ତେହରାନ୍,୨୦।୩: ଆମେରିକା-ଇରାନ୍ ଯୁଦ୍ଧକୁ ୨୦ ଦିନ ବିତିଛି । ଉଭୟ ପକ୍ଷ ମଧ୍ୟରେ ଆକ୍ରମଣ-ପ୍ରତ୍ୟାକ୍ରମଣ ଆହୁରି ତୀବ୍ର ହୋଇଛି। ଆମେରିକା ଓ ଇସ୍ରାଏଲ ଇରାନକୁ ସମ୍ପୂର୍ଣ୍ଣ ନିଷ୍କ୍ରିୟ କରିବା ଲକ୍ଷ୍ୟରେ ଆକ୍ରମଣ ଜାରି ରଖିଛନ୍ତି। କିନ୍ତୁ ହାର୍ ମାନିବାକୁ ପ୍ରସ୍ତତ ନ ଥିବା ଇରାନ୍ ତୈଳକୁ ଅସ୍ତ୍ର କରିଛି। କାତାରସ୍ଥିତ ବିଶ୍ୱର ସର୍ବବୃହତ୍ ପାରସ୍ ଗ୍ୟାସ୍ ଫିଲ୍ଡ ଉପରେ ଇରାନ୍ର ଆକ୍ରମଣ କେବଳ ମଧ୍ୟପ୍ରାଚ୍ୟ ନୁହେଁ, ସାରାବିଶ୍ୱକୁ ଚିନ୍ତିତ କରିଛି। ପାରସ୍ ହେଉଛି ପାରସ୍ୟ ଉପସାଗରସ୍ଥିତ ଏକ ଉପଦ୍ୱୀପ ଯାହାର ୩୦ରୁ ୪୦ ଭାଗ ଇରାନ୍ ଅଧୀନରେ ରହିଛି। ବାକି ୬୦ ଭାଗ କାତାର ଅଧୀନରେ ରହିଛି।
ଏହି ଉପଦ୍ୱୀପରୁ ଉତ୍ପାଦନ ହେଉଥିବା ଏଲଏନଜି ବିଶ୍ୱର ଅଧିକାଂଶ ଭାଗକୁ ରପ୍ତାନି ହୋଇଥାଏ। ହେଲେ ଇସ୍ରାଏଲ ପ୍ରଥମେ ଇରାନ୍ ଅଧୀନ ପାରସ୍ ଗ୍ୟାସ୍ ଫିଲ୍ଡ ଉପରେ ଆକ୍ରମଣ କରିବା ପରେ ଇରାନ୍ କାତାର ଗ୍ୟାସ୍ ଫିଲ୍ଡ ଉପରେ ଆକ୍ରମଣ କରିଛି। ଏହା ବୈଶ୍ୱିକ ଗ୍ୟାସ୍ ଯୋଗାଣ ଶୃଙ୍ଖଳ ପାଇଁ ଗମ୍ଭୀର ସମସ୍ୟା ସୃଷ୍ଟି କରିଛି। କେବଳ କାତାର ନୁହେଁ, ଆମେରିକା ବିରୋଧରେ ପ୍ରତିଶୋଧ ନେବା ଲାଗି ଇରାନ୍ ସାଉଦି ଆରବ ଏବଂ କୁଏଟ୍ ତୈଳ ବିଶୋଧନଗାର ଉପରେ ମଧ୍ୟ ଆକ୍ରମଣ କରିଛି। ଇସ୍ରାଏଲ ଯଦି ପୁଣି ଇରାନ୍ର ତୈଳ ଠିକଣା ଉପରେ ଆକ୍ରମଣ କରେ ତେବେ କାତାର ପାରସ୍ ଗ୍ୟାସ୍ ଫିଲ୍ଡକୁ ସମ୍ପୂର୍ଣ୍ଣ ଉଡାଇ ଦିଆଯିବ ବୋଲି ଇରାନ୍ ମିଲିଟାରି ଅପରେଶନାଲ କମାଣ୍ଡ ମୁଖ୍ୟ ଖାତମ୍ ଅଲ-ଅନବିୟ ଧମକ ଦେଇଛନ୍ତି।
କିଛି ନିର୍ଦ୍ଦିଷ୍ଟ ଦେଶ ବ୍ୟତୀତ ଇରାନ୍ ହର୍ମୁଜ୍ ଷ୍ଟ୍ରେଟ୍ ଦେଇ ତୈଳ ପରିବହନ ବନ୍ଦ କରିଥିଲାବେଳେ ଏବେ ତୈଳବାହୀ ଜାହାଜ ଉପରେ ଶୁଳ୍କ ଲଗାଇବାକୁ ଧମକ ଦେଇଛି। ଏଭଳି ସ୍ଥିତିରେ ମଧ୍ୟପ୍ରାଚ୍ୟରେ ଯୁଦ୍ଧ ଉତ୍ତେଜନା ଚରମ ସୀମା ଛୁଇଁବା ସହ ତେଲ ଓ ଗ୍ୟାସ୍କୁ ଇରାନ ଅସ୍ତ୍ର କରି ବୈଶ୍ୱିକ ଅର୍ଥନୀତିକୁ ଉଜାଡ଼ିଦେବାକୁ ଉଦ୍ୟମ ଚଳାଇଛି। ସାଉଦି ଆରବଠାରୁ ଆରମ୍ଭ କରି ୟୁଏଇ, କାତାର, କୁଏଟ୍, ଜୋର୍ଡାନ ଆଦି ତୈଳ ଓ ଗ୍ୟାସ୍ ଉତ୍ପାଦନକାରୀ ରାଷ୍ଟ୍ର ଏବେ ଇରାନ୍ ଟାର୍ଗେଟରେ ରହିଥିବାରୁ ଆଗକୁ ସ୍ଥିତି ଆହୁରି ଭୟଙ୍କର ହୋଇପଡ଼ିବ ବୋଲି ଆଶଙ୍କା ବଢିଛି।