ମୌରିସିଓଙ୍କ ଡବଲ ଗୋଲ: ଓଡ଼ିଶା ଏଫ୍‌ସିର ପ୍ରଥମ ବିଜୟ

ବାମ୍ବୋଲିମ୍‌, ୮।୧-ଡିଏଗୋ ମୌରିସିଓଙ୍କ ଡବଲ ଗୋଲ ବଳରେ ଓଡ଼ିଶା ଏଫ୍‌ସି ଚଳିତ ଇଣ୍ଡିଆନ ସୁପରଲିଗ୍‌ (ଆଇଏସ୍‌ଏଲ୍‌)ରେ ଗୁରୁବାର ପ୍ରଥମ ବିଜୟ ସ୍ବାଦ ଚାଖିଛି। ଷ୍ଟୁଆର୍ଟ ବକ୍ସଟରଙ୍କ ପ୍ରଶିକ୍ଷଣପ୍ରାପ୍ତ ଦଳ ୪-୨ ଗୋଲରେ କେରଳ ବ୍ଲାଷ୍ଟର୍ସକୁ ପରାସ୍ତ କରିଛି। ଏଠାରେ ୯ମ ମ୍ୟାଚ ଖେଳିଥିବା ଓଡ଼ିଶା ଏଫ୍‌ସିର ଏହା ଥିଲା ପ୍ରଥମ ବିଜୟ। ପୂର୍ବରୁ ୮ ମ୍ୟାଚରୁ ଦଳ ୬ଟିରେ ପରାଜିତ ହୋଇଥିବାବେଳେ ୨ଟି ଡ୍ର ରଖିବାକୁ ସକ୍ଷମ ହୋଇଥିଲା। ଅନ୍ୟପକ୍ଷରେ କେରଳ ୯ ମ୍ୟାଚରୁ ୫ମ ପରାଜୟ ବରଣ କରିଛି। ଦଳ ୧ ବିଜୟ ଓ ୩ ଡ୍ର ସହ ୬ ପଏଣ୍ଟ ପାଇ ଟେବୁଲରେ ୧୦ମ ସ୍ଥାନରେ ରହିଛି। ସେହିପରି ଓଡ଼ିଶା ଏଫ୍‌ସି ୧ ବିଜୟ, ୨ ଡ୍ର ଓ ୬ ପରାଜୟ ସହ ୫ ପଏଣ୍ଟରେ ପହଞ୍ଚତ୍ ଏକାଦଶ ସ୍ଥାନରେ ଅପରିବର୍ତ୍ତିତ ରହିଛି।
ମ୍ୟାଚଟି ଆରମ୍ଭରୁ ବେଶ୍‌ ସଂଘର୍ଷପୂର୍ଣ୍ଣ ହୋଇଥିଲା। ୭ମ ମିନିଟରେ ଜୋର୍ଡାନ ମୁରେ ଏକ ଗୋଲ ଦେଇ କେରଳକୁ ଅଗ୍ରଣୀ କରାଇଥିଲେ। କାଖୁଣ୍ଡୋ ପେରେରା ପଡ଼ିଆ ମଝିରୁ ମାରିଥିବା ଫ୍ରି କିକ୍‌ ଓଏଫସି ପୋଷ୍ଟରେ ପଡ଼ିଥିଲା। ରାହୁଲ କେ.ପି. ହେଡ୍‌ କରି ଗୋଲକିପରଙ୍କ ଡାହାଣ ପଟରେ ଗୋଲ ଦେବାକୁ ଚେଷ୍ଟା କରିଥିଲେ। ମାତ୍ର ଅର୍ଶଦୀପ ସିଂ ତାହା ହେବାକୁ ଦେଇ ନ ଥିଲେ। ବଲଟି ଫେରି ଆସୁଥିବାବେଳେ ଜୋର୍ଡାନ ଚତୁରତାର ସହ ତାହାକୁ ପୋଷ୍ଟ ମଧ୍ୟକୁ ପଠାଇବାରେ ସକ୍ଷମ ହୋଇଥିଲେ। ଓଏଫ୍‌ସି ଗୋଲ ପରିଶୋଧ ଉଦ୍ୟମରେ ଥିବାବେଳେ ୨୨ତମ ମିନିଟରେ ଭାଗ୍ୟ ସାଥ୍‌ ଦେଇଥିଲା। କେରଳ ପୋଷ୍ଟ ମଧ୍ୟରେ ଡିଏଗୋ ମୌରିସିଓଙ୍କୁ ଦେଖି ଜେରୀ ମାଓ୍ବିମିଙ୍ଗଥଙ୍ଗା ବଲ୍‌ ପାସ୍‌ କରିଥିଲେ। ମୌରିସିଓ ଲୋ କ୍ରସ୍‌ ଜରିଆରେ ଏହାକୁ ଗୋଲରେ ପରିଣତ କରିବାକୁ ଉଦ୍ୟମ କରୁଥିବାବେଳେ କେରଳର ଜ୍ୟାକସନ ସିଂ ତ୍ରୁଟିପୂର୍ଣ୍ଣଭାବେ ଡିଫ୍ଲେକସନ କରି ନିଜ ପୋଷ୍ଟ ମଧ୍ୟକୁ ବଲ ପଠାଇ ଦେଇଥିଲେ। ତାଙ୍କ ଆତ୍ମଘାତୀ ଗୋଲ ଯୋଗୁ ମ୍ୟାଚ ୧-୧ ସ୍ଥିତିରେ ପହଞ୍ଚତ୍ଥିଲା ଏବଂ ଓଡ଼ିଶା ଏଫ୍‌ସି ପ୍ରତ୍ୟାବର୍ତ୍ତନ କରିଥିଲା। ୪୨ତମ ମିନିଟରେ ମାଓ୍ବିମିଙ୍ଗଥଙ୍ଗାଙ୍କଠାରୁ ପାଇଥିବା ପାସ୍‌କୁ ଗୋଲରେ ପରିଣତ କରି ଷ୍ଟିଭେନ୍‌ ଟେଲର ପ୍ରଥମାର୍ଦ୍ଧ ଶେଷ ବେଳକୁ ଓଡ଼ିଶା ଦଳକୁ ୨-୧ରେ ଅଗ୍ରଣୀ କରାଇଥିଲେ।
ଦ୍ୱିତୀୟାର୍ଦ୍ଧ ଆରମ୍ଭରୁ ମଧ୍ୟ ଓଡ଼ିଶା ଏଫ୍‌ସି ଆକ୍ରମଣାତ୍ମକ ଆଭିମୁଖ୍ୟ ଜାରି ରଖିଥିଲା। ୫୦ତମ ମିନିଟରେ ମାଓ୍ବିମିଙ୍ଗଥଙ୍ଗାଙ୍କ ପାସ୍‌କୁ ଗୋଲ କରି ଡିଏଗୋ ମୌରିସିଓ ଓଡ଼ିଶା ଅଗ୍ରଣୀ ବ୍ୟବଧାନକୁ ୩-୧ରେ ପହଞ୍ଚାଇ ଦେଇଥିଲେ। କେବଳ ସେତିକି ନୁହେଁ ଏହାର ୧୦ ମିନିଟ ପରେ ଅର୍ଥାତ୍‌ ୬୦ତମ ମିନିଟରେ ନନ୍ଦକୁମାର ସେକର ଦେଇଥିବା ପାସ୍‌କୁ ଗୋଲରେ ରୂପାନ୍ତରିତ କରି ମୌରିସିଓ ଦଳର ବିଜୟ ଆଶାକୁ ମଜଭୂତ କରିଥିଲେ। ମାତ୍ର ଖେଳ ଏତିକିରେ ଶେଷ ହୋଇ ନ ଥିଲା। ୭୯ତମ ମିନିଟରେ ଗ୍ୟାରୀ ହୁପର ଏକ ଗୋଲ ପରିଶୋଧ କରି ମ୍ୟାଚରେ ରୋମାଞ୍ଚ ଭରିଥିଲେ। ତେବେ ଅବଶିଷ୍ଟ ସମୟରେ ଓଡ଼ିଶା ଏଫ୍‌ସି ଖେଳାଳିମାନେ ସତର୍କତା ଅବଲମ୍ବନ କରି କେରଳ ଖେଳାଳିଙ୍କୁ ପ୍ରଭାବ ବିସ୍ତାର କରିବାକୁ ଦେଇ ନ ଥିଲେ। ରେଫରିଙ୍କ ହ୍ବିସିଲ ବାଜିବାକ୍ଷଣି ଓଡ଼ିଶା ଏଫ୍‌ସି ଦଳର ବିଜୟ ଉତ୍ସବ ଆରମ୍ଭ ହୋଇଥିଲା। ପ୍ରତିଯୋଗିତାରେ ଓଡ଼ିଶା ଏଫ୍‌ସି ପ୍ରଥମଥରପାଇଁ ୩ ପଏଣ୍ଟ ପାଇଥିବାବେଳେ ମାଓ୍ବିମିଙ୍ଗଥଙ୍ଗା ପାସ୍‌ ଅଫ୍‌ ଦି ମ୍ୟାଚ ଏବଂ ମୌରିସିଓ ହିରୋ ଅଫ୍‌ ଦି ମ୍ୟାଚ ପୁରସ୍କାର ପାଇଥିଲେ।