ନୂଆଦିଲ୍ଲୀ,୩୦।୧: କୃତ୍ରିମ ବୁଦ୍ଧିମତ୍ତାକୁ ନେଇ ବିଶ୍ୱସ୍ତରରେ ପ୍ରତିଯୋଗିତା ଜୋର୍ଦାର ହୋଇଥିବାବେଳେ ଭାରତ ନିଜସ୍ବ ମୌଳିକ ମଡେଲ୍ ପ୍ରସ୍ତୁତ କରିବା ନେଇ ଆଗ୍ରହ ପ୍ରକାଶ କରିଛି। ଷ୍ଟାର୍ଟଅପ୍ ଏବଂ ଗବେଷକମାନେ ଏଥିପାଇଁ ୧୮, ୬୯୩ ଗ୍ରାଫିକ୍ ପ୍ରୋସେସିଂ ୟୁନିଟ୍ (ଜିପିୟୁ)ର ସ୍ବଳ୍ପ ବ୍ୟୟସାପେକ୍ଷ ସାଧାରଣ କମ୍ପ୍ୟୁଟ୍ ସୁବିଧାକୁ ବ୍ୟବହାର କରିବେ। ଭାରତ ପ୍ରସ୍ତୁତ ମଡେଲ୍ ଚାଟ୍ଜିପିଟି ଏବଂ ଡିପ୍ସିକ୍ ଆର୍୧କୁ ଟକ୍କର ଦେଇପାରିବ ବୋଲି କୁହାଯାଇଛି। ଚାଇନା କମ୍ପାନୀ ଡିପ୍ସିକ୍ ସବୁଠୁ ଶସ୍ତା ଏଆଇ ମଡେଲ୍ ଆଣି ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବଜାରରେ ବିପ୍ଳବ ଆଣିଥିବାବେଳେ ଏହା ଆମେରିକୀୟ ଏଆଇ କମ୍ପାନୀଗୁଡ଼ିକ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଏଭଳି ସମୟରେ ଭାରତ ନିଜସ୍ବ ଏଆଇ ପ୍ରସ୍ତୁତ ପାଇଁ ଯୋଜନା କରିଛି।
ଭାରତ ବିଶ୍ୱସ୍ତରୀୟ ମୌଳିକ ମଡେଲ୍ ନିର୍ମାଣ କରିବା ନେଇ ସୂଚନା ଓ ପ୍ରଯୁକ୍ତି ନ୍ତ୍ରୀ ଅଶ୍ୱିନୀ ବୈଷ୍ଣବ ଦୃଢ଼ୋକ୍ତି ପ୍ରକାଶ କରିଛନ୍ତି। ଏହା ବିଶ୍ୱର ସର୍ବଶ୍ରେଷ୍ଠ ମଡେଲ ସହ ପ୍ରତିଦ୍ୱନ୍ଦ୍ୱିତା କରିବାକୁ ସକ୍ଷମ ହେବ। ନୂଆଦିଲ୍ଲୀ ଘୋଷଣା କରିଥିବା ଏଆଇ ବ୍ଲ୍ୟୁପ୍ରିଣ୍ଟର ପରବର୍ତ୍ତୀ ପଦକ୍ଷେପଗୁଡ଼ିକ ହେଲା ଜିଓ ପ୍ଲାଟ୍ଫର୍ମ, ସିଏମ୍ଏସ୍ କମ୍ପ୍ୟୁଟର, ଟାଟା କମ୍ୟୁନିକେଶନ୍ସ, ଇ୨ଇ ନେଟ୍ଓ୍ବର୍କ୍ସ, ୟୋଟ୍ଟା ଡେଟା ସର୍ଭିସେସ୍ ଓ ପ୍ୟାନେଲରେ ଥିବା ଅନ୍ୟ ବିଡରମାନଙ୍କ ଦ୍ୱରା ଅଫର ହୋଇଥିବା ୧୮,୬୯୩ ଜିପିୟୁ; ଏଆଇ ସୁରକ୍ଷା ଅନୁଷ୍ଠାନ ସହ ଏହା ଅଧୀନରେ ଅନୁମୋଦିତ ୮ ପ୍ରକଳ୍ପ। ଭାରତର ନିଜସ୍ବ ମୌଳିକ ଏଆଇ ମଡେଲ୍ ବିକାଶ ପାଇଁ ସରକାରଙ୍କ ପକ୍ଷରୁ ପ୍ରସ୍ତାବ ଆହ୍ବାନ କରାଯାଇଛି, ଯେଉଁଥିରେ ଭାରତୀୟ ପ୍ରସଙ୍ଗ, ଭାଷା, ସଂସ୍କୃତି ରହିବ। ମୂଳତଃ ଡେଟାସେଟ୍ଗୁଡ଼ିକ ଆମ ଦେଶ ପାଇଁ, ଦେଶର ଏବଂ ଆମ ନାଗରିକମାନଙ୍କ ପାଇଁ ହେବ ବୋଲି କୁହାଯାଇଛି।
ଇଣ୍ଡିଆ ଏଆଇ ମିଶନ ଅଧୀନରେ ସରକାର ୧୦,୩୭୨ କୋଟି ଟଙ୍କା ମଞ୍ଜୁର କରିଥିଲେ, ଯାହା ଏଆଇ ଇକୋସିଷ୍ଟମକୁ ସୁଦୃଢ଼ କରିବ। ଏହାର ଅନ୍ୟତମ ମୁଖ୍ୟ ସ୍ତମ୍ଭ ଏଆଇ କମ୍ପ୍ୟଟ୍ ଭିତ୍ତିଭୂମି ପାଇଁ ୧୦,୦୦୦ ଜିପିୟୁ ସକ୍ଷମ କରାଇବ। ୧୮,୬୯୩ ଜିପିୟୁ ବୃହତ୍ କମ୍ପ୍ୟୁଟ୍ କ୍ଷମତା ଦେବ। ଡିପ୍ସିକ୍ରେ ୨,୦୦୦ ଜିପିୟୁ ବ୍ୟବହାର ହୋଇଥିବାବେଳେ ଚାଟ୍ଜିପିଟିର ଭର୍ସନ-୪ରେ ୨୫,୦୦୦ ଜିପିୟୁ ଲାଗିଛି।