ବଲାଙ୍ଗୀର,୨୮ା୧୦(ସୁନିଲ କୁମାର ମହାନ୍ତି): ବଲାଙ୍ଗୀର ଲୋୟର ସୁକତେଲ ଡ଼୍ୟାମ ପ୍ରକଳ୍ପର ବିସ୍ଥାପିତ ମାନଙ୍କ ମୌଳିକ ଆବଶ୍ୟକତା ଓ ଅଧିକାର ପୂରଣ ନ କରିବା ପ୍ରତିବାଦରେ ବୁଧବାର ଝାଙ୍କରପାଲି ପୁନର୍ବାସ କଲୋନୀ ସମ୍ମୁଖ ବଲାଙ୍ଗୀର-ପାଟଣାଗଡ ୪୨ ନମ୍ବର ରାଜ୍ୟ ରାଜପଥକୁ ସହସ୍ରାଧିକ ବିସ୍ଥାପିତ ଛାତ୍ରୀଛାତ୍ର, ମହିଳା ଓ ପୁରୁଷ ରାସ୍ତାରୋକୋ କରିଛନ୍ତି। ସକାଳ ୮ଟାରୁ ରାସ୍ତାରୋକୋ ଜାରି ରହିଛି। ଶିକ୍ଷା, ସ୍ବାସ୍ଥ୍ୟ, ପାନୀୟ ଜଳ ଭଳି ମୌଳିକ ଆବଶ୍ୟକତା ପୂରଣ କରିବାରେ ସରକାର ଓ ପ୍ରଶାସନ ଫେଲ ମାରିଛି। ବାରମ୍ବାର ଆପତ୍ତି, ଅଭିଯୋଗ ଓ ଦାବି ପରେ ମଧ୍ୟ ପ୍ରଶାସନ ବିସ୍ଥାପିତଙ୍କ କୌଣସି ଦାବିକୁ ପୂରଣ ନ କରିବାରୁ ଆଜି ରାସ୍ତାରୋକ ଆନ୍ଦୋଳନକୁ ଲୋକେ ଓହ୍ଳାଇ ଥିବା ମୀନକେତନ ଚାନ୍ଦ, ଯଜ୍ଞକର ବିଶ୍ୱାଳ, ଭରତ ସାହୁ, ବିନୟ ସାହୁ ଓ ଡାକ୍ତର ଗଡତ୍ୟା କହିଛନ୍ତି। ମଙ୍ଗଳବାର ଜିଲା ପ୍ରଶାସନ ଓ ଲୋୟର ସୁକତେଲ ପ୍ରକଳ୍ପ ଅଧିକାରୀ ମାନେ ବିଭିନ୍ନ ପ୍ରସଙ୍ଗରେ ବିସ୍ଥାପିତଙ୍କ ସହ ଆଲୋଚନା କରିଥିଲେ ମଧ୍ୟ ବିସ୍ଥାପିତମାନେ ଆନ୍ଦୋଳନ କରିବେ ବୋଲି ରୋକଠୋକ ଶୁଣାଇଥିଲେ ।
ସୂଚନାଯୋଗ୍ୟ, ଜିଲାବାସୀଙ୍କ ବୃହତ୍ତର ସ୍ବାର୍ଥ ପାଇଁ ଭିଟାମାଟି ଛାଡିଥିବା ଲୋୟର ସୁକ୍ତେଲ ବୃହତ୍ ଜଳସେଚନ ପ୍ରକଳ୍ପର ବିସ୍ଥାପିତମାନେ ଏବେ ମୌଳିକ ସମସ୍ୟା ଦେଇ ଗତି କରିବା ସହ ବହୁ କଷ୍ଟରେ ବିସ୍ଥାପିତ କଲୋନୀରେ ରହୁଛନ୍ତି। ବାରମ୍ବାର ଦାବି କରିବା ପରେ ମଧ୍ୟ ପ୍ରଶାସନ କୌଣସି ପ୍ରତିକାର ବ୍ୟବସ୍ଥା ନ କରିବାରୁ ବଲାଙ୍ଗୀର ସଦର ବ୍ଲକ ଝାଙ୍କରପାଲି ପୁନର୍ବାସ କଲେନୀ ଏବଂ ଗେଡାବାଞ୍ଜି ପୁନର୍ବାସ କଲୋନୀରେ ରହୁଥିବା ପ୍ରକଳ୍ପ ପ୍ରଭାବିତ ଗଡଶଙ୍କର ଡୁଙ୍ଗୁରିପାଲି ଓ ବିଜାପାଟି ଗଁାର ବିସ୍ଥାପିତମାନେ ଆନ୍ଦୋଳନ କରିଛନ୍ତି।
