍ଚିତ୍ର ନିର୍ମାତା ତଥା ନ୍ୟୁୟର୍କ ସିଟି ମେୟର ଜୋହରାନ ମମଦାନିଙ୍କ ମାଆ ମୀରା ନାୟାରଙ୍କ ନାଁ ରହିଛି। ଏପ୍ଷ୍ଟିନ୍ଙ୍କ ସହଯୋଗୀ ଘିସ୍ଲେଇନ୍ ମାକ୍ସଓ୍ବେଲଙ୍କ ଘରେ ଆୟୋଜିତ ଏକ ପାର୍ଟିରେ ମୀରା ନାୟାର ଜଣେ ଅତିଥି ଭାବେ ଯୋଗଦେଇଥିଲେ ବୋଲି ଉକ୍ତ ଫାଇଲ୍ରେ ଉଲ୍ଲେଖ ରହିଛି। ୨୦୦୯ ଅକ୍ଟୋବର ୨୧ରେ ଏପ୍ଷ୍ଟିନ୍୍ଙ୍କୁ ପ୍ରକାଶକ ପେଗି ସିଏଗାଲ ପଠାଇଥିବା ଇମେଲ୍ରେ ମୀରାଙ୍କ ନାମ ରହିଛି।
ଏପ୍ଷ୍ଟିନ୍ଙ୍କ ବହୁଚର୍ଚ୍ଚିତ ଫାଇଲ୍ରୁ ବହୁ ବିଶିଷ୍ଟ ବ୍ୟକ୍ତିଙ୍କ ନାମ ପଦାକୁ ଆସିଛି। ସେମାନଙ୍କ ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍, ମାଇକ୍ରୋସଫ୍ଟ ପ୍ରତିଷ୍ଠାତା ବିଲ୍ ଗେଟ୍ସ ଏବଂ ପ୍ରିନ୍ସ ଆଣ୍ଡ୍ର୍ୟୁଙ୍କ ନାମ ଅନ୍ୟତମ। ଟ୍ରମ୍ପ୍ ଇସ୍ରାଏଲ୍ ଦ୍ୱାରା ପ୍ରଭାବିତ ହୋଇଥିଲେ ବୋଲି ଫାଇଲ୍ରେ ଉଲ୍ଲେଖ ରହିଛି। ଟ୍ରମ୍ପ୍ଙ୍କ ପ୍ରଥମ ପାଳି ରାଷ୍ଟ୍ରପତିତ୍ୱ କାଳରେ ତାଙ୍କ ଜ୍ୱାଇଁ ଜାରେଦ୍ କୁଶ୍ନେର ଉଭୟ ସଂଗଠନ ଏବଂ ସରକାର ଉପରେ ଅତ୍ୟଧିକ ପ୍ରଭାବ ବିସ୍ତାର କରିଥିଲେ।
ଉକ୍ତ ବିସ୍ଫୋରକ ଦସ୍ତାବିଜ୍ରେ ଆହୁରି ଉଲ୍ଲେଖ ରହିଛି କୁଶ୍ନେରଙ୍କ ପରିବାର ଦୁର୍ନୀତି, ରୁଷିଆରେ ଅର୍ଥ ନିବେଶ ଏବଂ ଅଲ୍ଟା-ଜିଓନିଷ୍ଟ ଚାବାଦ ନେଟ୍ଓ୍ବର୍କ ସହ ସମ୍ପୃକ୍ତ ଥିଲେ। କୁଶ୍ନରଙ୍କ ବାପା ପୂର୍ବରୁ ଏକ ଆର୍ଥତ୍କ ମାମଲାରେ ଦୋଷୀସାବ୍ୟସ୍ତ ହୋଇଥିବାବେଳେ ଟ୍ରମ୍ପ୍ଙ୍କଠାରୁ ରାଷ୍ଟ୍ରପତୀୟ କ୍ଷମା ପାଇଥିଲେ। ରିପୋର୍ଟରେ ଆହୁରି ଦର୍ଶାଯାଇଛି, କୁଶ୍ନେର ବହୁପରିମାଣରେ ରୁଷୀୟ ନିବେଶ ଅର୍ଥକୁ ଅନ୍ୟତ୍ର ସ୍ଥାନାନ୍ତର କରିଥିଲେ ଏବଂ ରୁଷିଆ ସରକାରଙ୍କ ସହ ଜଡ଼ିତ ସଂସ୍ଥାଗୁଡ଼ିକରେ ତାଙ୍କର ଥିବା ସ୍ବାର୍ଥ ବିଷୟରେ ଠିକ୍ ସୂଚନା ଦେଇ ନ ଥିଲେ। ଟ୍ରମ୍ପ୍ଙ୍କ ରିଅଲ ଇଷ୍ଟେଟ୍ କାରବାରରେ ବିବାଦୀୟ ବେଭେର୍ଲି ହିଲ୍ସଙ୍କ କାରବାର ଉଲ୍ଲେଖ ରହିଛି। ଟ୍ରମ୍ପ୍ ୪୧ ନିୟୁତ ଡଲାରରେ ଏକ ସମ୍ପତ୍ତି କିଣି ପରେ ଏହାକୁ ବିଦେଶ ସହ ସମ୍ପୃକ୍ତ ଥିବା ଏକ ସେଲ୍ କମ୍ପାନୀକୁ ୯୫ ନିୟୁତ ଡଲାରରେ ବିକ୍ରି କରିଥିଲେ।
ଏପ୍ଷ୍ଟିନ୍ ଫାଇଲ୍ରୁ ମାଇକ୍ରୋସଫ୍ଟ ସହପ୍ରତିଷ୍ଠାତା ବିଲ୍ ଗେଟ୍ସଙ୍କ ରୁଷୀୟ ଝିଅମାନଙ୍କ ସହ ଯୌନ ସମ୍ପର୍କ ଅଭିଯୋଗ ରହିଛି। ଗେଟ୍ସ ତାଙ୍କର ତତ୍କାଳୀନ ସ୍ତ୍ରୀ ମେଲିଣ୍ଡା ଫ୍ରେଞ୍ଚ୍ ଗେଟ୍ସଙ୍କଠାରୁ ଏକ ଏସ୍ଟିଡି ଲୁଚାଇବାକୁ ଉଦ୍ୟମ କରୁଥିଲେ ବୋଲି ଏଥିରୁ ଜଣାପଡ଼ିଛି। ଏପ୍ଷ୍ଟିନ୍୍ଙ୍କ ଫାଇଲ୍ରେ ବ୍ରିଟେନ୍ ପ୍ରିନ୍ସ ଆଣ୍ଡ୍ର୍ୟୁ ଭୂମିରେ ଶୋଇଥିବା ଜଣେ ମହିଳାଙ୍କ ଉପରେ ଆଣ୍ଠେଇଥିବା ଫଟୋଗୁଡ଼ିକରୁ ଦେଖିବାକୁ ମିଳିଛି।