କେନ୍ଦୁଝର,୧୧।୪(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲାରେ ଚଳିତ ବର୍ଷ ଖରିଫ ଧାନ ସଂଗ୍ରହରେ ଐତିହାସିକ ରେକର୍ଡ ସୃଷ୍ଟି ହୋଇଛି। ଭାଜପା ରାଜ୍ୟ ସ୍ବତନ୍ତ୍ର ନିମନ୍ତ୍ରିତ କାର୍ଯ୍ୟକାରିଣୀ ସଦସ୍ୟ ତଥା କୃଷକ ମୋର୍ଚ୍ଚାର ପୂର୍ବତନ ରାଜ୍ୟ ସଭାପତି ମହେଶ୍ୱର ସାହୁ ଏହି ସଫଳତା ସମ୍ପର୍କରେ ପ୍ରେସ ରିପୋର୍ଟରେ ସୂଚନା ଦେଇ କହିଛନ୍ତି ଯେ, ଏହା ରାଜ୍ୟର କୃଷି କ୍ଷେତ୍ରରେ ଏକ ନୂତନ ଅଧ୍ୟାୟ ରଚନା କରିଛି।
ସେ କହିଥିଲେ ଯେ, ଓଡ଼ିଶାର ଲୋକପ୍ରିୟ ଓ ଚାଷୀ-ହିତେଷୀ ମୁଖ୍ୟମନ୍ତ୍ରୀ ମୋହନ ଚରଣ ମାଝିଙ୍କ ଦୃଢ଼ ନେତୃତ୍ୱ ଏବଂ କୃଷକ କଲ୍ୟାଣକାରୀ ଯୋଜନା ମାନଙ୍କ ପରିଣାମରେ ଚାଷୀମାନଙ୍କ ଆର୍ଥିକ ସ୍ଥିତିରେ ସୁଧାର ଆସିଛି। ଏହି ସଫଳତା ପାଇଁ ସେ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି।
ଅଧିକ ତଥ୍ୟ ଅନୁସାରେ, ଗତ ବର୍ଷ ୨୦୨୪ ଖରିଫ ଋତୁରେ କେନ୍ଦୁଝର ଜିଲାର ୯୫ଟି ଧାନମଣ୍ଡୀ ମାଧ୍ୟମରେ ୫୬,୬୭୩ ଜଣ ଚାଷୀଙ୍କ ଠାରୁ ୨୧ ଲକ୍ଷ ୮୮ ହଜାର କ୍ୱିଣ୍ଟାଲ ଧାନ ସଂଗ୍ରହ କରାଯାଇଥିଲା। କିନ୍ତୁ ଚଳିତ ବର୍ଷ ୨୦୨୫ ଖରିଫ ଋତୁରେ ସେହି ୯୫ଟି ମଣ୍ଡୀ ମାଧ୍ୟମରେ ୭୪,୪୯୫ ଜଣ ଚାଷୀଙ୍କ ଠାରୁ ୨୫ ଲକ୍ଷ ୭୧ ହଜାର କ୍ୱିଣ୍ଟାଲ ଧାନ ସଂଗ୍ରହ ହୋଇଛି।
ଏହା ଗତ ବର୍ଷ ତୁଳନାରେ ୭,୮୧୨ ଜଣ ଅଧିକ ଚାଷୀଙ୍କ ସହଭାଗିତା ଏବଂ ୩ ଲକ୍ଷ ୮୩ ହଜାର କ୍ୱିଣ୍ଟାଲ ଅଧିକ ଧାନ ସଂଗ୍ରହକୁ ସୂଚିତ କରୁଛି। ପ୍ରତିଶତ ଆକାରରେ ଏହା ପ୍ରାୟ ୨୫% ବୃଦ୍ଧି, ଯାହା ଜିଲାରେ ଧାନ ସଂଗ୍ରହ ଇତିହାସରେ ଏକ ନୂତନ ରେକର୍ଡ ରୂପେ ପରିଗଣିତ ହେଉଛି।
ସାହୁ ଆହୁରି କହିଛନ୍ତି ଯେ, ରାଜ୍ୟ ସରକାରଙ୍କ ପକ୍ଷରୁ କୃଷି ଭିତ୍ତିଭୂମିକୁ ସୁଦୃଢ଼ କରିବା, ମଣ୍ଡୀ ବ୍ୟବସ୍ଥାକୁ ସକ୍ରିୟ କରିବା ଓ ଚାଷୀଙ୍କୁ ସମୟୋପଯୋଗୀ ସହଯୋଗ ଯୋଗାଇବା ଫଳରେ ଏହି ଅପୂର୍ବ ସଫଳତା ସମ୍ଭବ ହୋଇପାରିଛି।