ଏହି ଆନ୍ଦୋଳନ ପାଇଁ ବିସ୍ଥାପିତମାନେ ପ୍ରଶାସନକୁ ଲିଖିତ ଜଣାଇ ପ୍ରସ୍ତୁତି ଚୂଡାନ୍ତ କରିଥିବା ଜାଣିବା ପରେ ମଙ୍ଗଳବାର ଜିଲା ପ୍ରଶାସନ ପକ୍ଷରୁ ବିସ୍ଥାପିତମାନଙ୍କ ସହ ଏକ ଆଲୋଚନା ବୈଠକ କରାଯାଇଥିଲା। ସ୍ଥାନୀୟ ଲୋୟର ସୁକ୍ତେଲ ପ୍ରକଳ୍ପ ମୁଖ୍ୟ ନିର୍ମାଣ ଯନ୍ତ୍ରୀଙ୍କ କାର୍ଯ୍ୟାଳୟସ୍ଥିତ ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ଉପଜିଲାପାଳ ଆଲୋକ ପଟେଲ, ମୁଖ୍ୟ ନିର୍ମାଣ ଯନ୍ତ୍ରୀ ଇଂ ସୁରେନ୍ଦ୍ର କୁମାର ଭୋଇ ଓ ଅନ୍ୟ ଅଧିକାରୀଙ୍କ ଉପସ୍ଥିତିରେ ବିସ୍ଥାପିତ ପ୍ରତିନିଧିମାନେ ଯୋଗଦାନ କରିଥିଲେ। ବିସ୍ଥାପିତମାନେ ସେମାନଙ୍କ ୧୩ ଦଫା ଦାବି ଉପରେ ପ୍ରଶ୍ନ କରିଥିଲେ।
ବିସ୍ଥାପିତ ହେବାର ପ୍ରାୟ ତିନିବର୍ଷ ହୋଇଯାଇଥିଲେ ମଧ୍ୟ ଝାଙ୍କରପାଲି ଏବଂ ଗେଡାବାଞ୍ଜି ପୁନର୍ବାସ କଲୋନୀରେ ସ୍କୁଲ ନ ଥିବାରୁ ଛାତ୍ରୀଛାତ୍ରଙ୍କ ପାଠାପଢ଼ା ଠପ୍ ହୋଇଯାଇଛି। ପାନୀୟ ଜଳ ଯୋଗାଣ ଓ ସ୍ବାସ୍ଥ୍ୟକେନ୍ଦ୍ର ସୁବିଧା ନାହିଁ। ଏଠାରେ ବନ୍ଧ କି ପୋଖରୀ ଖୋଳା ଯାଇନାହିଁ। ନିକଟସ୍ଥ ନାଳାରେ ଚେକ୍ଡ୍ୟାମ୍ ତିଆରି ନଁାରେ ଟଙ୍କା ଆତ୍ମସାତ କରାଯାଇଛି। ଅଙ୍ଗନୱାଡି କେନ୍ଦ୍ର ଥିଲେ ମଧ୍ୟ ସେଠାକୁ ରାସ୍ତା ନାହିଁ ବୋଲି କହିଥିଲେ। ଏହାସହିତ ଗେଡାବାଞ୍ଜି ଓ ଝାଙ୍କରପାଲି ପୁନର୍ବାସ କଲେନୀ ମଧ୍ୟରେ ଏକ ରାସ୍ତା ତିଆରି, ବେକାର ଯୁବକଙ୍କୁ ନିଯୁକ୍ତି, ଜଗନ୍ନାଥ ମନ୍ଦିର ନିର୍ମାଣ, ପୋଲିସ ଫାଣ୍ଡି ଓ ମାର୍କେଟ କମ୍ପ୍ଲେକ୍ସ ପ୍ରତିଷ୍ଠା କରିବାକୁ ଦାବି କରିଛନ୍ତି। ଉପଜିଲାପାଳ ପଟେଲ ଓ ମୁଖ୍ୟ ନିର୍ମାଣ ଯନ୍ତ୍ରୀ ଭୋଇ ବିସ୍ଥାପିତଙ୍କୁ ବୁଝାଶୁଝା କହିଥିଲେ ମଧ୍ୟ ବିସ୍ଥାପିତ ସନ୍ତୋଷ ପ୍ରକାଶ କରି ନ ଥିଲେ। ସେମାନେ ବୁଧବାର ରାସ୍ତାରୋକୋ କରିବେ ବୋଲି କହିଥିଲେ। ଏହି ବୈଠକରେ ସଦର ଥାନା ଆଇଆଇସି ରାଜକୁମାର ବିଶ୍ୱାଳ, ବିସ୍ଥାପିତଙ୍କ ପ୍ରତିନିଧି ଯଜ୍ଞକର ବିଶ୍ୱାଳ, ମୀନକେତନ ଚାନ୍ଦ, ବିନୟ ସାହୁ, ଭରତ ସାହୁ, ରାଜେନ୍ଦ୍ର ଗଡତ୍ୟା, ରାମପ୍ରସାଦ ଚାନ୍ଦ, ବିକାଶ ସାହୁ, ଯୋଗେନ୍ଦ୍ର ସେଠ୍, ବିହାରୀ ସେଠ୍, ଦୁଃଖେଶ୍ୱର ସାହୁ ପ୍ରମୁଖ ଉପସ୍ଥିତ ଥିଲେ।