ପାଠପଢ଼ା ପରେ ଭଲ ଜବ୍ଟିଏ ପାଇବାର ଲକ୍ଷ୍ୟ କାହାର ବା ନ ଥାଏ! ହେଲେ କେବେ ଜଣେ ଭଲ ଶିକ୍ଷାର୍ଥୀକୁ ସଫଳ ହେବାରେ ଅର୍ଥ ବାଧକ ସାଜେ ତ ଆଉ କେବେ କାହାକୁ ଅଭିଜ୍ଞତା ଅଭାବରୁ ନିରାଶ ହେବାକୁ ପଡ଼େ। କିନ୍ତୁ ବର୍ତ୍ତମାନ ସମୟରେ ବିଭିନ୍ନ କ୍ଷେତ୍ରରେ ଯୁବତୀଯୁବକଙ୍କ ଲାଗି ଉପଲବ୍ଧ ଥିବା ପାର୍ଟ-ଟାଇମ୍ ଜବ୍ର ସୁଯୋଗ ଏଭଳି ସମସ୍ୟା ସମାଧାନରେ ବେଶ୍ ସହାୟକ ହୋଇପାରୁଛି…
ବର୍ତ୍ତମାନ ବିଭିନ୍ନ କ୍ଷେତ୍ରରେ ପାଠପଢ଼ା ସହ ପାର୍ଟ-ଟାଇମ୍ ଜବ୍ କରିବାର ସୁଯୋଗ ରହିଛି। ଅଧିକାଂଶ ଯୁବପିଢ଼ି ଏହାର ଭରପୂର ସୁଯୋଗ ମଧ୍ୟ ନେଉଛନ୍ତି। ଏହାଦ୍ୱାରା କେହି କେହି ନିଜ ରୋଜଗାରରେ ବାହାରେ ରହିବା, ଖାଇବା ସହ ହାୟରଷ୍ଟଡି ଖର୍ଚ୍ଚ ତୁଲାଇବାରେ ସକ୍ଷମ ହୋଇପାରୁଥିବା ବେଳେ ଆଉ କେହି ଏଥିରୁ ଅଭିଜ୍ଞତା ସାଉଣ୍ଟି ନିଜ କ୍ୟାରିୟରରେ ସଫଳତା ହାସଲ କରିବାର ମାର୍ଗକୁ ସୁଦୃଢ଼ କରିପାରୁଛନ୍ତି…
ଟାଇମ୍ ମ୍ୟାନେଜ୍ମେଣ୍ଟ: ସମୟର ସଦୁପଯୋଗ କରିବା କଳା ଶିଖିଥିବା ଯୁବପିଢ଼ିଙ୍କ ପାଇଁ ଭବିଷ୍ୟତରେ ସଫଳତା ହାସଲ କରିବାର ମାର୍ଗ ଅଧିକ ସହଜ ଓ ସରଳ ହୋଇଯାଏ। ପାର୍ଟ-ଟାଇମ୍ ଜବ୍ କରିବା ଦ୍ବାରା ପାଠପଢ଼ା ଏବଂ ଜବ୍ ଉଭୟ ମଧ୍ୟରେ ସମନ୍ବୟ ରଖି ଅନ୍ୟାନ୍ୟ କାର୍ଯ୍ୟ ଲାଗି ସମୟ ବାହାର କରିବାକୁ ହୋଇଥାଏ। ଫଳରେ ଟାଇମ୍ ମ୍ୟାନେଜ୍ମେଣ୍ଟ କଳା ବୃଦ୍ଧି ପାଇଥାଏ, ଯାହାକି ଭବିଷ୍ୟତରେ ବେଶ୍ କାମରେ ଆସିଥାଏ।
ମିଳେ ରୋଜଗାରକ୍ଷମ ହେବାର ଆନନ୍ଦ: ପାଠପଢ଼ା ସହ ପାର୍ଟ-ଟାଇମ୍ ଜବ୍ କରିବା ଦ୍ୱାରା ଅର୍ଥ ରୋଜଗାର କରିବା ଦ୍ୱାରା ପରିବାର ଉପରେ ନିର୍ଭର ନ କରି ପଢ଼ାଠାରୁ ଆରମ୍ଭ କରି ନିଜର ବିଭିନ୍ନ ଖର୍ଚ୍ଚ ନିଜେ ତୁଲାଇବା ସହଜ ହୋଇଥାଏ, ଯାହାକି ଆତ୍ମସନ୍ତୋଷ ଦେବା ସହ ଆତ୍ମବିଶ୍ୱାସ ବୃଦ୍ଧି କରିଥାଏ। ଏଥିରୁ କିଛି ଭବିଷ୍ୟତ ପାଇଁ ସଞ୍ଚୟ କରିବା ଏବଂ ଆବଶ୍ୟକ ସ୍ଥଳେ ପରିବାରକୁ ସାହାଯ୍ୟ କରିବାର ଆନନ୍ଦ ମଧ୍ୟ ମିଳିଥାଏ। ତେବେ ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ପାର୍ଟ-ଟାଇମ୍ ଜବ୍ କରି ଅର୍ଥ ରୋଜଗାର କରିବା ନିଶାରେ ଆବଶ୍ୟକତାଠାରୁ ଅଧିକ ସମୟ କାମ କରିବା ବି ଠିକ୍ ନୁହେଁ। କାରଣ ଏହାଦ୍ବାରା ଖାଇବା ଏବଂ ଶୋଇବାରେ ଅବହେଳା ହେଲେ ବିଭିନ୍ନ ସ୍ବାସ୍ଥ୍ୟ ସମସ୍ୟା ଦେଖାଦେବାର ଆଶଙ୍କା ବି ରହିଛି।
ବୃଦ୍ଧି ପାଏ ଏକ୍ସପେରିଏନ୍ସ: ଜଣେ ଫ୍ରେଶର ଅପେକ୍ଷା ଏକ୍ସପେରିଏନ୍ସ ଥିବା ଏମ୍ପ୍ଲୋୟୀଙ୍କୁ ସବୁ କାର୍ଯ୍ୟାଳୟରେ ପ୍ରାଥମିକତା ଦିଆଯାଇଥାଏ। ତେଣୁ ପଢ଼ା ପରେ ଜବ୍ କରିବା ଅପେକ୍ଷା ଅନେକେ ବର୍ତ୍ତମାନ ପଢ଼ା ସହ ନିଜର ଫାଙ୍କା ସମୟକୁ ସଦୁପଯୋଗ କରି ବିଭିନ୍ନ ପାର୍ଟ-ଟାଇମ୍ ଜବ୍ କରୁଛନ୍ତି। ଏହାଦ୍ୱାରା ପଢ଼ା ସରିବା ବେଳକୁ ଅଭିଜ୍ଞତା ସହ କାର୍ଯ୍ୟଦକ୍ଷତା ମଧ୍ୟ ବୃଦ୍ଧି ହୋଇପାରୁଛି। ତେଣୁ ନିଜ ପଢ଼ା ସହିତ ପାର୍ଟ-ଟାଇମ୍ ଜବ୍ ସୁଯୋଗ ମିଳିଲେ ହାତଛଡ଼ା ନ କରି ଏହାର ସଦୁପଯୋଗ କରନ୍ତୁ। କାରଣ ଏଥିରୁ ମିଳୁଥିବା ଜ୍ଞାନ ଏବଂ ଏକ୍ସପେରିଏନ୍ସ ସାର୍ଟିଫିକେଟ୍ ପରବର୍ତ୍ତୀ ସମୟରେ ବେଶ୍ କାମରେ ଆସିବ। ହେଲେ ମନେରଖନ୍ତୁ ପାର୍ଟ-ଟାଇମ୍ ଜବ୍ କରି ଅଧିକ ଏକ୍ସପେରିଏନ୍ସ ପାଇବା ଆଳରେ ଆବଶ୍ୟକତାଠାରୁ ଅଧିକ ସମୟ କାମ କରିବା ବି ଠିକ୍ ନୁହେଁ। କାରଣ ଏହାଦ୍ବାରା ପାଠପଢ଼ା ବ୍ୟାହତ ହୋଇପାରେ, ଯାହାକି ଭବିଷ୍ୟତରେ କ୍ୟାରିୟର ଉପରେ ନକାରାତ୍ମକ ପ୍ରଭାବ ପକାଇପାରେ।
