ନୀଳଗିରି,୨୧।୩(ପ୍ରଶାନ୍ତ ବିଶ୍ୱାଳ):ପ୍ରେମିକାଙ୍କୁ ଗର୍ଭବତୀ ପରେ ପ୍ରତାରଣା। ବିବାହର ମିଛ ପ୍ରତିଶ୍ରୁତି ଦେଇ ବର୍ଷେ ହେଲା ପ୍ରେମିକାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ପ୍ରେମିକା ଗର୍ଭବତୀ ହେବା ପରେ ହାତ ଛାଡ଼ି ଦେଇଥିଲେ ପ୍ରେମିକ। ନ୍ୟାୟ ପାଇଁ ଥାନାରେ ଅଭିଯୋଗ କରିବା ପରେ ପୋଲିସ ପ୍ରେମିକଙ୍କୁ ଗିରଫ କରିଛି।
ବାଲେଶ୍ୱର ଜିଲା ବରହମପୁର ଥାନା କେଶିପୁର ପଞ୍ଚାୟତ ଅଞ୍ଚଳର ଯୁବତୀ ବର୍ଷେ ହେବ ମୟୂରଭଞ୍ଜ ଜିଲା କପ୍ତିପଦା ଥାନା ବଡ଼ଗୁଡ଼ଗୁଡ଼ିଆ ଗ୍ରାମର ବଦ୍ରିନାଥ କିସ୍କୁଙ୍କୁ ପ୍ରେମ କରିବା ସହ ଶାରୀରିକ ସମ୍ପର୍କ ରଖିଥିଲେ। ପରେ ମେଡିକାଲ ଚେକ୍ଅପ୍ରୁ ସେ ୭ ମାସର ଗର୍ଭବତୀ ହୋଇଥିବା ଜଣାପଡିଥିଲା। ପ୍ରେମିକା ଗର୍ଭବତୀ ହେବା ଜାଣି ହାତ ଛାଡ଼ି ଦେଇଥିଲେ ପ୍ରେମିକ। ନ୍ୟାୟ ପାଇଁ ଯୁବତୀ ଜଣକ ଗାଁର ଆଶାକର୍ମୀଙ୍କ ସହଯୋଗ ନେଇ ବରହମ୍ପୁର ଥାନାରେ ଗତ ଗୁରୁବାର ଲିଖିତ ଅଭିଯୋଗ କରିଥିଲେ। ଆଇଆଇସି ପ୍ରେମଦା ନାୟକ ଉକ୍ତ ଅଭିଯୋଗକୁ ଆଧାର କରି ବହରମପୁର ଥାନାରେ ଏକ ମାମଲା (ନଂ. ୩୮/୨୬) ରୁଜୁ କରି ଯୁବତୀଙ୍କୁ ପଚରାଉଚରା ଓ ଡାକ୍ତରୀମାଇନା କରି ତଦନ୍ତ ଆରମ୍ଭ କରିଥିଲେ। ଗୁରୁବାର ରାତିରେ ପ୍ରେମିକ ବଦ୍ରିନାଥଙ୍କୁ ବାଲେଶ୍ୱର ଚାନ୍ଦିପୁର ଅଞ୍ଚଳରୁ ବହରମପୁର ଆଇଆଇସି ଗିରଫ କରିଥିଲେ। ଶୁକ୍ରବାର ବଦ୍ରିନାଥଙ୍କୁ ଡାକ୍ତରୀମାଇନା ପରେ କୋର୍ଟଚାଲାଣ କରାଯାଇଛି। ଏପରି ସ୍ଥଳେ ଅନ୍ତଃସତ୍ତ୍ୱା ପ୍ରେମିକା ବାଲେଶ୍ୱର ମେଡିକାଲରେ ଚିକିତ୍ସାଧୀନ ଥିବା ଜଣାପଡ଼ିଛି।