ଦେବଗଡ଼,୨ା୭(ଶଶାଙ୍କ ଶେଖର ଝାଙ୍କର):ଭିନ୍ନ ଜାତିରେ ବିବାହ କରିଥିବାରୁ ମୃତଦେହ ଛୁଇଁଲେନି ଜାତି ସମାଜର ଜନସାଧାରଣ। ପ୍ରାୟ ୩ ଘଣ୍ଟା ମୃତଦେହ ପଡ଼ିରହିବା ପରେ ସ୍ବେଚ୍ଛାସେବୀମାନେ ବୋହିନେଇ ମଶାଣିରେ ପୋତିଛନ୍ତି। ମଙ୍ଗଳବାର ଏଭଳି ଘଟଣା ଦେଖିବାକୁ ମିଳିଛି ଦେବଗଡ଼ ଜିଲା ତିଲେଇବଣି ବ୍ଲକ ଟାଇଁସର ଗ୍ରାମପଞ୍ଚାୟତ ଅନ୍ତର୍ଗତ ଜରେଇକେଲା ଗ୍ରାମରେ।
ସୂଚନା ଅନୁଯାୟୀ, ଜରେଇକେଲା ଗ୍ରାମର ଲୋକନାଥ ମହାକୁଳ ବାସନ୍ତୀ ନାମ୍ନୀ ଜଣେ ଭିନ୍ନ ଜାତିର ଯୁବତୀଙ୍କୁ ପ୍ରେମ ବିବାହ କରି ସାମାଜିକ କଟକଣାର ସମ୍ମୁଖୀନ ହୋଇଥିଲେ। ସମୟ ଗଡ଼ିବା ସହିତ ଉଭୟଙ୍କ ବୟସ ମଧ୍ୟ ବଢ଼ିଚାଲିଥିଲା। ପ୍ରାୟ ୩/୪ ବର୍ଷ ପୂର୍ବେ ବାର୍ଦ୍ଧକ୍ୟଜନିତ ରୋଗରେ ଲୋକନାଥଙ୍କ ମୃତ୍ୟୁ ଘଟିଥିଲା। ତେବେ ସେମାନଙ୍କର କୌଣସି ସନ୍ତାନ ନ ଥିବାବେଳେ ବାର୍ଦ୍ଧକ୍ୟଜନିତ ଦୁର୍ବଳତା କାରଣରୁ କୌଣସି କାମ କରିପାରୁ ନ ଥିଲେ ୮୦ ବର୍ଷୀୟା ବୃଦ୍ଧା ବାସନ୍ତୀ। ଫଳରେ ସେ ମାଗିକରି ଚଳିବା ସହିତ ସରକାରଙ୍କ ପକ୍ଷରୁ ମିଳିଥିବା ଆବାସ ଗୃହରେ ଏକାକୀ ରହୁଥିଲେ। କିଛିମାସ ହେବ ସେ ଶଯ୍ୟାଶାୟୀ ହୋଇପଡିବାରୁ ବଞ୍ଚତ୍ବା ପାଇଁ ପଡ଼ୋଶୀଙ୍କ ସହାୟତା ଉପରେ ସମ୍ପୂର୍ଣ୍ଣ ନିର୍ଭର କରୁଥିଲେ। ତାଙ୍କର ଜଣେ ପଡ଼ୋଶୀ ମଙ୍ଗଳବାର ପୂର୍ବାହ୍ନ ପ୍ରାୟ ୧୧ଟାରେ ତାଙ୍କ ଘରକୁ ଖାଦ୍ୟ ଆଣି ଆସିଥିବାବେଳେ ଘର ଚଟାଣରେ ବାସନ୍ତୀଙ୍କ ମୃତଦେହ ପଡ଼ିଥିବା ଦେଖିଥିଲେ। ଏନେଇ ସେ ଉକ୍ତ ଗ୍ରାମର ପୂର୍ବତନ ସମିତି ସଭ୍ୟ ବଳରାମ ଗଡ଼ନାୟକଙ୍କ ସମେତ ଗ୍ରାମବାସୀ ଏବଂ ବୃଦ୍ଧାଙ୍କ ଜାତି ସମାଜ ଲୋକଙ୍କୁ ଜଣାଇଥିଲେ। ତେବେ ଜାତି ସମାଜ ଲୋକେ ବାସନ୍ତୀଙ୍କ ମୃତଦେହ ଛୁଇଁବାକୁ ମନା କରିଦେଇଥିେଲେ। ଏଭଳି ପରିସ୍ଥିତିରେ ପୂର୍ବତନ ସମିତି ସଭ୍ୟ ଗଡ଼ନାୟକ କୌଣସି ଉପାୟ ନ ପାଇ ସ୍ବେଚ୍ଛାସେବୀ ଅକ୍ଷୟ ସାହୁଙ୍କ ସହାୟତା ଲୋଡ଼ିଥିଲେ। ସ୍ବେଚ୍ଛାସେବୀ ସାହୁଙ୍କ ସମେତ ସ୍ବେଚ୍ଛାସେବୀ ବିପ୍ରଚରଣ ଜୟପୁରିଆ, ପ୍ରସନ୍ନ ଧଳ, ବିନୋଦ ବରୁଆ, ଟୁନା ବେହେରା, ରମେଶ ନାୟକ, ସଞ୍ଜୟ କିଣ୍ଡୋ ପ୍ରମୁଖ ଉକ୍ତ ଗ୍ରାମରେ ପହଞ୍ଚତ୍ଥିଲେ। ଅନୁରୂପ ଭାବେ ସୂଚନା ପାଇ ଦେବଗଡ଼ସ୍ଥିତ ଭୀମ ଆର୍ମୀର ସ୍ବେଚ୍ଛାସେବୀ ରିଙ୍କୁ ବେହେରା, ପରମାନନ୍ଦ କୁସୁମ, ବିକାଶ ରଣଜିତ୍, ସୁନୀଲ ନାଏକ ଓ କେଦାର ରଣା ସେଠାରେ ପହଞ୍ଚତ୍ଥିଲେ। ପୂର୍ବତନ ସମିତି ସଦସ୍ୟ ଗଡ଼ନାୟକଙ୍କ ସହାୟତାରେ ଜେସିବି ସହାୟତାରେ ଗ୍ରାମ ମଶାଣିରେ ଗାତ ଖୋଳାଯାଇଥିଲା। ପରେ ଉପରୋକ୍ତ ସ୍ବେଚ୍ଛାସେବୀ ପ୍ରବଳ ବର୍ଷା ସତ୍ତ୍ୱେ ଅପରାହ୍ନ ପ୍ରାୟ ୨ଟାରେ ବାସନ୍ତୀଙ୍କ ମୃତଦେହକୁ କଦଳୀଗଛରେ ସୁସଜ୍ଜିତ ଏକ ଖଟ ଦ୍ୱାରା ମଶାଣିକୁ ଆଣି ଗାତରେ ପୋତି ଦେଇଥିଲେ। ସ୍ବେଚ୍ଛାସେବୀଙ୍କ ଏଭଳି କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।