ଲଇକେରା, ୫।୨(ରଞ୍ଜନ କୁମାର ମେହେର ): ଝାରସୁଗୁଡା ଜିଲାରେ ବର୍ତ୍ତମାନ ଧାନ କିଣାକୁ ନେଇ ଘୋର ଅବ୍ୟବସ୍ଥା ଲାଗି ରହିଛି। ଗୁରୁବାର ସକାଳୁ ମଣ୍ଡିକୁ ଟ୍ରାକ୍ଟରରେ ଧାନ ନେବା ବେଳେ ଜିଲା ଯୋଗାଣ ଅଧିକାରୀ ଦୁର୍ଗା ଚରଣ ଭେସ୍ରାଙ୍କ ସହିତ ଯୋଗାଣ ବିଭାଗର ୮ଜଣ କର୍ମଚାରୀଙ୍କୁ ଉତ୍ୟକ୍ତ ଚାଷୀମାନେ ଝରିଆବାହାଳ ଠାରେ ଅଟକ ରଖିଛନ୍ତି। ବର୍ତ୍ତମାନ ଝାରସୁଗୁଡା ଜିଲାରେ ଧାନ ବିକିବାକୁ ହେଲେ ଚାଷୀଙ୍କ ଘରେ ଧାନ ନିହାତି ରହିବା ଦରକାର ଏବଂ ଧାନ ସହିତ ଚାଷୀଙ୍କ ଫଟୋ ଟ୍ୟାଗ କରିବା ପାଇଁ ଜିଲା ପ୍ରଶାସନ ନିଷ୍ପତ୍ତି ନେଇଥିବା ଘଟଣାକୁ ଜିଲା କୃଷକ ସଂଗଠନ ବିରୋଧ କରିଛି। ଗୁରୁବାର ଜିଲା ସାରା କୃଷକମାନେ ଯୋଗାଣ ବିଭାଗର ବିରୋଧରେ ପ୍ରତିବାଦ କରୁଥିବା ଜଣାପଡିଛି। ଧାନ ଗାଡି ଛାଡିବା, ମଣ୍ଡିଗୁଡିକୁ ଟାର୍ଗେଟ ପ୍ରଦାନ ନ କରିବା ପର୍ଯ୍ୟନ୍ତ ଅଧିକାରୀଙ୍କୁ ଛଡାଯିବ ନାହିଁ ବୋଲି ଚାଷୀମାନେ ପ୍ରକାଶ କରିଛନ୍ତି।