ନୂଆଦିଲ୍ଲୀ,୯ା୪: ଭାରତୀୟ ନୌସେନା ପାଇଁ ଫ୍ରାନ୍ସରୁ ୨୬ଟି ରାଫେଲ ସାମୁଦ୍ରିକ ଯୁଦ୍ଧ ବିମାନ କ୍ରୟ କରିବା ପାଇଁ କ୍ୟାବିନେଟ୍ କମିଟି (CCS) ମେଗା ଡିଲ୍କୁ ମଞ୍ଜୁରୀ ଦେଇଛି। ଏହି ଚୁକ୍ତିର ମୂଲ୍ୟ ପ୍ରାୟ ୬୩୦୦୦ କୋଟି ଟଙ୍କା। ଏହି ଚୁକ୍ତିନାମାକୁ ଚୂଡ଼ାନ୍ତ କରାଯିବ ଏବଂ ଖୁବ୍ଖୀଘ୍ର ସ୍ବାକ୍ଷରିତ କରାଯିବ।
ଏହି ଚୁକ୍ତିନାମା ଅନୁଯାୟୀ, ନୌସେନା ୨୨ଟି ସିଙ୍ଗଲ-ସିଟ୍ ଏବଂ ୪ଟି ଡବଲ୍-ସିଟ୍ ରାଫେଲ ସାମୁଦ୍ରିକ ବିମାନ ପାଇବ, ଯାହାକୁ ବିମାନ ବାହକ INS ବିକ୍ରାନ୍ତରେ ନିୟୋଜିତ କରାଯିବ। ଏହି ନିଷ୍ପତ୍ତି ପରେ, ପ୍ରତିରକ୍ଷା ମନ୍ତ୍ରଣାଳୟ ଏବେ ଫ୍ରାନ୍ସ ସରକାରଙ୍କ ସହିତ ଚୁକ୍ତି ପ୍ରକ୍ରିୟା ଶେଷ କରିବ।
ଏହା ବ୍ୟତୀତ, ଏଥିରେ ଜେଟ୍ଗୁଡ଼ିକର ରକ୍ଷଣାବେକ୍ଷଣ, ଲଜିଷ୍ଟିକ ସହାୟତା, ନୌସେନା କର୍ମଚାରୀଙ୍କ ତାଲିମ ଏବଂ ଭାରତରେ ନିର୍ମିତ ହେବାକୁ ଥିବା କିଛି ଅଂଶ ପାଇଁ ଏକ ସ୍ବତନ୍ତ୍ର ଯୋଜନା ମଧ୍ୟ ଅନ୍ତର୍ଭୁକ୍ତ। ଏହି ଚୁକ୍ତି ଅନୁଯାୟୀ, ଭାରତୀୟ ନୌସେନା କର୍ମଚାରୀମାନଙ୍କୁ ରାଫେଲ ଏମ ଉଡ଼ାଇବା ଏବଂ ପରିଚାଳନା କରିବା ପାଇଁ ତାଲିମ ମଧ୍ୟ ଦିଆଯିବ।
ରାଫେଲ ଏମ ଜେଟ୍ର ପ୍ରଥମ ଡେଲିଭରି ୨୦୨୯ ଶେଷ ସୁଦ୍ଧା ଆରମ୍ଭ ହୋଇପାରେ। ସମସ୍ତ ୨୬ଟି ଜେଟ୍ ୨୦୩୧ ସୁଦ୍ଧା ଭାରତୀୟ ନୌସେନାକୁ ଯୋଗାଇ ଦିଆଯିବ। ଏହି ଲଢ଼ୁଆ ଜେଟ୍ଗୁଡ଼ିକୁ ଆଇଏନ୍ଏସ୍ ବିକ୍ରମାଦିତ୍ୟ ଏବଂ ଆଇଏନ୍ଏସ୍ ବିକ୍ରାନ୍ତ ଭଳି ଭାରତୀୟ ବିମାନ ବାହକ ଜାହାଜରେ ନିୟୋଜିତ କରାଯିବ। ଏଗୁଡ଼ିକ ପୁରୁଣା MiG-29K ଲଢ଼ୁଆ ବିମାନଗୁଡ଼ିକୁ ବଦଳାଇବ, ଯାହା ଏବେ ପୁରୁଣା ହୋଇଗଲାଣି।
