ଯଦି ଘର ସଜାଇବା ପସନ୍ଦ, ହେଲେ ଏଥିପାଇଁ ଅଧିକ ଅର୍ଥ ବ୍ୟୟ କରିବାକୁ ନ ଚାହାନ୍ତି ତେବେ ଆପଣ ଚାହିଁଲେ ଅଳ୍ପ ଖର୍ଚ୍ଚରେ କେତେକ ସାମଗ୍ରୀ ବ୍ୟବହାର କରି ଏକ କଳାତ୍ମକ ରୂପରେ ଓ୍ବାଲ୍ ଡେକୋରେଶନ୍ କରିପାରିବେ। ଜାଣି ରଖନ୍ତୁ ଟିପ୍ସ…
ଘର ସଜାଇବା ଲାଗି ଓ୍ବାଲ୍ ହ୍ୟାଙ୍ଗିଙ୍ଗ୍ ବିଶେଷ କରି ପେଣ୍ଟିଂ ଏକ ବେଷ୍ଟ ଅପ୍ସନ। ଯଦି ଆପଣ ବି ଏହାକୁ ଲଗାଇବାକୁ ଚାହୁଁଛନ୍ତି ତେବେ କେବଳ ଯେ କୌଣସି ଦାମୀ ପେଣ୍ଟିଂ କିଣିବେ ତା’ ନୁହେଁ, ବରଂ ଘରେ ଥିବା ପୁରୁଣା ଫଟୋ ଫ୍ରେମ୍ରେ କୌଣସି ସୁନ୍ଦର ପ୍ରିଣ୍ଟେଡ୍ ଓ୍ବାଲ୍ପେପର୍, କ୍ୟାଲେଣ୍ଡର ଆଦି କାଟି ପୁନର୍ବାର ବ୍ୟବହାର କରିପାରିବେ। ନିଜେ ମଧ୍ୟ ପେଣ୍ଟିଂ କିମ୍ବା ପ୍ୟାଚ୍ ଓ୍ବାର୍କ କରି କାନ୍ଥରେ ଲଗାଇ ପାରିବେ। ବିଶେଷ କରି ଲିଭିଂ ଏବଂ ଷ୍ଟଡି ରୁମ୍ ଓ୍ବାଲ୍ ଡେକୋରେଶନ୍ ଲାଗି ଏସବୁ ବେଶି ସୁନ୍ଦର ଲାଗିଥାଏ।
ସାମାନ୍ୟ ବୁଦ୍ଧି ପ୍ରୟୋଗ କରି ଆପଣ ବ୍ୟବହାର ନ ହେଉଥିବା କୌଣସି ସୁନ୍ଦର କପଡ଼ାକୁ ମଧ୍ୟ ଓ୍ବାଲ୍ ଡେକୋରେଶନ୍ ଲାଗି ବ୍ୟବହାର କରିପାରିବେ। କପଡ଼ାର ବେସ୍ ରଙ୍ଗ କାନ୍ଥ ରଙ୍ଗ ସହିତ ମ୍ୟାଚ୍ କରୁଥିଲେ ଡିଜାଇନ ଅଧିକ ସୁନ୍ଦର ଏବଂ କଣ୍ଟ୍ରାଷ୍ଟ ଲାଗିବ। ଏହାଦ୍ୱାରା କମ୍ ଖର୍ଚ୍ଚରେ ଆପଣଙ୍କ ଘର ଖୁବ୍ ସୁନ୍ଦର ଲାଗିପାରିବ।
ଆପଣଙ୍କର ଆର୍ଟ କିମ୍ବା କ୍ରାଫ୍ଟ ଓ୍ବାର୍କ ଉପରେ ଜ୍ଞାନ ଥିଲେ କମ୍ ବଜେଟରେ ଘର ସଜାଇବା ଖୁବ୍ ସହଜ ହେବ। ଆପଣ ଥର୍ମୋକୁଲ୍ କିମ୍ବା ଆଇସ୍କ୍ରିମ୍ ଷ୍ଟିକ୍ରେ ଓ୍ବାଲ୍ ହ୍ୟାଙ୍ଗିଙ୍ଗ ଫ୍ଲାଓ୍ବାର ଭେସ୍ ପ୍ରସ୍ତୁତ କରି ସେଥିରେ ସୁନ୍ଦର ରଙ୍ଗର ଫୁଲ ରଖି ପାରିବେ। ଏହା ମଧ୍ୟ ଆପଣଙ୍କ ଘରର କାନ୍ଥକୁ ଅଧିକ ସୁନ୍ଦର କରିବ।
ନିଜର ପୁରୁଣା କୌଣସି ସୁନ୍ଦର ଶାଢ଼ି କିମ୍ବା ଏମ୍ବ୍ରଏଡୋରି, ବୁଣା ହୋଇଥିବା କପଡ଼ାକୁ ବଡ଼ ଓ ଲମ୍ବା କାର୍ଡବୋର୍ଡ ଉପରେ ଲଗାଇ କାନ୍ଥରେ ଟଙ୍ଗାଇ ପାରିବେ। ବିଶେଷ କରି ଡ୍ରଇଂ ରୁମ୍, ବଡ଼ ହଲ୍ କିମ୍ବା ବାରଣ୍ଡାରେ ଏହାକୁ ଲଗାଇଲେ ରୟାଲ୍ ଲୁକ୍ ମିଳିଥାଏ।
ବର୍ତ୍ତମାନ ଓ୍ବାଲ୍ ଡେକୋରେଶନ୍ ଲାଗି ଅନେକେ ଟାଇଲ୍ ବ୍ୟବହାର କରୁଛନ୍ତି। ହେଲେ ଏଥିପାଇଁ ଅଧିକ ଖର୍ଚ୍ଚ ହୋଇଥାଏ। ତେଣୁ ଯଦି ଆପଣ ଏଥିପାଇଁ ଇଚ୍ଛୁକ ତେବେ ଏହା ବଦଳରେ କମ୍ ବଜେଟରେ ଓ୍ବାଲ୍ ପେପର ଲଗାଇ ଘର ଇଣ୍ଟେରିଅର୍ ଲୁକ୍ ସୁନ୍ଦର କରିପାରିବେ।