ମୁମ୍ବାଇ,୫।୧୧: ଦକ୍ଷିଣ ଆଫ୍ରିକା ବିପକ୍ଷରେ ହେବାକୁ ଥିବା ଆଗାମୀ ଟେଷ୍ଟ ସିରିଜ୍ ପାଇଁ ବିସିସିଆଇ ବୁଧବାର ଭାରତର ୧୫ ଜଣିଆ ଦଳ ଘୋଷଣା କରିଛି। ଆହତଜନିତ କାରଣରୁ ଦଳରୁ ବାହାରେ ଥିବା ଟେଷ୍ଟ ଦଳର ନିୟମିତ ଉପଅଧିନାୟକ ରିଷଭ ପନ୍ତ ଏହି ଦଳକୁ ପ୍ରତ୍ୟାବର୍ତ୍ତନ କରିଛନ୍ତି।
ଇଂଲଣ୍ଡ ଗସ୍ତ ସମୟରେ ଆହତ ହୋଇଥିବା ପନ୍ତ, ନିକଟରେ ଭାରତ ‘ଏ’ ବନାମ ଦକ୍ଷିଣ ଆଫ୍ରିକା ‘ଏ’ ସିରିଜ୍ରେ ଖେଳି ଫର୍ମକୁ ଫେରିଛନ୍ତି। ୨୮ ବର୍ଷୀୟ ଏହି ୱିକେଟ୍ କିପର-ବ୍ୟାଟର ‘ଏ’ ଦଳର ଅଧିନାୟକ ଭାବେ ଉତ୍କୃଷ୍ଟ ପ୍ରଦର୍ଶନ କରିଥିଲେ।
ପନ୍ତ ଉପ-ଅଧିନାୟକ ଭାବେ ଶୁଭମନ ଗିଲ୍ (ଅଧିନାୟକ) ଙ୍କୁ ସହଯୋଗ କରିବେ। ୱେଷ୍ଟଇଣ୍ଡିଜ୍ ସିରିଜ୍ରେ ପ୍ରଭାବିତ କରିଥିବା ଧ୍ରୁବ ଜୁରେଲ୍ ଦଳର ଦ୍ୱିତୀୟ ୱିକେଟ୍ କିପର ଭାବେ ସ୍ଥାନ ପାଇଛନ୍ତି।
ଅକ୍ଷର ପଟେଲ୍ ଟେଷ୍ଟ ଦଳକୁ ଫେରିଥିବା ବେଳେ ପ୍ରସିଦ୍ଧ କ୍ରିଷ୍ଣା ବାଦ୍ ପଡ଼ିଛନ୍ତି। ଅକ୍ଷର, ରବୀନ୍ଦ୍ର ଜାଡେଜା ଏବଂ ୱାଶିଂଟନ୍ ସୁନ୍ଦରଙ୍କୁ ବ୍ୟାକଅପ୍ ଦେବେ। ଆକାଶ ଦୀପ ମଧ୍ୟ ୱେଷ୍ଟଇଣ୍ଡିଜ୍ ସିରିଜ୍ରୁ ବାଦ୍ ପଡ଼ିବା ପରେ ପୁନର୍ବାର ଦଳକୁ ଫେରିଛନ୍ତି।
ଭାରତର ଟେଷ୍ଟ ସ୍କ୍ୱାଡ୍: ଶୁଭମନ ଗିଲ୍(ଅଧିନାୟକ), ରିଷଭ ପନ୍ତ (ୱିକେଟ୍ କିପର/ଉପ-ଅଧିନାୟକ), ଯଶସ୍ୱୀ ଜୟସ୍ୱାଲ, କେ.ଏଲ୍. ରାହୁଲ, ସାଇ ସୁଦର୍ଶନ, ଦେବଦତ୍ତ ପାଡିକ୍କଲ୍, ଧ୍ରୁବ ଜୁରେଲ୍(ୱିକେଟ୍ କିପର), ରବୀନ୍ଦ୍ର ଜାଡେଜା, ୱାଶିଂଟନ୍ ସୁନ୍ଦର, ଅକ୍ଷର ପଟେଲ୍, ନୀତିଶ କୁମାର ରେଡ୍ଡୀ, ଯଶପ୍ରୀତ ବୁମରା, ମହମ୍ମଦ ସିରାଜ, କୁଲଦୀପ ଯାଦବ, ଆକାଶ ଦୀପ ।