କାମରେ ଆସେ ପ୍ରାକ୍ଟିକାଲ ଜ୍ଞାନ: ପ୍ରାକ୍ଟିକାଲ ଜ୍ଞାନ କର୍ମକ୍ଷେତ୍ରରେ ସବୁଠୁ ଅଧିକ କାମରେ ଆସିଥାଏ। କାରଣ ଅନେକ ସମୟରେ ଦେଖାଯାଏ ପାଠପଢ଼ାରେ ଭଲ ନମ୍ବର ରଖି ଉତ୍ତୀର୍ଣ୍ଣ ହେଉଥିବା ଛାତ୍ରୀଛାତ୍ର କର୍ମକ୍ଷେତ୍ରରେ ବିଫଳ ହେଉଥିବା ବେଳେ ତାଙ୍କଠୁ କମ୍ ନମ୍ବର ରଖିଥିବା ଛାତ୍ରୀଛାତ୍ର କର୍ମକ୍ଷେତ୍ରରେ ଖୁବ୍ ଆଗକୁ ବଢ଼ିଯାଆନ୍ତି। ଏହାର ମୁଖ୍ୟ କାରଣ ହେଉଛି ପ୍ରାକ୍ଟିକାଲ୍ ଜ୍ଞାନର ଅଭାବ। ତେଣୁ ପାଠପଢ଼ାକୁ କାମରେ ଲଗାଇବା କୌଶଳ ଜାଣିବା ଦରକାର। ବର୍ତ୍ତମାନ ଏଥିପାଇଁ ପାର୍ଟ-ଟାଇମ୍ ଜବ୍ ଅନେକଙ୍କୁ ବେଶ୍ ସହାୟକ ହୋଇପାରୁଛି। ତା’ଛଡା ପାର୍ଟ-ଟାଇମ୍ ଜବ୍ ସର୍ବଦା ନିଜ ଫିଲ୍ଡରେ ହିଁ ଯେ ମିଳିବ ତାହା ସମ୍ଭବ ନୁହେଁ। ତେଣୁ ଅଧିକାଂଶ ଯୁବତୀଯୁବକ ଅନ୍ୟାନ୍ୟ କ୍ଷେତ୍ରରେ ବିଶେଷ କରି ନିଜର ରୁଚି ଥିବା କ୍ଷେତ୍ରରେ ଜବ୍ କରିଥା’ନ୍ତି, ଯଦ୍ଦ୍ବାରା ସେମାନଙ୍କଠାରେ ଏକାଧିକ କ୍ଷେତ୍ରରେ ଅଭିଜ୍ଞତା ବୃଦ୍ଧି ପାଇଥାଏ। ଫଳରେ ସେମାନେ ପଢ଼ା ସମୟରୁ ହିଁ ଏକାଧିକ କାର୍ଯ୍ୟଶୈଳୀ ବିଷୟରେ ଜ୍ଞାନ ଆହରଣ କରିପାରୁଛନ୍ତି ଏବଂ ଯଥା ସମୟରେ ନିଜର କାର୍ଯ୍ୟଦକ୍ଷତା ପ୍ରଦର୍ଶନ କରି ସଫଳ ହୋଇପାରୁଛନ୍ତି।
ମିଳେ ଭଲ ଜବ୍ର ସୁଯୋଗ: ପାର୍ଟ-ଟାଇମ୍ ଜବ୍ ଯେ କେବଳ ରୋଜଗାର କରିବା ଏବଂ ଅଭିଜ୍ଞତା ବଢ଼ାଇବାରେ ସାହାଯ୍ୟ କରେ ତା’ ନୁହେଁ, ବରଂ ଏହାଦ୍ବାରା କେବେକେବେ ଉକ୍ତ ସଂସ୍ଥାକୁ ଆପଣଙ୍କ କାର୍ଯ୍ୟ ପସନ୍ଦ ଆସୁଥିଲେ ସେଠାରେ ହିଁ ଭଲ ଜବ୍ ମିଳିବାର ଯଥେଷ୍ଟ ସମ୍ଭାବନା ରହିଥାଏ। ତା’ଛଡ଼ା ପାଠପଢ଼ା ସାରି ଜବ୍ କରିବା ଦ୍ବାରା ସମ୍ପୂର୍ଣ୍ଣ ଏକ ନୂଆ ଦୁନିଆରେ କାର୍ଯ୍ୟ କରିବା ବେଳେ ଅନେକଙ୍କୁ ବିଭିନ୍ନ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ହେଲେ ପୂର୍ବରୁ ଯେଉଁମାନେ ପାର୍ଟ-ଟାଇମ୍ ଜବ୍ କରିଥା’ନ୍ତି, ସେମାନଙ୍କଠାରେ କିଛି ଲୋକସମ୍ପର୍କ ବଢ଼ିବା ସହ ଅଭିଜ୍ଞତା ଥିବାରୁ ଭବିଷ୍ୟତରେ ଅନ୍ୟ ସ୍ଥାନରେ ଜବ୍ ମିଳିବା ସହଜ ହୋଇଥାଏ।