ଭୁବନେଶ୍ୱର,୧।୧୧: ଓଡିଶା ଶିଳ୍ପ ଭିତ୍ତିଭୂମି ଊନ୍ନୟନ ନିଗମ (ଇଡ୍କୋ) ପକ୍ଷରୁ ‘ଦୁର୍ନୀତି ନିବାରଣ ସଚେତନତା ସପ୍ତାହ-୨୦୨୨’ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ସୋମବାର ଭୁବନେଶ୍ୱ୍ର ସ୍ଥିତ ଇଡକୋ ମୁଖ୍ୟ କାର୍ଯ୍ୟାଳୟରେ ଏକ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଇଡକୋ ମୁଖ୍ୟ ସତର୍କତା ଅଧିକାରୀ ତଥା ମୁଖ୍ୟ ସାଧାରଣ ପରିଚାଳକ (ପ୍ରଶାସନ), ସରୋଜକାନ୍ତ ମହାନ୍ତିଙ୍କ ଅଧ୍ୟକ୍ଷତାରେ ମଧ୍ୟ ଏକ ଶପଥ ପାଠ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଉକ୍ତ ଶପଥ ପାଠ କାର୍ଯ୍ୟକ୍ରମ ପୂର୍ବରୁ ଇଡକୋର ସମସ୍ତ କର୍ମଚାରୀଙ୍କୁ ସରୋଜକାନ୍ତ ସେମାନଙ୍କର କାର୍ଯ୍ୟ, ଦାୟିତ୍ୱ ତଥା କାର୍ଯ୍ୟାଳୟରେ ସର୍ବୋପରି କିଭଳି ସାଧୁତା ଅବଲମ୍ବନ କରିବାକୁ ହେବ ସେ ସମ୍ବନ୍ଧରେ ମଧ୍ୟ ପରାମର୍ଶ ଦେଇଥିଲେ। ବିଶେଷ କରି ଆଇନ ଅନୁସାରେ ଉଭୟ ଲାଞ୍ଚ ନେବା ଓ ଅନ୍ୟ କାହାକୁ ଯାଚିବା ମଧ୍ୟ ଏକ ଦଣ୍ଡନୀୟ ଅପରାଧ ବୋଲି ସେ ସମସ୍ତ କର୍ମଚାରୀଙ୍କୁ ଅବଗତ କରାଇଥିଲେ। ତା’ସହ ନିଜର ବ୍ୟକ୍ତିଗତ ତଥା ସାଧାରଣ ଜୀବନରେ ମଧ୍ୟ ନିଜକୁ ଦୁର୍ନୀତି ମୁକ୍ତ କରିବା ଲାଗି ସେ ଉପସ୍ଥିତ କର୍ମଚାରୀମାନଙ୍କୁ ଉତ୍ସାହିତ କରିଥିଲେ। ଉକ୍ତ କାର୍ଯ୍ୟକ୍ରମରେ ଇଡକୋ ମୁଖ୍ୟ ସାଧାରଣ ପରିଚାଳକ (ଭୂମି) ବିଜୟ କୁମାର ଦାଶ, ମୁଖ୍ୟ ସାଧାରଣ ପରିଚାଳକ (ଏମ୍ଏସ୍ଏମ୍ଇ) ସୁଭାଷ ଚନ୍ଦ୍ର ନାଥଶର୍ମା, ମୁଖ୍ୟ ସାଧାରଣ ପରିଚାଳକ (ଅର୍ଥ) ସୁକାନ୍ତ ପ୍ରସାଦ ଦାଶ, ମୁଖ୍ୟ ସାଧାରଣ ପରିଚାଳକ (ପରିବେଶ) ଅଶୋକ କୁମାର ମିଶ୍ର, ମୁଖ୍ୟ ସାଧାରଣ ପରିଚାଳକ (ଯୋଜନା ଏବଂ ସମନ୍ବୟ) ବିଜୟ ଚନ୍ଦ୍ର ତ୍ରିପାଠୀ, ମୁଖ୍ୟ ସାଧାରଣ ପରିଚାଳକ (ସିଭିଲ) ଅଶ୍ୱିନୀ କୁମାର ବିଶ୍ୱାଳଙ୍କ ସମେତ ବହୁ ବରିଷ୍ଠ ଅଧିକାରୀ ଓ ଅନ୍ୟ କର୍ମଚାରୀମାନେ ମଧ୍ୟ ଉପସ୍ଥିତ ଥିଲେ।