ଇସଲାମାବାଦ,୪।୧୧: ରାଷ୍ଟ୍ରାୟତ୍ତ ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସ (PIA)ର କାର୍ଯ୍ୟ ଗୁରୁତର ଭାବରେ ବାଧାପ୍ରାପ୍ତ ହୋଇଛି। ଇଞ୍ଜିନିୟରମାନେ ବିମାନ ପାଇଁ ଉଡ଼ାଣ କ୍ଲିୟରାନ୍ସକୁ ସ୍ଥଗିତ ରଖିଛନ୍ତି।
ଏହା ୧୨ ରୁ ଅଧିକ PIA ଅନ୍ତର୍ଜାତୀୟ ବିମାନକୁ ପ୍ରଭାବିତ କରିଛି। ପାକିସ୍ତାନର ବିଭିନ୍ନ ବିମାନବନ୍ଦରରେ ବହୁ ସଂଖ୍ୟକ ଯାତ୍ରୀ ଫସି ରହିଛନ୍ତି, ଯେଉଁଥିରେ ଉଲ୍ଲେଖନୀୟ ସଂଖ୍ୟକ ଉମରାହ ତୀର୍ଥଯାତ୍ରୀ ମଧ୍ୟ ସାମିଲ ଅଛନ୍ତି। ପାକିସ୍ତାନୀ ନ୍ୟୁଜ ଚ୍ୟାନେଲ ଦୁନିଆ ନ୍ୟୁଜ ଅନୁଯାୟୀ, ଲାହୋରରୁ ମଦିନା, ଇସଲାମାବାଦ ଏବଂ କରାଚୀରୁ ଜେଦ୍ଦାହକୁ ଉଡ଼ାଣ ବାଧାପ୍ରାପ୍ତ ହୋଇଛି।
ଏକ ରିପୋର୍ଟ ଅନୁଯାୟୀ, ସୋମବାର ରାତି ପ୍ରାୟ ୮ଟା ପରଠାରୁ PIAର ଗୋଟିଏ ବି ଅନ୍ତର୍ଜାତୀୟ ବିମାନ ଉଡ଼ାଣ କରିନାହିଁ। ସୋସାଇଟି ଅଫ ଏୟାରକ୍ରାଫ୍ଟ ଇଞ୍ଜିନିୟର୍ସ ଅଫ ପାକିସ୍ତାନ (SAEP) କହିଛି ଯେ ଗତ ଆଠ ବର୍ଷ ମଧ୍ୟରେ ସେମାନଙ୍କର ଦରମା ବୃଦ୍ଧି କରାଯାଇ ନାହିଁ। ପୂର୍ବରୁ, ଇଞ୍ଜିନିୟରମାନେ ଅନେକ ମାସ ଧରି କଳା ପଟି ପିନ୍ଧି କାମ କରୁଥିଲେ, କିନ୍ତୁ ଏୟାରଲାଇନ୍ସରୁ କେହି ସେମାନଙ୍କ ସହିତ କଥା ହେବାକୁ ଇଚ୍ଛୁକ ନଥିଲେ।
ସମ୍ପୂର୍ଣ୍ଣ ଧର୍ମଘଟ ପରେ ମଧ୍ୟ, PIAର ମନୋଭାବରେ କୌଣସି ପରିବର୍ତ୍ତନ ହୋଇନାହିଁ। PIA ସିଇଓ କହିଛନ୍ତି ଯେ ଜାତୀୟ ବିମାନ କମ୍ପାନୀ ପାକିସ୍ତାନ ଅତ୍ୟାବଶ୍ୟକ ସେବା (ରକ୍ଷଣାବେକ୍ଷଣ) ଆଇନ, ୧୯୫୨ଅଧୀନରେ ଅଛି, ଯାହା ଧର୍ମଘଟକୁ ବେଆଇନ କରିଥାଏ। ସେ ଇଞ୍ଜିନିୟରମାନଙ୍କୁ କଠୋର ଆଇନଗତ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତ ରହିବାକୁ ଚେତାବନୀ ଦେଇଥିଲେ।
ସେହିପରି SAEP କହିଛି ଯେ ସିଇଓଙ୍କ ମନୋଭାବ ପରିବର୍ତ୍ତନ ନହେବା ପର୍ଯ୍ୟନ୍ତ କୌଣସି ଆଲୋଚନା ହେବ ନାହିଁ। PIAର ଜଣେ ମୁଖପାତ୍ର କହିଛନ୍ତି ଯେ ଆନ୍ଦୋଳନର ପ୍ରକୃତ ଉଦ୍ଦେଶ୍ୟ ହେଉଛି ଏୟାରଲାଇନ୍ସର ଘରୋଇକରଣକୁ ବିଫଳ କରିବା। ଅନ୍ୟ ଏକ ଏୟାରଲାଇନ୍ସରୁ ଇଞ୍ଜିନିୟରିଂ ସହାୟତା ପାଇ ଶୀଘ୍ର ଉଡ଼ାଣ ପୁନଃଆରମ୍ଭ କରିବା ପାଇଁ ପ୍ରୟାସ ଜାରି ରହିଛି ବୋଲି ଜଣାପଡ଼ିଛି।
Dharitri – The Largest & Most Trusted Odia Daily