ଥୁଆମୂଳ ରାମପୁର,୩।୧୦(ଦୁର୍ଗା କୀର୍ତ୍ତି): କଳାହାଣ୍ଡି ଜିଲାରେ ଗତ କିଛି ଦିନ ହେବ ଲଘୁଚାପ ଜନିତ ପ୍ରବଳ ବର୍ଷା ଲାଗି ରହିଛି। ଥୁଆମୂଳ ରାମପୁର ବ୍ଳକରେ ସର୍ବାଧିକ ୩୫୨ ମିଲିମିଟର ବର୍ଷା ରେକର୍ଡ ହୋଇଥିବା ବେଳେ ଉକ୍ତ ବ୍ଲକର ବିଭିନ୍ନ ପଞ୍ଚାୟତରେ ଧାନଚାଷ ସହିତ ଅନ୍ୟାନ ଚାଷ ମଧ୍ୟ କ୍ଷୟକ୍ଷତି ହୋଇଛି। ଏହାସହ ଅନେକ ଘରଦ୍ୱାର ଭାଙ୍ଗିବା ସହିତ ରାସ୍ତାଘାଟ, ପୋଲ, ଗଛ ଭାଙ୍ଗି ରାସ୍ତା ଅବରୋଧ ହୋଇଥିବା ସୂଚନା ମିଳିଛି l ପ୍ରବଳ ବର୍ଷାରେ ବନ୍ୟା ପରିସ୍ଥିତି ମଧ୍ୟ ସୃଷ୍ଟି ହୋଇଥିଲା, ଅନେକ ଗ୍ରାମର ଚାଷଜମି ଧୋଇବା ଫଳରେ ଧାନ ଚାଷରେ ପ୍ରଭାବ ପଡିଛି।
ସେହିଭଳି ଥୁଆମୂଳ ରାମପୁର ଓ ଭବାନୀପାଟଣାକୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ଥିବା ଜାକାମ -ସେମେଲ ପଦର ପାଖ ପୋଲ ଉପରେ ପ୍ରଭାହିତ ବର୍ଷା ପାଣିରେ ଭବାନୀପାଟଣା ଯାଉଥିବା ମଟର ସାଇକେଲ ଭାସିଯାଇ ଜଣଙ୍କର ମୃତଦେହ ଉଦ୍ଧାର ହୋଇଥିବା ବେଳେ ଆଉ ଜଣଙ୍କର ପତ୍ତା ମିଳି ଥିବା ଜଣାପଡିଛି। ଉକ୍ତ ଘଟଣା ଟି କର୍ଲାପାଟ ଥାନା ଅଧୀନ ସେମେଲ ପଦର ଗ୍ରାମର ଟେଙ୍ଗାପଡା ପାଖରେ ଘଟିଛି। ସେମାନେ ହେଲେ ଥୁଆମୂଳ ରାମପୁର ବ୍ଲକ ଏବିଇଓ ଦିଲ୍ଲୀପ ଦାସ (୬୦) ଓ ତାଙ୍କ ଭାଇ ପ୍ରଦୀପ ଦାସ (୫୫) ହାର୍ଡଖୁର୍ସିର ବିଦ୍ୟାଳୟର ଶିକ୍ଷକ ବୋଲି ସୂଚନା ମିଳିଛି l
ଖବର ପାଇ କର୍ଲାପାଟ ଥାନା ଅଧିକାରୀ ଶ୍ରୀକାନ୍ତ କୋଳକା ଓ ତାଙ୍କ ସହକର୍ମୀ ଏବଂ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଖୋଜାଖୋଜି କରିଥିବା ବେଳେ ପ୍ରଦୀପ ଦାସଙ୍କ ମୃତଦେହ ଉଦ୍ଧାର କରାଯାଇଥିଲା। ହେଲେ ଦିଲ୍ଲୀପ ଦାସଙ୍କ ବିଷୟରେ କୌଣସି ସୂଚନା ଖବର ଲେଖିବା ପୁର୍ବରୁ ଆଉ ମିଳି ପାରି ନ ଥିଲା। ଏନେଇ କର୍ଲାପାଟ ଥାନା ପକ୍ଷରୁ ଏକ ମାମଲା ଋଜୁ କରି ଅଧିକ ତଦନ୍ତ ସହିତ ଖୋଜାଖୋଜି ଚାଲିଛି। ଶୁକ୍ରବାର ରାତି ହେବାରୁ ଖୋଜାଖୋଜି ବନ୍ଦ ରହିଛି।