ନୂଆଦିଲ୍ଲୀ,୧୦।୬: ଇନ୍ଦୋର ବ୍ୟବସାୟୀ ରାଜା ରଘୁବଂଶୀଙ୍କୁ ମେଘାଳୟରେ ହନିମୁନ୍ ବେଳେ ହତ୍ୟା କରାଇଥିଲେ ତାଙ୍କ ସ୍ତ୍ରୀ ସୋନମ। ମେ’ ୨୩ରୁ ନିଖୋଜ ଥିବା ରାଜାଙ୍କ ମୃତଦେହ ଜୁନ୍ ୨ରେ ଠାବ ହେବା ପରେ ନବବିବାହିତା ସୋନମଙ୍କୁ ଜୀବିତ ଉଦ୍ଧାର କରିବା ମଧ୍ୟପ୍ରଦେଶ ଓ ମେଘାଳୟ ପୋଲିସ ପାଇଁ ବଡ଼ ଚ୍ୟାଲେଞ୍ଜ ହୋଇଯାଇଥିଲା। ତେବେ ଶନିବାର ରାତିରେ ଉତ୍ତର ପ୍ରଦେଶର ଗାଜିପୁରସ୍ଥିତ ଏକ ଢାବାରୁ ସୋନମ ସଂଜ୍ଞାହୀନ ଅବସ୍ଥାରେ ଉଦ୍ଧାର ହେବା ପରେ ପୋଲିସ ତାଙ୍କୁ ଗାଜିପୁର ମେଡିକାଲ କଲେଜକୁ ଚିକିତ୍ସା ପାଇଁ ନେଇଥିଲା। ସୋନମ ସେଠାରେ ପୋଲିସ ନିକଟରେ ଆମତ୍ସମର୍ପଣ କରିବା ପରେ ତାଙ୍କୁ ଗିରଫ କରାଯାଇଛି। ଶନିବାର ରାତିରେ ଅନ୍ୟ ୩ ଅଭିଯୁକ୍ତଙ୍କୁ ଗିରଫ କରାଯାଇଛି। ଜଣେ ଉତ୍ତର ପ୍ରଦେଶରୁ ଧରା ପଡ଼ିଥିବାବେଳେ ଅନ୍ୟ ୨ ଜଣ ଇନ୍ଦୋରରୁ ଗିରଫ ହୋଇଛନ୍ତି। ସୋନମ ନିଜ ସ୍ବାମୀଙ୍କୁ ହତ୍ୟା କରାଇବା ପାଇଁ ସେମାନଙ୍କୁ ସୁପାରି ଦେଇଥିବା ଅଭିଯୁକ୍ତମାନେ ପୋଲିସ ସମ୍ମୁଖରେ ପ୍ରଘଟ କରିଛନ୍ତି। ଅଭିଯୁକ୍ତମାନଙ୍କ ବୟାନ ଆଧାରରେ ସୋନମଙ୍କ ପ୍ରେମିକ ରାଜ କୁଶଓ୍ବାହଙ୍କୁ ଗିରଫ କରାଯାଇଥିବା ପୋଲିସ କହିଛି। ଏହି ବହୁଚର୍ଚ୍ଚିତ ହତ୍ୟାକାଣ୍ଡର ପର୍ଦ୍ଦାଫାଶ କରିବାରେ ମେଘାଳୟ ପୋଲିସ ସଫଳ ହୋଇଥିବା ଦର୍ଶାଇ ମୁଖ୍ୟମନ୍ତ୍ରୀ କନରାଡ୍ ସାଙ୍ଗ୍ମା ପ୍ରଶଂସା କରିଛନ୍ତି।
ମର୍ଡର ମିଷ୍ଟ୍ରି: ଘଟଣାକ୍ରମ
ମେ’ ୧୧: ମଧ୍ୟପ୍ରଦେଶ ଇନ୍ଦୋର ବ୍ୟବସାୟୀ ରାଜା ରଘୁବଂଶୀ ଓ ସୋନମ ବିବାହ କରିଥିଲେ।
