ତେହରାନ୍ ,୩୦ା୩: ଫେବୃଆରୀ ୨୮ରେ ଇରାନ୍ ବିରୋଧରେ ଆମେରିକା ଓ ଇସ୍ରାଏଲ ଆରମ୍ଭ କରିଥିବା ଅପରେଶନକୁ ଇତିମଧ୍ୟରେ ଏକ ମାସ ପୂରିଛି। ଇରାନ୍ ଉପରେ ଉକ୍ତ ଦୁଇ ଦେଶର ଆକ୍ରମଣ ପରେ ଏହି ଯୁଦ୍ଧ ମହାଯୁଦ୍ଧରେ ପରିଣତ ହେବା ସହ ସମଗ୍ର ମଧ୍ୟପ୍ରାଚ୍ୟ ଘୋର ସଙ୍କଟ ମଧ୍ୟକୁ ଟାଣି ହୋଇଯାଇଛି। ଗୋଟିଏପଟେ ଆମେରିକା ଓ ଇସ୍ରାଏଲ ଇରାନ୍ ଉପରେ ଆକ୍ରମଣ ଜାରି ରଖିଥିବାବେଳେ ଇରାନ୍ ଆମେରିକାକୁ ଟାର୍ଗେଟ କରି ସାଉଦି ଆରବ, ୟୁଏଇ, କାତାର, କୁଏଟ୍, ଇରାକ୍ ଏବଂ ଜୋର୍ଡାନ ଉପରେ ଆକ୍ରମଣ ଚଳାଇଛି। ସେପଟେ ଇରାନ୍ ସମର୍ଥନରେ ବାହାରି ହିଜବୁଲ୍ଲା ଇସ୍ରାଏଲ ଉପରେ ଆକ୍ରମଣ କରିବାରୁ ଇସ୍ରାଏଲର ଆଇଡିଏଫ୍ ଲେବାନନ୍ରେ ଆକାଶମାର୍ଗରୁ ଆକ୍ରମଣ କରିବା ସହ ଗ୍ରାଉଣ୍ଡ ଅପରେକଶନ ଜାରି ରଖିଛି। ମଙ୍ଗଳବାର ହୁଟି ବିଦ୍ରୋହୀ ସଂଗଠନ ଇରାନ୍କୁ ସମର୍ଥନ କରି ଇସ୍ରାଏଲ ଉପରେ ଆକ୍ରମଣ କରିଥିଲାବେଳେ ଏବେ ୟେମେନ୍ ମଧ୍ୟ ଏହି ମହାଯୁଦ୍ଧରେ ଯୋଡିହୋଇ ଆମେରିକା ଏବଂ ଇସ୍ରାଏଲ ଟାର୍ଗେଟକୁ ଆସିଛି। ଫଳରେ ସମଗ୍ର ମଧ୍ୟପ୍ରାଚ୍ୟ ଏବେ ଯୁଦ୍ଧକ୍ଷେତ୍ରରେ ପରିଣତ ହୋଇଛି। ଆଗକୁ ଆମେରିକା ଇରାନ୍ରେ ଗ୍ରାଉଣ୍ଡ ଅପରେଶନ ଆରମ୍ଭ କରିବାକୁ ପ୍ରସ୍ତୁତ ହେଉଥିବା ସୂଚନା ମିଳିବା ପରେ ମଧ୍ୟପ୍ରାଚ୍ୟ ସ୍ଥିତି ଆହୁରି ଗମ୍ଭୀର ହୋଇପଡ଼ିବ ବୋଲି ଆଶଙ୍କା ବଢିଛି।
