ତେହେରାନ,୭।୪: ପଶ୍ଚିମ ଏସିଆରେ ଯୁଦ୍ଧ ପରିସ୍ଥିତି ଭୟଙ୍କର ରୂପ ନେବାରେ ଲାଗିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିନାଶକାରୀ ଧମକ ଏବଂ ଇସ୍ରାଏଲର ଆକ୍ରମଣ ମଧ୍ୟରେ ଇରାନରେ ଅବସ୍ଥିତ ଭାରତୀୟ ଦୂତାବାସ ନିଜ ନାଗରିକଙ୍କ ସୁରକ୍ଷା ପାଇଁ ଏକ ଜରୁରୀକାଳୀନ ମାର୍ଗଦର୍ଶିକା (Advisory) ଜାରି କରିଛି। ଭାରତୀୟଙ୍କୁ ଆଗାମୀ ୪୮ ଘଣ୍ଟା ପର୍ଯ୍ୟନ୍ତ ଘରୁ ବାହାରକୁ ନ ବାହାରିବା ପାଇଁ ପରାମର୍ଶ ଦିଆଯାଇଛି।
ଇରାନରେ ରହୁଥିବା ସମସ୍ତ ଭାରତୀୟଙ୍କୁ ନିମ୍ନଲିଖିତ ନିୟମ ପାଳନ କରିବାକୁ କୁହାଯାଇଛି:
-ଘର ଭିତରେ ରୁହନ୍ତୁ: ଅତି ଜରୁରୀ ନହେଲେ ଆଗାମୀ ୨ ଦିନ ବାହାରକୁ ଯାଆନ୍ତୁ ନାହିଁ।
-ଏହି ସ୍ଥାନରୁ ଦୂରେଇ ରୁହନ୍ତୁ: ବିଦ୍ୟୁତ କେନ୍ଦ୍ର, ସାମରିକ ଗୋଦାମ ଏବଂ ବହୁମହଲା କୋଠାର ଉପର ମହଲାକୁ ଯାଆନ୍ତୁ ନାହିଁ।
-ଯାତ୍ରା ପୂର୍ବରୁ ଯୋଗାଯୋଗ: ଯଦି ହାଇୱେରେ କୌଣସି ଜରୁରୀ ଯାତ୍ରା କରିବାକୁ ପଡ଼େ, ତେବେ ଦୂତାବାସ ସହ ନିଶ୍ଚିତ ଯୋଗାଯୋଗ କରନ୍ତୁ।
-ସହାୟତା ନମ୍ବର: ଯେକୌଣସି ବିପଦ ସମୟରେ +୯୮୯୧୨୮୧୦୯୧୧୫, +୯୮୯୧୨୮୧୦୯୧୦୨, +୯୮୯୧୨୮୧୦୯୧୦୯ ଏବଂ +୯୮୯୯୩୨୧୭୯୩୫୯ ନମ୍ବରରେ ଯୋଗାଯୋଗ କରିବାକୁ କୁହାଯାଇଛି।