ମେ’ ୨୦: ନବଦମ୍ପତି ମେଘାଳୟକୁ ହନିମୁନ୍ ପାଇଁ ଯାଇଥିଲେ।
ମେ’ ୨୨: ଦୁହେଁ ଚେରାପୁଞ୍ଜିର ନନ୍ଗ୍ରିଆଟ୍ରେ ପହଞ୍ଚଥିଲେ ବୁଲାବୁଲି କରି ରାତ୍ରିଯାପନ କଲେ।
ମେ’ ୨୩: ସେଠାରୁ ଯିବା ପରେ ଉଭୟେ ନିଖୋଜ ହୋଇଗଲେ। ସୋନମ ଅପରାହ୍ନ ୧ଟା ୪୩ରେ ଶେଷଥର ନିଜ ମା’ଙ୍କୁ କଲ୍ କରିଥିଲେ। ସେମାନେ ଭଡ଼ାରେ ନେଇଥିବା ସ୍କୁଟି ପରେ ପରିତ୍ୟକ୍ତ ଅବସ୍ଥାରେ ଠାବ ହୋଇଥିଲା।
ଜୁନ୍ ୨: ଏନ୍ଡିଆର୍ଏଫ୍ ଡ୍ରୋନ୍ ଓ୍ବେଇ ସଡୋଙ୍ଗ୍ ଫଲ୍ସରେ ରାଜାଙ୍କ ମୃତଦେହ ଠାବ କଲା। ରକ୍ତରଞ୍ଜିତ ଦାଆ ଓ ରାଜାଙ୍କ ଦ୍ୱାରା ବ୍ୟବହୃତ କିଛି ସାମଗ୍ରୀ ଯଥା-ସ୍ମାର୍ଟଓ୍ବାଚ୍, ରେନ୍କୋଟ୍, ଶାର୍ଟ, ଫୋନ୍ ଫ୍ରାଗ୍ମେଣ୍ଟ୍ସ ଜବତ ହେଲା।
ମେଘାଳୟ ପୋଲିସ ହତ୍ୟା ମାମଲା ରୁଜୁ କରି ସ୍ବତନ୍ତ୍ର ତଦନ୍ତକାରୀ ଟିମ୍ ଗଠନ କଲା।
ରାଜା ଓ ସୋନମ ନିଖୋଜ ହେବା ପୂର୍ବରୁ ମେଘାଳୟର ଏକ ଘରେ ରହିଥିବା ନେଇ ସିସିଟିଭି ଫୁଟେଜ ସାମ୍ନାକୁ ଆସିଲା। ଜଣେ ଗାଇଡ୍ ଉଭୟଙ୍କୁ ୩ ଅଚିହ୍ନା ବ୍ୟକ୍ତିଙ୍କ ସହ ଦେଖିଥିବା ନେଇ ପୋଲିସକୁ ଅବଗତ କରାଇଲେ।
ଜୁନ୍ ୯: ସୋନମ ଉତ୍ତର ପ୍ରଦେଶର ଗାଜିପୁରରେ ଆମତ୍ସମର୍ପଣ କଲେ। ସେ ନିଜ ସ୍ବାମୀଙ୍କ ହତ୍ୟା ଷଡ଼ଯନ୍ତ୍ର ରଚିଥିବାବେଳେ ଏହି ଅପରାଧର ସହଅଭିଯୁକ୍ତ ଆକାଶ ରାଜପୁତ (ଲଳିତପୁର, ୟୁପି), ବିଶାଲ ସିଂ ଚୌହାନ ଓ ରାଜ ସିଂ କୁଶଓ୍ବାହ (ଇନ୍ଦୋର, ଏମ୍ପି), ଆନନ୍ଦ କୁର୍ମି (ସାଗର, ଏମ୍ପି) ଗିରଫ ହୋଇଛନ୍ତି। ଅନ୍ୟ ଜଣେ ସନ୍ଦିଗ୍ଧ ଫେରାର ଅଛନ୍ତି।