ରାଫେଲ ଏମ ଜେଟ୍ଗୁଡ଼ିକୁ ସ୍ବତନ୍ତ୍ର ଭାବରେ ବିମାନ ବାହକ ଜାହାଜରୁ ଉଡ଼ାଣ ଏବଂ ଅବତରଣ ପାଇଁ ଡିଜାଇନ କରାଯାଇଛି। ଏଥିରେ ଶକ୍ତିଶାଳୀ ଲ୍ୟାଣ୍ଡିଂ ଗିଅର, ଆରେଷ୍ଟର ହୁକ ଏବଂ ପ୍ରଯୁକ୍ତିବିଦ୍ୟା (ଯାହା ବିମାନକୁ କମ ଦୂରତାରୁ ଉଡ଼ାଣ ଏବଂ ଦ୍ରୁତ ଅବତରଣ କରିବାରେ ସାହାଯ୍ୟ କରେ) ଅନ୍ତର୍ଭୁକ୍ତ। ଏହି ଚୁକ୍ତି ଭାରତୀୟ ନୌସେନାର ଶକ୍ତିକୁ ବହୁ ପରିମାଣରେ ବୃଦ୍ଧି କରିବ।
ଭାରତୀୟ ନୌସେନା ପାଇଁ ରାଫେଲ ଏମର ବୈଶିଷ୍ଟ୍ୟଗୁଡ଼ିକ
ଭାରତୀୟ ନୌସେନା ପାଇଁ କିଣାଯାଉଥିବା ରାଫେଲ ଏମ୍ ଲଢ଼ୁଆ ବିମାନଗୁଡ଼ିକୁ ସାମୁଦ୍ରିକ ଆବଶ୍ୟକତା ଅନୁସାରେ ସ୍ବତନ୍ତ୍ର ଭାବରେ ଡିଜାଇନ କରାଯାଇଛି। ଏହି ଜେଟ୍ଗୁଡ଼ିକ Meteor, Exocet ଏବଂ SCALP ଭଳି ବିପଜ୍ଜନକ ଏବଂ ଉନ୍ନତ କ୍ଷେପଣାସ୍ତ୍ର ବହନ କରିବାକୁ ସକ୍ଷମ, ଯାହା ସେମାନଙ୍କର ଯୁଦ୍ଧ କ୍ଷମତାକୁ ବହୁତ ଶକ୍ତିଶାଳୀ କରିଥାଏ।
ଏହା AESA ରାଡାର (Active Electronically Scanned Array) ସହିତ ସଜ୍ଜିତ, ଯାହା ଶତ୍ରୁକୁ ଶୀଘ୍ର ଏବଂ ସଠିକ ଭାବରେ ଚିହ୍ନଟ କରିବାରେ ସାହାଯ୍ୟ କରେ।
ଏଥିରେ SPECTRA ଇଲେକ୍ଟ୍ରୋନିକ ଯୁଦ୍ଧ ପ୍ରଣାଳୀ ମଧ୍ୟ ଅଛି, ଯାହା ଜେଟ୍କୁ ଶତ୍ରୁ ଆକ୍ରମଣରୁ ଲୁଚାଇବା, ଖସିଯିବା ଏବଂ ସୁରକ୍ଷା ଦେବାରେ ସାହାଯ୍ୟ କରେ।
ଏହି ଜେଟ୍ ବିମାନଟି ମାକ ୧.୮ (ଶବ୍ଦର ପ୍ରାୟ ଦୁଇଗୁଣ) ବେଗରେ ପହଞ୍ଚିପାରିବ।
ଏହାର ଯୁଦ୍ଧ ପରିସର ୧୮୫୦ କିଲୋମିଟରରୁ ଅଧିକ।
ଏହି ଜେଟ୍ରେ ମଝି ଆକାଶରେ ଇନ୍ଧନ ଭର୍ତ୍ତି କରିବାର ସୁବିଧା ଅଛି, ଯାହା ଏହାକୁ ଅଧିକ ସମୟ ଉଡ଼ିପାରିବ ଏବଂ ଦୂରଗାମୀ ମିଶନ ବି କରିପାରିବ।