ବେଙ୍ଗାଲୁରୁ,୩୦।୭: ଇନ୍ଫୋସିସ୍ ୨୦୨୫ରେ ପ୍ରାୟ ୨୦,୦୦୦ କଲେଜ ସ୍ନାତକଙ୍କୁ ନିଯୁକ୍ତ କରିବାକୁ ଯୋଜନା କରିଛି ବୋଲି ଦି ଟାଇମ୍ସ ଅଫ୍ ଇଣ୍ଡିଆ ରିପୋର୍ଟ କରିଛି। ସିଇଓ ସଲିଲ ପରେଖ କହିଛନ୍ତି, ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ କମ୍ପାନୀ ବର୍ତ୍ତମାନ ସୁଦ୍ଧା ୧୭,୦୦୦ରୁ ଅଧିକ ଲୋକଙ୍କୁ ନିଯୁକ୍ତ କରିସାରିଛି। କମ୍ପାନୀ ଆର୍ଟିଫିସିଆଲ ଇଣ୍ଟେଲିଜେନ୍ସ (AI) ଦକ୍ଷତା ବୃଦ୍ଧି ଓ ଦ୍ରୁତ ବଦଳୁଥିବା ଟେକ୍ନୋଲୋଜି କ୍ଷେତ୍ରରେ ଆଗୁଆ ରହିବାକୁ ଏହି ନିଯୁକ୍ତି ଉପରେ ଗୁରୁତ୍ୱ ଦେଇଛି।
ପରେଖ କହିଛନ୍ତି, ଇନ୍ଫୋସିସ୍ ଏଆଇରେ ପ୍ରାରମ୍ଭିକ ନିବେଶ କରିଛି ଏବଂ ଏପର୍ଯ୍ୟନ୍ତ ୨.୭୫ ଲକ୍ଷ କର୍ମଚାରୀଙ୍କୁ ଏଆଇ ଓ ସମ୍ପର୍କିତ କ୍ଷେତ୍ରରେ ତାଲିମ ଦେଇଛି। ଏଆଇ ସଫ୍ଟୱେୟାର ଡେଭେଲପମେଣ୍ଟରେ ୫%ରୁ ୧୫% ଉତ୍ପାଦନଶୀଳତା ବୃଦ୍ଧି କରିଛି ଏବଂ ଗ୍ରାହକ ସେବା ଓ ଜ୍ଞାନ-ଆଧାରିତ କାର୍ଯ୍ୟରେ ଆହୁରି ଅଧିକ ଉନ୍ନତି ଦେଖାଯାଇଛି। ସେ ଉଲ୍ଲେଖ କରିଛନ୍ତି ଯେ, ଇନ୍ଫୋସିସ୍ର କୋର ବ୍ୟାଙ୍କିଂ ପ୍ଲାଟଫର୍ମ ‘ଫିନାକଲ’ରେ ଅଟୋମେସନ ଓ ମାନବ ନିୟନ୍ତ୍ରଣର ମିଶ୍ରଣ ଦ୍ୱାରା ୨୦% ଉତ୍ପାଦନଶୀଳତା ବୃଦ୍ଧି ହୋଇଛି।
ଆଇଟି କ୍ଷେତ୍ରରେ ଅନିଶ୍ଚିତତା ମଧ୍ୟରେ ଏହି ନିଷ୍ପତ୍ତି ନିଆଯାଇଛି। ପ୍ରତିଦ୍ୱନ୍ଦୀ କମ୍ପାନୀ ଟାଟା କନସଲଟାନ୍ସି ସର୍ଭିସେସ (TCS) ନିକଟରେ ୧୨,୦୦୦ରୁ ଅଧିକ କର୍ମଚାରୀଙ୍କୁ ଛଟେଇ କରିଥିବା ବେଳେ, ନାସକମ୍ ମଙ୍ଗଳବାର କହିଛି ଯେ ପ୍ରୋଡକ୍ଟ-ଆଧାରିତ ଡେଲିଭରୀ ଓ ଗ୍ଲୋବାଲ କ୍ଲାଏଣ୍ଟଙ୍କ ଦ୍ରୁତ ସେବା ଚାହିଦା ହେତୁ କର୍ମଚାରୀ ସଂଖ୍ୟା “ଯୌକ୍ତିକୀକରଣ” ହୋଇପାରେ।
ଅନ୍ୟ କମ୍ପାନୀଗୁଡ଼ିକ ଖର୍ଚ୍ଚ ହ୍ରାସ ପାଇଁ ଛଟେଇ କରୁଥିବା ବେଳେ, ଇନ୍ଫୋସିସ୍ ନୂଆ ପ୍ରତିଭା ନିଯୁକ୍ତି ଓ କର୍ମଚାରୀଙ୍କ ଦକ୍ଷତା ବୃଦ୍ଧିରେ ନିବେଶ କରୁଛି। ପରେଖ କହିଛନ୍ତି, ଏଆଇ କାର୍ଯ୍ୟ ପ୍ରଣାଳୀକୁ ବଦଳାଇ ଦେଉଛି, କିନ୍ତୁ ଜଟିଳ ସିଷ୍ଟମରେ ମାନବ ଦକ୍ଷତା ଅପରିହାର୍ଯ୍ୟ। ଏହି ରଣନୀତି ଦୀର୍ଘମିଆଦି ଅଭିବୃଦ୍ଧି ଓ ଡିଜିଟାଲ ସେବାର ବଦଳୁଥିବା ଚାହିଦା ପୂରଣ ପାଇଁ ଇନ୍ଫୋସିସ୍ର ପ୍ରସ୍ତୁତିକୁ ସୂଚାଇଛି।