ସୁଦ୍ଧା ଏକ ମାସ ଧରି ଚାଲିଥିବା ଯୁଦ୍ଧରେ ମଧ୍ୟପ୍ରାଚ୍ୟ ମୃତ୍ୟୁସଂଖ୍ୟା ୪୫୦୦ରୁ ଅଧିକରେ ପହଞ୍ଚିଛି। କେବଳ ଇରାନ୍ରେ ଏହାର ବହୁ ବରିଷ୍ଠ ଅଧିକାରୀଙ୍କ ସମେତ ୨୦୦୦ରୁ ୩୩୦୦ ଲୋକ ପ୍ରାଣ ହରାଇଛନ୍ତି। ସେହିପରି ୨୪,୮୦୦ ଲୋକ ଆହତ ହୋଇଥିଲାବେଳେ ପ୍ରାୟ ୪୦ ଲକ୍ଷ ଲୋକ ବିସ୍ଥାପିତ ହୋଇଥିବା ଇରାନୀୟ ଗଣମାଧ୍ୟମ ସୂତ୍ରରୁ କୁହାଯାଇଛି। ଇସ୍ରାଏଲ ଆକ୍ରମଣରେ ଲେବାନନ୍ରେ ୧୧୦୦ ଲୋକଙ୍କ ମୃତ୍ୟୁ ହୋଇଥିଲାବେଳେ ପ୍ରାୟ ୩ ହଜାର ଲୋକ ବିସ୍ଥାପିତ ହୋଇଥିବା କୁହାଯାଇଛି। ଇରାନ୍ ଆକ୍ରମଣରେ ଇସ୍ରାଏଲରେ ୧୯ ଜଣଙ୍କ ମୃତ୍ୟୁ ହୋଇଥିଲାବେଳେ ଆମେରିକା ସେନାର ୧୩ ଜଣଙ୍କ ମୃତ୍ୟୁ ହୋଇଛି। ଏହାବ୍ୟତୀତ ସାଉଦି ଆରବ, ୟୁଏଇ , କାତାର, ଇରାକ୍ ଆଦି ଦେଶରେ ବର୍ତ୍ତମାନ ସୁଦ୍ଧା ୭ ଜଣଙ୍କ ମୃତ୍ୟୁ ହୋଇଥିଲାବେଳେ ଏକାଧିକ ନାଗରିକ ଆହତ ହୋଇଥିବା କୁହାଯାଇଛି। ଏହି ଯୁଦ୍ଧରେ ଇରାନ୍ର ପ୍ରାୟ ୧୦,୦୦୦ ସାମରିକ, ଶିଳ୍ପାଞ୍ଚଳ, ଗବେଷଣାଗାରକୁ ଆମେରିକା ଓ ଇସ୍ରାଏଲ ଟାର୍ଗେଟ କରି ଧ୍ୱସ୍ତବିଧ୍ୱସ୍ତ କରିଦେଇଛନ୍ତି। ଏହି କ୍ରମରେ ଏଠାକାର ୮୧,୦୦୦ରୁ ଅଧିକ ଅଟ୍ଟାଳିକା ଧ୍ୱଂସ ହୋଇଯାଇଥିବା କୁହାଯାଇଛି। ଇରାନ୍ର ୧୫୦ରୁ ଅଧିକ ନୌସେନା ଘାଟିକୁ ଉଡ଼ାଇ ଦିଆଯାଇଛି। ସବୁଠୁ ବଡ଼ କଥା ହେଲା, ମଧ୍ୟପ୍ରାଚ୍ୟର ସମସ୍ତ ତୈଳ ଓ ଗ୍ୟାସ୍ ଉତ୍ପାଦନକାରୀ ଦେଶ ପରୋକ୍ଷ କିମ୍ବା ପ୍ରତ୍ୟକ୍ଷ ଭାବେ ଯୁଦ୍ଧରେ ଜଡ଼ିତ ହୋଇପଡ଼ିଥିବାରୁ ଇନ୍ଧନ ସମସ୍ୟାକୁ ନେଇ ବୈଶ୍ୱିକ ଅର୍ଥନୀତି ମାସକ ମଧ୍ୟରେ ୧୧.୫ ଟ୍ରିଲିୟନ ଡଲାର ହ୍ରାସ ପାଇଛି। ସେହିପରି ଅନ୍ତର୍ଜାତୀୟ ବଜାରରେ ପେଟ୍ରୋଲିୟମ ଏବଂ ଗ୍ୟାସ୍ ମୂଲ୍ୟ ଅନୂ୍ୟନ ୪୦ରୁ ୫୦ ପ୍ରତିଶତ ବୃଦ୍ଧି ପାଇଛି। କେବଳ ଏଲଏନ୍ଜି ମୂଲ୍ୟରେ ୬୦ ପ୍ରତିଶତ ବୃଦ୍ଧି ହୋଇଥିବା କୁହାଯାଇଛି।