ରାଜନଗର,୬ା୧(ଭାସ୍କର ରାଉତରାୟ): କେନ୍ଦ୍ରାପଡ଼ା ଜିଲା ରାଜନଗର ବ୍ଲକରେ ନୂଆ କରି ବିଡିଓ ଭାବରେ ଯୋଗ ଦେଇଥିବା ତିଳୋତ୍ତମା ପୃଷ୍ଟିଙ୍କୁ ରାଜନଗର ଭାଜପା ନେତା ଲଳିତ ବେହେରା ଆକ୍ରମଣ ଘଟଣାରେ ରାଜନୈତିକ ଉଷ୍ଣତା ଉଗ୍ରରୂପ ଧାରଣ କରୁଛି। ପ୍ରତିବାଦ କରିବା ସହ ଲଳିତ ବେହେରାଙ୍କ ସମେତ ୧୭ ଜଣଙ୍କୁ ଗିରଫ କରା ନ ଯିବା ଯାଏ ରାଜନଗର ସରପଞ୍ଚ ସଂଘର ସଭାପତି ଅଶୋକ କୁମାର ମହାନ୍ତି, ଅଧ୍ୟକ୍ଷା ପ୍ରତିଭା ପାତ୍ର ପ୍ରମୁଖ ସମସ୍ତ ସରପଞ୍ଚ, ସମିତିସଭ୍ୟ ସୋମବାରଠାରୁ ବ୍ଲକ କାର୍ଯ୍ୟାଳୟରେ ତାଲା ପକାଇ ଧାରଣାରେ ବସିଛନ୍ତି । ଶାସକ ଦଳର ଚାପରେ ଜିଲା ପ୍ରଶାସନ ଏବଂ ପୋଲିସ ନୀରବଦ୍ରଷ୍ଟା ସାଜିଥିବାରୁ ଏହି ଧାରଣା ଧିରେ ଧିରେ ଗଣଆନ୍ଦୋଳନର ରୂପ ନେଉଛି । ଆଜି ଧାରଣାରେ ଦଳର କର୍ମମାନେ ନୈତିକ ସମର୍ଥନ ଦେଉଥିବା ଦେଖିବାକୁ ମିଳିଛି ।
ଏ ସମ୍ପର୍କରେ ବ୍ଲକ ଅଧ୍ୟକ୍ଷା ଶ୍ରୀମତି ପାତ୍ର ଭାଜପା ଡବଲ ଇଞ୍ଜିନ ସରକାର ମହିଳାଙ୍କ ପ୍ରତି ଅସମ୍ମାନ କରୁଥିବାରୁ ନୈତିକତା ଦୃଷ୍ଟିରୁ ସେମାନେ ପଦ ଛାଡନ୍ତୁ ବୋଲି କହିଛନ୍ତି । ଆମ ଏତଲାକୁ ପୋଲିସ ଗ୍ରହଣ କରି ତୁରନ୍ତ ପଦକ୍ଷେପ ନ ନେଲେ ବ୍ଲକ ସାରା ଆନ୍ଦୋଳନ କରାଯିବ ବୋଲି କହିଛନ୍ତି । ମାନ୍ୟବର ମୁଖ୍ୟମନ୍ତ୍ରୀ ଏ ସମ୍ପର୍କରେ ଜାଣି ବି ଅଜଣା ରହୁଛନ୍ତି । ବାରମ୍ବାର ବିଡିଓଙ୍କୁ ଭାଜପା କର୍ମୀମାନେ ମାନସିକ ଯନ୍ତ୍ରଣା ଦେବା ଗଣତନ୍ତ୍ରକୁ ହତ୍ୟା କରାଯାଉଥିବାରୁ ଏହାକୁ ବରଦାସ୍ତ କରାଯିବ ନାହିଁ ବୋଲି ସରପଞ୍ଚ ସଂଘ କହିଛି।