ବରଗଡ଼,୩।୧୨(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟାକୁ ୫ ଦିନ ବିତି ଯାଇଛି। ଏହାସତ୍ତ୍ୱେ ଧାନ ଉଠାଣ ନେଇ ଚାଷୀମାନେ ଆଶଙ୍କାରେ ରହିଛନ୍ତି। ମଙ୍ଗଳବାର ବରଗଡ଼ ନିୟନ୍ତ୍ରିତ ବଜାର କମିଟି(ଆର୍ଏମ୍ସି) ଅଧୀନ କଲାପାଣି ମଣ୍ଡିରେ ଉପଜିଲାପାଳ ପ୍ରସନ୍ନ କୁମାର ପାଣ୍ଡେ ଏବଂ ସମବାୟ ସମିତି ସମୂହ, ବରଗଡ଼ର ଉପନିବନ୍ଧକ(ଡିଆରସିଏସ୍) ଯୁଗଳ କିଶୋର ଦାଶ ଲିଖିତ ପ୍ରତିଶ୍ରୁତି ଦେବା ପରେ ଧାନ ଉଠାଣ ନେଇ ଆଶା ଦେଖାଯାଇଛି। କଲାପାଣି ମଣ୍ଡିରେ ନଡ଼ିଆ ଭାଙ୍ଗି ଅଧିକାରୀମାନେ ଧାନ ଉଠାଣର ଶୁଭାରମ୍ଭ କରିଥିଲେ। ମାତ୍ର ଏବେ ମଧ୍ୟ ଧାନ ଉଠାଣ ସହିତ ଟୋକନ, ପଞ୍ଜୀକରଣ ସମସ୍ୟା ଟଳି ନାହିଁ ଏବଂ ଜିଲାର ଚାଷୀ ମହଲରେ ଚାପା ଅସନ୍ତୋଷ ଲାଗି ରହିଛି।
ଜିଲାରେ ଗତମାସ ୨୮ତାରିଖରୁ ମଣ୍ଡି ଗୁଡ଼ିକ ଖୋଲାଯାଇଛି। ଧାନ ସଂଗ୍ରହ ପାଇଁ ଜିଲାରେ ସମୁଦାୟ ୨୩୦ଟି ମଣ୍ଡି ଖୋଲିଛି। ଇତିମଧ୍ୟରେ ଜିଲାର ଅତାବିରା, ଗୋଡ଼ଭଗା ଏବଂ କଲାପାଣି ମଣ୍ଡିରୁ ଧାନ ଉଠାଣ ହୋଇଛି। ମାତ୍ର ସେଠାରେ ହୋଇଥିବା ଧାନକ୍ରୟ ଏବଂ ଉଠାଣ ଧର୍ମକୁ ଆଖିଠାର ଭଳି ହୋଇଛି। ହଜାର ହଜାର ବସ୍ତା ଧାନରେ ମଣ୍ଡି ଗୁଡ଼ିକ ଭର୍ତ୍ତି ହୋଇସାରିଛି। ମାତ୍ର ଏପର୍ଯ୍ୟନ୍ତ ଦୁଇ, ତିନିଜଣ ଚାଷୀଙ୍କ ୭୫କୁଇଣ୍ଟାଲ ଲେଖାଏଁ ଧାନ କିଣାଯାଇ ତାକୁ ଉଠାଯାଇଛି। ଫଳରେ ଏବେ ମଧ୍ୟ ଧାନବିକ୍ରି, ଉଠାଣ ନେଇ ଅନିଶ୍ଚିତତା ଲାଗି ରହଛି। ଫଳରେ ଚାଷୀମାନେ କୌଣସି ମୁହୂର୍ତ୍ତରେ ଆନ୍ଦୋଳନକୁ ଓହ୍ଲାଇବାର ଆଶଙ୍କା ମଧ୍ୟ ଉପୁଜିଛି। ସୋମବାର ଭଳି ମଙ୍ଗଳବାର ସକାଳୁ ମଧ୍ୟ ସଯୁକ୍ତ କୃଷକ ସଂଗଠନ ନେତୃତ୍ୱରେ ଜିଲାର ବିଭିନ୍ନ ଅଞ୍ଚଳର ଚାଷୀ, ଚାଷୀ ପ୍ରତିନିଧିମାନେ କଲାପାଣି ମଣ୍ଡିରେ ସମବେତ ହୋଇଥିଲେ। ସେଠାରେ ପ୍ରଶାସନ ସହିତ ଚାଷୀମାନଙ୍କ ଦ୍ୱିପାକ୍ଷିକ ଆଲୋଚନା ହୋଇଥିଲା। ଧାନବିକ୍ରିରେ ଅଚଳାବସ୍ଥାକୁ ନେଇ ଚାଷୀ ପ୍ରତିନିଧିମାନେ ଆଲୋଚନାରେ ଉଦବେଗ ପ୍ରକାଶ କରିଥିଲେ। ଏହା ସହିତ ଉପସ୍ଥିତ ଉପଜିଲାପାଳ ଏବଂ ଡିଆର୍ସିଏସ୍ଙ୍କ ସମ୍ମୁଖରେ ଚାଷୀମାନେ ୫ଦଫା ଦାବି ରଖିଥିଲେ। ଦାବି ଗୁଡ଼ିକ ଶୁଣିବା ପରେ ଅଧିକାରୀବୃନ୍ଦ ସେ ନେଇ ଲିଖିତ ପ୍ରତିଶ୍ରୁତି ଦେଇଥିଲେ। ପ୍ରତିଶ୍ରୁତିରେ ଉଲ୍ଲେଖ ରହିଛି, ଧାନକ୍ରୟ ପାଇଁ ପି-ପାସ୍ ବ୍ୟବସ୍ଥା କରାଯାଇଛି ଏବଂ ପଞ୍ଜୀକୃତରୁ ବାଦ୍ ପଡ଼ିଥିବା ଚାଷୀଙ୍କ ତାଲିକା ଉଚ୍ଚ ଅଧିକାରୀଙ୍କ ଅନୁମୋଦନ ପାଇଁ ପଠାଯାଇଛି। ଏହାସତ୍ତ୍ୱେ ଅଭିଯୋଗ ଦାଖଲ ପାଇଁ ଟୋଲ ଫ୍ରି ନଂ-୧୯୬୭ ଜାରି କରାଯାଇଛି। ସେହିପରି ଚଳିତବର୍ଷ ଜିଲାର ୨୩୦ ଧାନକ୍ରୟ କେନ୍ଦ୍ର(ମଣ୍ଡି)ରେ ୫୮ପ୍ରାଥମିକ କୃଷି ସମବାୟ ସମିତି(ପାକ୍ସ) ଚାଷୀଙ୍କଠାରୁ ସିଧାସଳଖ ଧାନ କିଣିବାର ବ୍ୟବସ୍ଥା କରାଯାଇଥିବା ଅଧିକାରୀମାନେ ସୂଚନା ଦେଇଥିଲେ। ବର୍ଦ୍ଧିତ ୬୯ଟଙ୍କାର ସହାୟକ ମୂଲ୍ୟ ବାବଦରେ ସଂଯୁକ୍ତ କୃଷକ ସଙ୍ଗଠନ ଦେଇଥିବା ସ୍ମାରକପତ୍ରକୁ ଜିଲାପାଳଙ୍କ ମାଧ୍ୟମରେ ସରକାରଙ୍କ ପାଖକୁ ପଠାଯିବ ଏବଂ ମଣ୍ଡିରେ ପଡ଼ିଥିବା ଧାନକୁ ୪୮ଘଣ୍ଟା ମଧ୍ୟରେ କିଣିବାକୁ ଚେଷ୍ଟା କରିବାକୁ ମଧ୍ୟ ସେମାନେ ପ୍ରତିଶ୍ରୁତି ଦେଇଛନ୍ତି। ଏହା ସହିତ ଧାନର ମାନ ନିରୀକ୍ଷଣ ପାଇଁ ମିଲର୍ସଙ୍କ କୌଣସି ସହଯୋଗ ନିଆଯିବ ନାହିଁ ଏବଂ ଜାନୁୟାରୀ ମାସ ଶେଷ ସୁଦ୍ଧା ସମସ୍ତ ଚାଷୀଙ୍କର ଧାନକୁ ଟୋକନ ଅନୁଯାୟୀ କିଣାଯିବ ବୋଲି ଲିଖିତ ପ୍ରତିଶ୍ରୁତିରେ ଉଲ୍ଲେଖ ରହିଛି। ତେବେ ଏହି ପ୍ରତିଶ୍ରୁତି କେତେଶୀଘ୍ର କାର୍ଯ୍ୟକାରୀ ହେଉଛି, ତାକୁ ଚାଷୀମାନେ ଚାହିଁ ବସିଛନ୍ତି। ଦ୍ୱିପାକ୍ଷିକ ଆଲୋଚନାରେ ଚାଷୀ ପ୍ରତିନିଧିମାନେ ରମେଶ ମହାପାତ୍ର, ଉପତ୍ନ୍ନ କୁମାର ଭୋଇ, ଅଜିତ ଶତପଥୀ, ଏକାଦଶିଆ ସାହୁ, ସୁରେଶ ନେକାଣ୍ଟି, ଅରବିନ୍ଦ ପଣ୍ଡା ପ୍ରମୁଖ ଉପସ୍ଥିତ ଥିଲେ।