ନୂଆଦିଲ୍ଲୀ,୧୮ା୨: ନାବାଳିକା ଯୌନ ନିର୍ଯାତନା ମାମଲାରେ ଆଲ୍ଲାହାବାଦ ହାଇକୋର୍ଟଙ୍କ ଏକ ବିବାଦୀୟ ନିଷ୍ପତ୍ତିକୁ ସୁପ୍ରିମକୋର୍ଟ ରଦ୍ଦ କରିଦେଇଛନ୍ତି। ଜଣେ ୧୧ ବର୍ଷର ଶିଶୁ କନ୍ୟାର ସମ୍ବେଦନଶୀଳ ଅଙ୍ଗକୁ ସ୍ପର୍ଶ କରିବା, ପୋଷାକ ଚିରିବା ଏବଂ ତାକୁ ଟାଣି ନେଇ ବଳାତ୍କାର ଉଦ୍ୟମ କରିବା ଘଟଣାକୁ ହାଇକୋର୍ଟ ‘କେବଳ ଏକ ପ୍ରସ୍ତୁତି’ ବୋଲି କହିଥିଲେ, ଯାହାକୁ ସର୍ବୋଚ୍ଚ ଅଦାଲତ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଦର୍ଶାଇଛନ୍ତି।
୨୦୨୫ ମାର୍ଚ୍ଚ ୧୭ରେ ଆଲ୍ଲାହାବାଦ ହାଇକୋର୍ଟର ଜଷ୍ଟିସ ରାମ ମନୋହର ନାରାୟଣ ମିଶ୍ର ଏକ ନିର୍ଦ୍ଦେଶ ଦେଇଥିଲେ ଯେ, ଅଭିଯୁକ୍ତ ପବନ ଓ ଆକାଶଙ୍କ କାର୍ଯ୍ୟରୁ ସେମାନେ ବଳାତ୍କାର କରିବାକୁ ଚାହୁଁଥିଲେ ବୋଲି ପ୍ରମାଣିତ ହେଉନାହିଁ। ତେଣୁ ସେ ଏହାକୁ ବଳାତ୍କାର ଉଦ୍ୟମ (ଧାରା ୩୭୬/୫୧୧) ବଦଳରେ କେବଳ ବିବସ୍ତ୍ର କରିବା ଉଦ୍ୟମ (ଧାରା ୩୫୪-ବି) ଭାବେ ବିଚାର କରିଥିଲେ।
ମୁଖ୍ୟ ବିଚାରପତି ସୂର୍ଯ୍ୟ କାନ୍ତ, ଜଷ୍ଟିସ ଜୟମାଲ୍ୟ ବାଗଚି ଏବଂ ଜଷ୍ଟିସ ଏନ.ଭି. ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ ଏହି ଯୁକ୍ତିକୁ ଖଣ୍ଡନ କରିଛନ୍ତି। କୋର୍ଟ କହିଛନ୍ତି ଯେ, ଏଭଳି ଗୁରୁତର ଘଟଣାକୁ କେବଳ ‘ପ୍ରସ୍ତୁତି’ ବୋଲି କହିବା ଭୁଲ। ଏହା ସ୍ପଷ୍ଟ ଭାବେ ବଳାତ୍କାରର ଏକ ଉଦ୍ୟମ। ବିଚାରପତିମାନେ କହିଛନ୍ତି, “ନ୍ୟାୟିକ ପ୍ରକ୍ରିୟାରେ କେବଳ ଆଇନଗତ ଯୁକ୍ତି ନୁହେଁ, ବରଂ ସମବେଦନା ଏବଂ ମାନବିକତାର ଆବଶ୍ୟକତା ରହିଛି।”
ସୁପ୍ରିମକୋର୍ଟ ଏହି ମାମଲାରେ ସ୍ୱତଃପ୍ରବୃତ୍ତ ହସ୍ତକ୍ଷେପ କରିବା ସହ ଭବିଷ୍ୟତ ପାଇଁ କିଛି ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି। ଭୋପାଳସ୍ଥିତ ନ୍ୟାସନାଲ ଜୁଡିସିଆଲ ଏକାଡେମୀ (NJA) କୁ ଏକ ବିଶେଷଜ୍ଞ କମିଟି ଗଠନ କରିବାକୁ ନିର୍ଦ୍ଦେଶ ଦିଆଯାଇଛି। ଯୌନ ଅପରାଧ ମାମଲାର ବିଚାର ବେଳେ ବିଚାରପତିମାନେ କିଭଳି ସମ୍ବେଦନଶୀଳ ରହିବେ, ସେଥିପାଇଁ ଏକ ସ୍ୱତନ୍ତ୍ର ମାର୍ଗଦର୍ଶିକା ପ୍ରସ୍ତୁତ କରାଯିବ।
ଏହି ନୂତନ ନିୟମାବଳୀ ଯେପରି ସାଧାରଣ ଲୋକ ବୁଝିପାରିବେ ଏବଂ ଏଥିରେ ଭାରତର ଭାଷାଗତ ବିବିଧତାକୁ ଗୁରୁତ୍ୱ ଦିଆଯିବ, ସେଥିପାଇଁ ନିର୍ଦ୍ଦେଶ ଦିଆଯାଇଛି। କମିଟିକୁ ଏହି ରିପୋର୍ଟ ପ୍ରଦାନ ପାଇଁ ତିନି ମାସ ସମୟ ଦିଆଯାଇଛି। ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ, ପୀଡ଼ିତାଙ୍କ ପ୍ରତି ଅସମ୍ବେଦନଶୀଳତା ‘ପୂର୍ଣ୍ଣ ନ୍ୟାୟ’ ପ୍ରଦାନରେ ଏକ ବଡ଼ ବାଧା।