ନୂଆଦିଲ୍ଲୀ,୧୧।୨: ନ୍ୟୁଜିଲାଣ୍ଡ ICC ଟି-୨୦ ବିଶ୍ୱକପ ୨୦୨୬ରେ ଲଗାତାର ଦୁଇଟି ମ୍ୟାଚ ଜିତି ଏକ ଦୃଢ଼ ଆରମ୍ଭ କରିଥିଲା, କିନ୍ତୁ କିୱି ଦଳ ଚଳିତ ଟୁର୍ନାମେଣ୍ଟରେ ଏକ ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଛି। ଷ୍ଟାର ଅଲରାଉଣ୍ଡର ମାଇକେଲ ବ୍ରେସୱେଲ ୨୦୨୬ଟି ୨୦ ବିଶ୍ୱକପରୁ ବାଦ୍ ପଡ଼ିଛନ୍ତି। ନ୍ୟୁଜିଲାଣ୍ଡର ଟୁର୍ନାମେଣ୍ଟର ଉଦଘାଟନୀ ମ୍ୟାଚ ପୂର୍ବରୁ ଅଭ୍ୟାସ ସମୟରେ ବ୍ରେସୱେଲ ଆଘାତ ପାଇଥିଲେ। ଭାରତ ଗସ୍ତରେ ଥିବା ଏବଂ ତିନି ମ୍ୟାଚ ବିଶିଷ୍ଟ ଏକଦିବସୀୟ ସିରିଜର ଅଧିନାୟକତ୍ୱ କରିଥିବା ବ୍ରେସୱେଲ ଦୁର୍ଭାଗ୍ୟବଶତଃ ଗୋଟିଏ ବି ମ୍ୟାଚ ନ ଖେଳି ଟି ୨୦ ବିଶ୍ୱକପ ରୁ ବାଦ୍ ପଡ଼ିଛନ୍ତି।
ମାଇକେଲ ବ୍ରେସୱେଲ ଫେବୃଆରୀ ୮ ତାରିଖରେ ଚେନ୍ନାଇରେ ଆଫଗାନିସ୍ତାନ ବିପକ୍ଷ ମ୍ୟାଚ ସମୟରେ ଏହି ଆଘାତର ଶିକାର ହୋଇଥିଲେ। ପରେ ନ୍ୟୁଜିଲାଣ୍ଡ କ୍ରିକେଟ ଏକ ବିବୃତ୍ତିରେ କହିଛି, “ଗତ ମାସରେ ଭାରତ ବିପକ୍ଷ ତୃତୀୟ ଏକଦିବସୀୟରେ ବ୍ରେସୱେଲ ଆଘାତରୁ ସୁସ୍ଥ ହୋଇଥିଲେ, କିନ୍ତୁ ରବିବାର ଅଭ୍ୟାସ ସମୟରେ ମାଂସପେଶୀରେ ପୁନର୍ବାର ଆଘାତ ପାଇଥିଲେ।
ମାଇକେଲ ବ୍ରେସୱେଲଙ୍କ ଆଘାତ ସମ୍ପର୍କରେ ନ୍ୟୁଜିଲାଣ୍ଡ କ୍ରିକେଟ କହିଛି, “ପରୀକ୍ଷା ପରେ, ଆଘାତ ନିଶ୍ଚିତ ହୋଇଛି ଏବଂ ତାଙ୍କୁ ସମ୍ପୂର୍ଣ୍ଣ ସୁସ୍ଥ ହେବାକୁ ପ୍ରାୟ ତିନି ସପ୍ତାହ ଲାଗିବ ବୋଲି ଆଶା କରାଯାଉଛି।” ବ୍ରେସୱେଲଙ୍କ ବଦଳ ଘୋଷଣା କରାଯାଇଛି। ଅଫ-ସ୍ପିନ ଅଲରାଉଣ୍ଡର କୋଲ ମ୍ୟାକକୋଞ୍ଚି ଦ୍ରୁତ ବୋଲର ବେନ ସିୟର୍ସଙ୍କ ସହିତ ରିଜର୍ଭ ଭାବରେ ଦଳରେ ଯୋଗଦେବା ପାଇଁ ଭାରତ ଯାତ୍ରା କରିବେ।