ମୁମ୍ବାଇ,୨୦ା୮: ଭାରତୀୟ କ୍ରିକେଟରେ ପୃଥ୍ୱୀ ଶ’, ଯିଏ ଏକଦା ସଚିନ ତେନ୍ଦୁଲକରଙ୍କ ଉତ୍ତରାଧିକାରୀ ଭାବେ ଗଣା ଯାଉଥିଲେ, ଗତ କିଛି ବର୍ଷରେ ଅନେକ ପ୍ରତିବନ୍ଧକ ସତ୍ତ୍ୱେ ପୁନର୍ବାର ନିଜକୁ ଗଢ଼ିବାକୁ ଚେଷ୍ଟା କରୁଛନ୍ତି। ୨୫ ବର୍ଷୀୟ ଏହି ଓପନିଂ ବ୍ୟାଟର ବୁଚି ବାବୁ ଟୁର୍ନାମେଣ୍ଟରେ ଛତିଶଗଡ଼ ବିପକ୍ଷରେ ଏକ ଦ୍ରୁତ ଶତକ ହାସଲ କରିଛନ୍ତି। ତେବେ, ୧୯ ବର୍ଷରୁ କମ୍ ଭାରତୀୟ ଦଳରେ ଥିବା ସମୟରେ ପାଇଥିବା ପୂର୍ବତନ ଓ ବର୍ତ୍ତମାନର କ୍ରିକେଟରଙ୍କ ସମର୍ଥନ ତାଙ୍କୁ ଏବେ ମିଳୁନାହିଁ।
ମଙ୍ଗଳବାର ଖେଳ ଶେଷ ପରେ ପୃଥ୍ୱୀ କହିଛନ୍ତି, “ମୁଁ ପୁଣି ଶୂନରୁ ଆରମ୍ଭ କରୁଛି। ଜୀବନରେ ଅନେକ ଉତ୍ଥାନ-ପତନ ଦେଖିଛି। ମୁଁ ନିଜ ଉପରେ ଓ ମୋ କାର୍ଯ୍ୟଶୈଳୀ ଉପରେ ଆତ୍ମବିଶ୍ୱାସୀ। ମୁଁ ଆଶା କରୁଛି ଏହି ସିଜନ ମୋ ଓ ମୋ ଦଳ ପାଇଁ ଭଲ ହେବ।”
ସେ ଆହୁରି କହିଛନ୍ତି, “ମୁଁ କିଛି ବଦଳାଇବାକୁ ଚାହୁଁନାହିଁ। ୧୯ ବର୍ଷରୁ କମ୍ ଦଳ ପାଇଁ ଖେଳିବା ବେଳେ ଯେଉଁ ମୌଳିକ ଜିନିଷ ମୋତେ ଭାରତୀୟ ଦଳରେ ସ୍ଥାନ ଦେଇଥିଲା, ସେହିଗୁଡ଼ିକୁ ପୁଣି ଫେରିଛି। ଅଧିକ ଅଭ୍ୟାସ, ଜିମ, ଦୌଡ଼ିବା ଭଳି ଛୋଟ ଛୋଟ ଜିନିଷ ଯାହା ମୁଁ ୧୨-୧୩ ବର୍ଷ ବୟସରୁ କରୁଛି।”
୨୦୨୧ରେ ଶେଷ ଥର ଭାରତ ପାଇଁ ଖେଳିଥିବା ପୃଥ୍ୱୀ ସୋସିଆଲ ମିଡିଆରୁ ଦୂରେଇ ରହୁଥିବା କହିଛନ୍ତି, ଯେଉଁଠାରେ ସେ ପୂର୍ବରୁ ଅନେକ ଟ୍ରୋଲିଂର ଶିକାର ହୋଇଛନ୍ତି। ସେ କହିଛନ୍ତି, “ମୁଁ ନିଜେ ହେବାକୁ ଚେଷ୍ଟା କରୁଛି ଏବଂ ସୋସିଆଲ ମିଡିଆ ଭଳି ବିଭ୍ରାନ୍ତିକର ଜିନିଷରୁ ଦୂରେଇ ରହୁଛି। ଏବେ ସୋସିଆଲ ମିଡିଆ ବେଶ୍ ଖରାପ। ଏହା ନ ବ୍ୟବହାର କଲେ ଶାନ୍ତି ମିଳେ।”
ବର୍ତ୍ତମାନର କିମ୍ବା ପୂର୍ବତନ ଭାରତୀୟ ଖେଳାଳିଙ୍କ ସମର୍ଥନ ବିଷୟରେ ପଚରାଯିବାରେ ପୃଥ୍ୱୀ କହିଛନ୍ତି, “ମୋତେ କାହାର ସହାନୁଭୂତି ଦରକାର ନାହିଁ। ମୋ ପିତାମାତା ଓ ସାଙ୍ଗମାନେ, ଯେଉଁମାନେ ମୋ ମାନସିକ ଅବସାଦ ସମୟରେ ମୋ ସାଙ୍ଗରେ ଥିଲେ, ସେମାନଙ୍କ ସମର୍ଥନ ମୋ ପାଇଁ ଯଥେଷ୍ଟ।”