ଡାମାସ୍କସ୍/ଜେରୁଜେଲମ,୧୭ା୭: ଇସ୍ରାଏଲୀ ସେନା ବୁଧବାର ସିରିଆର ରାଜଧାନୀ ଡାମାସ୍କସ୍ରେ ଏୟାର ଷ୍ଟ୍ରାଇକ୍ କରିଛି। ଦକ୍ଷିଣ ସିରିଆର ସୁଓ୍ବେଦା ସହରରେ ସ୍ଥାନୀୟ ସୁରକ୍ଷା ବାହିନୀ ଏବଂ ଡ୍ରୁଜ୍ ସମୁଦାୟର ବିଦ୍ରୋହୀଙ୍କ ମଧ୍ୟରେ ସଂଘର୍ଷ ଘଟଣାର ଠିକ୍ ପରେ ଇସ୍ରାଏଲ ପକ୍ଷରୁ ଏହି ଆକ୍ରମଣ କରାଯାଇଛି। ଡାମାସ୍କସ୍ରେ ଥିବା ସିରିଆ ପ୍ରତିରକ୍ଷା ମନ୍ତ୍ରଣାଳୟର ଏଣ୍ଟ୍ରି ଗେଟ୍, ସିରୀୟ ସୈନ୍ୟ ମୁଖ୍ୟାଳୟ ପରିସର ଏବଂ ରାଷ୍ଟ୍ରପତି ଭବନ ନିକଟରେ ଥିବା ସୈନ୍ୟ ଲକ୍ଷ୍ୟସ୍ଥଳକୁ ଟାର୍ଗେଟ କରାଯାଇ ଏୟାର ଷ୍ଟ୍ରାଇକ କରାଯାଇଥିବା ନେଇ ଇସ୍ରାଏଲୀ ସେନା କହିଛି। ସିରିଆରେ ଥିବା ଡ୍ରୁଜ୍ ଅଳ୍ପସଂଖ୍ୟକ ସମୁଦାୟକୁ ସ୍ଥାନୀୟ ସୈନିକଙ୍କ ଆକ୍ରମଣରୁ ବଞ୍ଚାଇବା ଉଦ୍ଦେଶ୍ୟରେ ଏହି ଆକ୍ରମଣ କରାଯାଇଛି। ଦକ୍ଷିଣ ସିରିଆରେ ଡ୍ରୁଜ୍ ନାଗରିକଙ୍କ ନରସଂହାରକୁ ସବୁବେଳେ ବିରୋଧ କରାଯିବ ବୋଲି ଇସ୍ରାଏଲ କହିଛି। ସ୍ଥାନୀୟ ଗଣମାଧ୍ୟମର ସୂଚନା ମୁତାବକ ସିରୀୟ ପ୍ରତିରକ୍ଷା ମନ୍ତ୍ରଣାଳୟର ଭବନ ଉପରେ ବୁଧବାର ଅତି କମ୍ରେ ୨ ଥର ଡ୍ରୋନ୍ ଆକ୍ରମଣ ହୋଇଛି, ଫଳରେ ଅଧିକାରୀମାନେ ବେସ୍ମେଣ୍ଟରେ ଲୁଚି ରହିଛନ୍ତି। ଏହି ଆକ୍ରମଣରେ ସିରିଆର ପ୍ରତିରକ୍ଷା ମନ୍ତ୍ରଣାଳୟ ଭବନ କ୍ଷତିଗ୍ରସ୍ତ ହୋଇଛି। ଏୟାର ଷ୍ଟ୍ରାଇକ୍ରେ ୧୩ ଜଣ ଆହତ ହୋଇଥିବା ନେଇ ସିରୀୟ ସ୍ବାସ୍ଥ୍ୟ ମନ୍ତ୍ରଣାଳୟ ସୂଚନା ଦେଇଛି।