ନୂଆଦିଲ୍ଲୀ,୪।୧୦: କ୍ଲାଇମେଟ୍ ଆକ୍ଟିଭିଷ୍ଟ ସୋନମ ଓ୍ବାଙ୍ଗଚୁକ୍ ନିଜର ଅନଶନ ଭାଙ୍ଗିଛନ୍ତି । ସେ ଲଦାଖର କିଛି ଲୋକଙ୍କ ସହ ରାଜଘାଟରେ ଥିବା ମହାତ୍ମା ଗାନ୍ଧୀଙ୍କ ସମାଧିସ୍ଥଳରେ ବୁଧବାର ଅପରାହ୍ନରେ ଶ୍ରଦ୍ଧାଞ୍ଜଳି ଅର୍ପଣ କରିବା ପରେ ଏନେଇ ସୂଚନା ଦେଇଛନ୍ତି।
ଓ୍ବାଙ୍ଗଚୁକ୍ କହିଛନ୍ତି ଯେ, ତାଙ୍କ ଗୋଷ୍ଠୀ ନିଜର ଦାବିପତ୍ରଗୁଡ଼ିକୁ ତାଲିକାଭୁକ୍ତ କରି ଏକ ସ୍ମାରକପତ୍ର ଦାଖଲ କରିଛନ୍ତି। ଖୁବ୍ଶୀଘ୍ର ଶୀର୍ଷ ନେତୃତ୍ୱଙ୍କ ସହ ବୈଠକ କରାଯିବାକୁ ତାଙ୍କୁ ନିଶ୍ଚିତ କରାଯାଇଛି।
ଏଥିସହ ନିଜର ସୋସିଆଲ ମିଡିଆରେ ପୋଷ୍ଟ କରି ଓ୍ବାଙ୍ଗଚୁକ୍ ଅହେତୁକ ସମର୍ଥନ ଲାଗି ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ଗୃହ ମନ୍ତ୍ରଣାଳୟର ଆଶ୍ୱାସନା ପରେ ଅନଶନ ଭାଙ୍ଗିଛୁ। ଆସନ୍ତା କିଛି ଦିନ ମଧ୍ୟରେ ଭାରତର ଶୀର୍ଷ ନେତାଙ୍କ ସହ ଏକ ବୈଠକ ହେବ ବୋଲି ସେ ମଧ୍ୟ କହିଛନ୍ତି।
ମହାତ୍ମା ଗାନ୍ଧୀଙ୍କ ସମାଧିରେ ଶ୍ରଦ୍ଧାଞ୍ଜଳି ଅର୍ପଣ କରିବା ପରେ ଗଣମାଧ୍ୟମକୁ ଓ୍ବାଙ୍ଗଚୁକ୍ କହିଥିଲେ ଯେ, ଆମେ ସରକାରଙ୍କୁ ଏକ ସ୍ମାରକପତ୍ର ଦାଖଲ କରିଛୁ ଯେ ଲଦାଖ ପାଇଁ ଏଭଳି ବ୍ୟବସ୍ଥା କରାଯିବା ଉଚିତ ଯାହାଦ୍ୱାରା ଏହାର ପରିବେଶ ସଂରକ୍ଷଣ ହୋଇପାରିବ। ହିମାଳୟରେ ସ୍ଥାନୀୟ ଲୋକଙ୍କୁ ସଶକ୍ତ କରାଯିବା ଉଚିତ କାରଣ କେବଳ ସେମାନେ ହିଁ ଏହାର ସର୍ବୋତ୍ତମ ସଂରକ୍ଷଣ କରିପାରିବେ। ଗୃହ ମନ୍ତ୍ରଣାଳୟ ଆମକୁ ନିଶ୍ଚିତ କରିଛି ଯେ ଆସନ୍ତା ଦିନରେ ଆମେ ପ୍ରଧାନମନ୍ତ୍ରୀ, ରାଷ୍ଟ୍ରପତି ଏବଂ ଗୃହମନ୍ତ୍ରୀଙ୍କୁ ଭେଟିବୁ ବୋଲି ସେ କହିଛନ୍ତି।