ରାୟପୁର,୩।୧୨: ରାଞ୍ଚି ଦିନିକିଆରେ ଏକ ଚମତ୍କାର ଶତକ ସହିତ ବିରାଟ କୋହଲି ତାଙ୍କ ପ୍ରଶଂସକଙ୍କ ହୃଦୟ ଜିତିଥିଲେ। କିନ୍ତୁ ରାୟପୁରରେ ସେ ଏପରି କିଛି କରିଛନ୍ତି, ଯାହାକୁ ତାଙ୍କ ପ୍ରଶଂସକମାନେ ସହଜେ ବିଶ୍ୱାସ କରିପାରୁ ନାହାନ୍ତି। ବିରାଟ କୋହଲି ରାୟପୁର ଦିନିକିଆରେ ଏକ ଛକା ମାରି ନିଜର ଖାତା ଖୋଲିଥିଲେ। ଏହା ତାଙ୍କର ସାଧାରଣ ଶୈଳୀରୁ ଏକ ଭିନ୍ନ ଦୃଶ୍ୟ ଥିଲା। ଏହାସହ ପ୍ରଥମଥର ସେ ଦିନିକିଆରେ ଛକା ମାରି ଖାତା ଖୋଲିଥିଲେ। ସାଧାରଣତଃ, କୋହଲି ସିଙ୍ଗଲ୍ସ, ଡବଲ୍ସ କିମ୍ବା ଚୌକା ସହିତ ନିଜର ଖାତା ଖୋଲିଥାନ୍ତି। କିନ୍ତୁ ରାୟପୁରରେ ଏକ ଉଲ୍ଲେଖନୀୟ ସଟ ସହିତ ପ୍ରଥମ ରନ କରିଥିଲେ।
ବିରାଟ କୋହଲି ଲୁଙ୍ଗି ଏନଗିଡିଙ୍କ ବଲ୍ରେ ନିଜର ଖାତା ଖୋଲିଥିଲେ। ଦ୍ରୁତ ବୋଲର ତାଙ୍କ ଛାତି ଆଡ଼କୁ ଏକ ସର୍ଟ ବଲ୍ ପକାଇଥିଲେ, ଯାହାକୁ ବିରାଟ ଟାଣି ସ୍କୋୟାର ଲେଗ ବାଉଣ୍ଡରୀ ବାହାରକୁ ପଠାଇଥିଲେ। ଏହି ଛକା ୮୦ ମିଟର ଉପରେ ଯାଇଥିଲା। ସାଧାରଣତଃ, ବିରାଟ କୋହଲି ଏହି ସଟ ଲୋୟର୍ ବିଡଥ ଉଇକେଟ୍ ଆଡକୁ ଖେଳନ୍ତି, କିନ୍ତୁ ଏଥର ତାଙ୍କ ଉଦ୍ଦେଶ୍ୟ ଭିନ୍ନ ଥିଲା।
ବିରାଟ କୋହଲି ରାଞ୍ଚିରେ ହିଁ ତାଙ୍କର ମନୋଭାବ ବଦଳାଇଥିଲେ। ଏହି ଖେଳାଳି ସେହି ମ୍ୟାଚ୍ରେ ଆସିବା ମାତ୍ରେ ଦୁଇଟି ଛକା ମାରିଥିଲେ। ବିରାଟ ମ୍ୟାଚ୍ରେ ୧୩୫ ରନ କରିଥିଲେ ଏବଂ ମୋଟ ୭ଟି ଛକା ମାରିଥିଲେ। କୋହଲି ସାଧାରଣତଃ ଚୌକା ମାରିଥାନ୍ତି, କିନ୍ତୁ ଏହି ଖେଳାଳି ଏବେ ତାଙ୍କ ଖେଳ ବଦଳାଇ ଦେଇଛନ୍ତି। ସେ ଅଧିକ ଆକ୍ରମଣାତ୍ମକ ଖେଳୁଛନ୍ତି।