ବାଣପୁର,୯।୨(ଦିଲ୍ଲୀପ କୁମାର ସ୍ବାଇଁ): ଯୌତୁକ ଜୁଇରେ ପୁଣି ଜଣେ ବଧୂ। ଶାଶୁ ଘର ନିର୍ଯାତନା ଦେବା ସହ ବଧୂକୁ ଜୀବନରେ ମାରି ଦେଇଥିବା ଅଭିଯୋଗ ହୋଇଛି। ପୋଲିସ ମୃତଦେହ ଜବତ କରିବା ସହ ଘଟଣାର ତଦନ୍ତ ଚଳାଇଛି।
ଘଟଣାରୁ ପ୍ରକାଶ ଯେ, ପ୍ରାୟ ୫ ବର୍ଷ ପୂର୍ବେ ଟାଙ୍ଗୀ ଥାନା ପାରିଓରଡ଼ ଗ୍ରାମର ବୈକୁଣ୍ଠ ସାହୁ(୬୮)ଙ୍କ ସାନ ଝିଅ ଜ୍ୟୋତ୍ସ୍ନା ସାହୁ, ନାଚୁଣୀଥାନା ବଉଳାବନ୍ଧ ଗ୍ରାମର ମୃତ ପଦ୍ମ ସାହୁଙ୍କ ବଡ଼ ପୁଅ ହରି ସାହୁ (୩୫)ଙ୍କୁ ବିବାହ କରିଥିଲେ। ତାଙ୍କର ଦୁଇଟି ସନ୍ତାନ ଗୋଟିଏ ଝିଅ (୩ ବର୍ଷ) ପୁଅ (୧ ବର୍ଷ) I ବାହାଘର ସମୟରେ ଶ୍ୱଶୁର ଘର ଦାବି ମୁତାବକ ସମସ୍ତ ଯୌତୁକ ସାମଗ୍ରୀ ପ୍ରଦାନ କରାଯାଇଥିଲା। ବିବାହର କିଛି ବର୍ଷ ଭଲରେ କଟିଥିଲା। ତେବେ ଶାଶୁ ଘର ଲୋକ ୨ ଲକ୍ଷ ଟଙ୍କା ଆଣିବା ପାଇଁ ଜ୍ୟୋତ୍ସ୍ନାକୁ ଚାପ ପକାଉଥିଲେ। ପରେ ପରେ ପରିବାରରେ ଦେଖା ଦେଇଥିଲା ମନୋମାଳିନ୍ୟ । ହରି ବିଭିନ୍ନ ସମୟରେ ପତ୍ନୀ ଜ୍ୟୋତ୍ସ୍ନାଙ୍କୁ ମାରଧର କରିବା ସହ ଗାଳିଗୁଲଜ କରନ୍ତି । ଜ୍ୟୋତ୍ସ୍ନା ସମସ୍ତ କଥା ବାପଘରେ ଜଣାଉଥିଲେ ମଧ୍ୟ ବାପଘରର ଆର୍ଥିକ ଅବସ୍ଥା ସ୍ବଚ୍ଛଳ ନ ଥିବାରୁ ବାଧ୍ୟ ହୋଇ ସମସ୍ତ ନିର୍ଯାତନା ସହି ଯାଉଥିଲେ।
ଏପରିସ୍ଥିତିରେ ସୋମବାର ଜ୍ୟୋତ୍ସ୍ନା ମରିଯାଇଥିବା ଗ୍ରାମବାସୀଙ୍କଠାରୁ ସୂଚନା ପାଇ ବାପଘର ଲୋକେ ହରି ସାହୁଙ୍କ ଘରେ ପହଞ୍ଚି ଦେଖିଥିଲେ। ଜ୍ୟୋତ୍ସ୍ନାଙ୍କ ମୃତଦେହ ଦେଖିବାକୁ ପାଇଥିଲେ। ତେବେ ଶାଶୁ ଘର ଲୋକେ ଜ୍ୟୋତ୍ସ୍ନାକୁ ଜୀବନରେ ମାରିଦେଇଥିବା ତାଙ୍କ ବାପା ବୈକୁଣ୍ଠ ସାହୁ ନାଚୁଣୀ ଥାନାରେ ଜ୍ୱାଇଁ ହରି ସାହୁ, ଦିଅର ଦେବ ସାହୁ (୩୦), ସାନ ଯା’ ପୂଜା ସାହୁ (୨୮), ନଣନ୍ଦ ରିତା ସାହୁ (୩୨)ଙ୍କ ନାମରେ ଅଭିଯୋଗ କରିଥିଲେ । ଅଭିଯୋଗ କ୍ରମେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଥିବା ଥାନା ଅଧିକାରୀ ଚନ୍ଦ୍ରଶେଖର ଜେନା କହିଛନ୍ତି I