ବରଗଡ଼,୬।୪(ପ୍ରେମାନନ୍ଦ ଖମାରୀ):ଅଧିକ ଧାନ ଉତ୍ପାଦନ ଯୋଗୁ ରାଜ୍ୟର ଭାତହାଣ୍ଡି କୁହାଯାଉଥିବା ବରଗଡ଼ ଜିଲାର ଚାଷୀଙ୍କ ଦୁଃଖ ସରୁନାହିଁ। ଧାନବିକ୍ରି ଅବ୍ୟବସ୍ଥା ସାଧାରଣରେ ପରିଣତ ହୋଇଥିବାବେଳେ ପ୍ରକୃତିର ତାଣ୍ଡବ ବି ଚାଷୀଙ୍କ ପିଛା ଛାଡୁ ନାହିଁ। କାଳବୈଶାଖୀ ବର୍ତ୍ତମାନ ଜିଲାର ଚାଷୀଙ୍କ ପାଇଁ କାଳ ସାଜିଛି। ସୋମବାର ଅପରାହ୍ନ ପ୍ରାୟ ୩ଟାରୁ ହୋଇଥିବା ଝଡ଼ବର୍ଷା ସହିତ କରାମାଡ଼(କୁଆପଥର ବୃଷ୍ଟି) ଚାଷୀଙ୍କ ଧାନ ଏବଂ ପରିବା ଫସଲକୁ ଧୂଳିସାତ୍ କରି ଦେଇଛି। ଏହା ଜିଲାର ଚାଷୀଙ୍କ ମାନସିକ ସ୍ଥିତିକୁ ଦୋହଲାଇ ଦେଇଛି।
ଅନ୍ୟବର୍ଷ ତୁଳନାରେ ଏଥର ଅନୁକୂଳ ପାଗ ଯୋଗୁ ଜିଲାର ଚାଷୀଙ୍କ ରବି ଧାନ ଫସଲ ଭଲ ହୋଇଥିଲା। ଧାନ ବର୍ତ୍ତମାନ ଗର୍ଭ ଅବସ୍ଥାରେ ରହିଥିବାବେଳେ ଚାଷୀମାନେ ଭଲ ଅମଳ କରିବେ ବୋଲି ଆଶା ରଖିଥିଲେ। ମାତ୍ର ପ୍ରାୟ ୧୫ମିନିଟ୍ ଧରି ଜିଲାର ଅତାବିରା, ଭଟଲି, ସୋହେଲା, ବରଗଡ଼, ଗାଇସିଲେଟ୍, ବିଜେପୁର, ବରପାଲି, ଭେଡ଼େନ ବ୍ଲକର ବିଭିନ୍ନ ଗ୍ରାମରେ ଯେଭଳି ଭାବେ କରାମାଡ଼ ହୋଇଛି, ଚାଷୀଙ୍କ ମଧ୍ୟରେ ସେହି ଆଶା ଉଜୁଡ଼ି ଯାଇଛି। କରାମାଡ଼ ଏତେ ପ୍ରଖର ଥିଲା ଯେ, ସବୁଜ ଧାନ ଏବଂ ପରିବା ଫସଲ ଉପରେ ଧଳା ଆବରଣ ଆଚ୍ଛାଦିତ ହୋଇଥିଲା। ଫଳରେ ଗର୍ଭ ଅବସ୍ଥାରେ ଧାନ ଫସଲ କ୍ଷତିଗ୍ରସ୍ତ ହୋଇଥିବା ବେଳେ ଟମାଟୋ, ବାଇଗଣ, କାକୁଡ଼ି, କଲରା ଆଦି ଫସଲ ମଧ୍ୟ ଯଥେଷ୍ଟ ପ୍ରଭାବିତ ହୋଇଛି। ସେହିପରି ଗଛରୁ ଆମ୍ବ ମଧ୍ୟ ଝଡ଼ି ନଷ୍ଟ ହୋଇଯାଇଛି। ତେବେ ଅମଳ ପୂର୍ବରୁ ଫସଲ ଉପରେ ଏପରି କରାମାଡ଼ ଚାଷୀଙ୍କ ଚିନ୍ତାକୁ ବଢ଼ାଇ ଦେଇଛି।
ଅନ୍ୟପଟେ ଝଡ଼ବର୍ଷାର ପ୍ରଭାବ ମଧ୍ୟ କମ୍ ନ ଥିଲା। ପ୍ରବଳ ବେଗରେ ପବନ ବହିବାରୁ ବିଭିନ୍ନ ସ୍ଥାନରେ ଗଛଡ଼ାଳ ଭାଙ୍ଗି ପଡ଼ିଥିଲା। ଏଭଳି ଗଛଡ଼ାଳ ଭାଙ୍ଗି ପଡ଼ିବାରୁ ୬ନମ୍ବର ଜାତୀୟ ରାଜପଥ ବରଗଡ଼ ସହର ଉପକଣ୍ଠ କଲାପାଣି ନିକଟରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ସେହିପରି ବରଗଡ଼ ସହରର ଗଳିକନ୍ଦି ଜଳାର୍ଣ୍ଣବ ହୋଇ ପଡ଼ିଥିଲା। ବିଦ୍ୟୁତ ସରବରାହ ମଧ୍ୟ ଦୀର୍ଘ ସମୟ ଧରି ବ୍ୟାହତ ହୋଇପଡ଼ିଥିଲା। ତେବେ ମେଘୁଆ ପାଗ ଲାଗି ରହିଥିବାରୁ ପୁଣି ବର୍ଷା ଆଶଙ୍କା ରହିଥିବାବେଳେ ଏଭଳି ପାଗ ବର୍ତ୍ତମାନ ଚାଷୀଙ୍କ ଚିନ୍ତା ବଢ଼ାଇ ଦେଇଛି।