ଢାକା,୩୧ା୩: ଭାରତର ପ୍ରସାରଣକାରୀ ସଂସ୍ଥା ଜିଓଷ୍ଟାର ବାଂଲାଦେଶରେ ଚଳିତ ବର୍ଷର ଆଇପିଏଲ୍ ପ୍ରସାରଣ ଚୁକ୍ତିକୁ ବରଖାସ୍ତ କରିଛି। ସ୍ଥାନୀୟ ସାଥି କମ୍ପାନୀ ପାଉଣା ଦେବାରେ ବିଫଳ ହୋଇଥିବାରୁ ଜିଓଷ୍ଟାର ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି।
ଗତ ଜାନୁଆରୀରେ ବିସିସିଆଇର ନିର୍ଦ୍ଦେଶକ୍ରମେ କୋଲକାତା ନାଇଟ୍ ରାଇଡର୍ସ ମୁସ୍ତାଫିଜୁର ରହମାନଙ୍କୁ ବାଦ୍ ଦେବା ପରେ ବାଂଲାଦେଶରେ ଆଇପିଏଲ୍ ପ୍ରସାରଣକୁ ବ୍ୟାନ କରାଯାଇଥିଲା। ମାତ୍ର ବର୍ତ୍ତମାନ ବାଂଲାଦେଶ ବ୍ୟାନ ନିଷ୍ପତ୍ତିକୁ ପୁନଃ ବିଚାର କରୁଛି। ହେଲେ ଜିଓଷ୍ଟାର ଚୁକ୍ତିକୁ ବାତିଲ କରିଥିବାରୁ ଚଳିତ ଆଇପିଏଲ୍କୁ କୌଣସି ସ୍ଥାନୀୟ ଚ୍ୟାନେଲ ପ୍ରସାରଣ କରିପାରିବେ ନାହିଁ।
ପ୍ରସାରଣକାରୀ ଚ୍ୟାନେଲ ଟିସ୍ପୋଟର୍ସକୁ ଗତ ଫେବୃଆରୀ ୧୭ ତାରିଖରେ ଜିଓ ଷ୍ଟାର ପକ୍ଷରୁ ପଠାଯାଇଥିବା ମେଲରେ ଚୁକ୍ତିକୁ ତୁରନ୍ତ ବରଖାସ୍ତ କରାଯାଉଥିବା ଉଲ୍ଲେଖ ରହିଥିଲା। ଟିସ୍ପୋଟର୍ସ ୨୦୨୩ରୁ ୨୦୨୭ ପର୍ଯ୍ୟନ୍ତ ବାଂଲାଦେଶରେ ଆଇପିଏଲ ପ୍ରସାରଣ ଲାଗି ଜିଓଷ୍ଟାରଠାରୁ ଲାଇସେନ୍ସ ନେଇଥିଲା। ହେଲେ ଟିସ୍ପୋଟର୍ସ ଚୁକ୍ତି ଅନୁଯାୟୀ, ନିର୍ଦ୍ଧାରିତ ସମୟରେ ପାଉଣା ଦେବାରେ ବିଫଳ ହୋଇଥିଲା।