ଗୋଲ୍ଡ କୋଷ୍ଟ(ଅଷ୍ଟ୍ରେଲିଆ),୯।୩: ମହିଳା ଏସିଆନ କପ୍ ଶେଷ ଗ୍ରୁପ୍ ମ୍ୟାଚରେ ଇରାନ ଫୁଟ୍ବଲ ଦଳ ଏହାର ଅନ୍ତିମ ଗ୍ରୁପ୍ ମ୍ୟାଚ ହାରିଯିବାପରେ ସ୍ବଦେଶ ପ୍ରତ୍ୟାବର୍ତ୍ତନ ପାଇଁ ବର୍ତ୍ତମାନ ଅଡୁଆରେ ପଡ଼ିଯାଇଛି।
ଫେବୃଆରୀ ୨୮ରେ ଇରାନ ଉପରେ ଆମେରିକା-ଇସ୍ରାଏଲ ଆକ୍ରମଣ ପୂର୍ବରୁ ମହାଦେଶୀୟ ଚାମ୍ପିୟନଶିପ୍ ଖେଳିବା ଲାଗି ଇରାନ ମହିଳା ଦଳ ଗତମାସରେ ଅଷ୍ଟ୍ରେଲିଆରେ ପହଞ୍ଚିଥିଲା। ଗ୍ରୁପ୍ ପର୍ଯ୍ୟାୟ ମ୍ୟାଚ ଶେଷ ହେବାକ୍ଷଣି ପରାଜିତ ଦଳ କିଛି ଦିନ ମଧ୍ୟରେ ସ୍ବଦେଶ ଫେରିଯାଇଥାନ୍ତି।
ଆୟୋଜକଗଣ ଇରାନ ଦଳର ପ୍ରସ୍ଥାନ ଉପରେ କୌଣସି ତଥ୍ୟ ପ୍ରଦାନ କରିନାହାନ୍ତି। ମାତ୍ର ଅଷ୍ଟ୍ରେଲିଆର ନ୍ୟାଶନାଲ ଏଜେନ୍ସିକୁ ଏକ ସାକ୍ଷାତ୍କାରରେ ଇରାନର ମୁଖ୍ୟ କୋଚ୍ ମାର୍ଜିୟେ ଜାଫାରି କହିଛନ୍ତି, ସେମାନେ ଯଥାଶୀଘ୍ର ଇରାନ ଫେରିଯିବାକୁ ଚାହାନ୍ତି।
ଦେଶର ଘଡ଼ିସନ୍ଧି ମୁହୂର୍ତ୍ତରେ ସେ ତାଙ୍କ ଦେଶ ଓ ପରିବାର ସହ ରହିବାକୁ ପସନ୍ଦ କରିବେ। ଗତ ସୋମବାର ଓପନିଂ ମ୍ୟାଚରେ ଦକ୍ଷିଣ କୋରିଆଠାରୁ ପରାଜିତ ହେବା ପୂର୍ବରୁ ଜାତୀୟ ସଙ୍ଗୀତ ଗାନ ବେଳେ ଦଳର ନୀରବତାକୁ ନେଇ ନାନା କଥା ଶୁଣିବାକୁ ମିଳିଥିଲା।
କେତେକ ଏହା ପ୍ରତିରୋଧରର କାର୍ଯ୍ୟ ବୋଲି ମନେ କରିଥିବା ବେଳେ ଅନ୍ୟ କେତେକ ଶୋକ ପ୍ରଦର୍ଶନ ଭାଗରେ ଦେଖିଥିଲେ। କିନ୍ତୁ ଗତ ଗୁରୁବାର ଅଷ୍ଟ୍ରେଲିଆ ନିକଟରୁ ୪-୦ରେ ପରାଜୟ ଏବଂ ରବିବାର ଫିଲିପାଇନ୍ସଠାରୁ ୨-୦ରେ ପରାଜୟ ମ୍ୟାଚ ବେଳେ ଖେଳାଳିମାନେ ଜାତୀୟ ସଙ୍ଗୀତ ଗାନ ସହ ସାଲ୍ୟୁଟ କରିବାର ଦୃଶ୍ୟ ଦେଖିବାକୁ ମଳିଥିଲା।
ଇରାନ ମହିଳା ଦଳ ଯଦି ଫିଲିପାଇନ୍ସକୁ ହରାଇ ଦେଇଥାନ୍ତା ତେବେ ଦଳର ଏସିଆନ କପ୍ କ୍ୱାର୍ଟରଫାଇନାଲ ସମ୍ଭାବନା ସୃଷ୍ଟି ହୋଇଥାନ୍ତା, ଯାହା ଫଳରେ ଏହି ଦଳ ଅଷ୍ଟ୍ରେଲିଆରେ ଆଉ ଏକ ସପ୍ତାହରୁ ଅଧିକ ଦିନ ଅବସ୍ଥାନ କରିପାରିଥାନ୍ତା।